Եր­կար ժա­մա­նակ մարդ­կանց հար­ցը չի լուծ­վում, հի­մա էլ կո­րո­նա­վի­րուսն է խան­գա­րում

Տավուշի մարզի Ոսկեվան գյուղում կա շինություն, որն արդեն երկար տարիներ է՝ օգտագործվում է որպես բնակելի տարածք: Այնտեղ բնակվող ընտանիքները դեռ նախորդ տարի դիմել են կառավարությանը՝ իրենց բնակության տարածքները սեփականաշնորհելու նպատակով: Համապատասխան գերատեսչությունից այցելել են նշված հասցեով, անգամ կատարվել են չափագրումներ, բնակիչները ներկայացրել են դիմումներ, սակայն, ինչպես ժողովուրդն է ասում, «սայլը տեղից չի շարժվել»:

Բնակիչներն անցած տարի ապրիլին հարցումով դիմել են պետգույքի կառավարման կոմիտեին՝ խնդրելով տեղեկացնել, թե որ փուլում է գտնվում բնակելի շինության տարածքներն այնտեղ ապրող մարդկանց նվիրելու հարցը: Ստացվել է հետևյալ պատասխանը. 

«Կոմիտեն իր լիազորությունների շրջանակներում նվիրատվության գործընթացը կազմակերպում է՝ հիմք ընդունելով կառավարության 2011 թվականի մարտի 24-ի N305-Ն որոշման պահանջները: Կոմիտեի կողմից նախապատրաստվել և կառավարության քննարկմանն է ներկայացվել «ՀՀ կառավարության 2011 թվականի մարտի 24-ի թիվ 305-Ն որոշման մեջ փոփոխություններ և լրացումներ կատարելու մասին» կառավարության որոշման նախագիծը, որի ընդունումից հետո կնախապատրաստվի Ձեր բնակելի տարածքը ձեզ նվիրելու մասին կառավարության որոշման նոր նախագիծ, որն էլ կշրջանառվի օրենսդրությամբ սահմանված կարգով»,-ասված է պետգույքի կառավարման կոմիտեից բնակչին դեռևս նախորդ տարի ուղարկված պատասխանի մեջ: Անցել է մեկ տարուց ավելի ժամանակ, բայց մինչ օրս այս հարցում բնակիչների կյանքում ոչինչ չի փոխվել:

«Փաստը» գրավոր հարցմամբ դիմեց պետգույքի կառավարման կոմիտեին՝ պարզելու, թե ինչ փուլում է գտնվում այս գործընթացը: Ի պատասխան մեր հարցման՝ կոմիտեից տեղեկացնում են. 

«Տավուշի մարզի Ոսկեվան գյուղի թվով 4 բնակելի տարածքի բնակիչներից (այդ թվում Ոսկեվան բնակավայրի 1-ին փողոց, 13/1 հասցեի բնակչից) 2019 թվականի ապրիլի 8-ին ստացվել են դիմումներ, որոնց օրենսդրությամբ սահմանված կարգով ընթացք է տրվել: 

Կոմիտեն 2019 թվականի օգոստոսի 12-ին հատուկ գրությամբ դիմել է ոստիկանության անձնագրային և վիզաների վարչություն՝ խնդրելով տրամադրել տեղեկատվություն նշված հասցեներում հաշվառված անձանց վերաբերյալ: 

Ստացվել է պատասխան գրությունը: Նշված բնակելի տարածքների նվիրատվության վերաբերյալ կառավարության որոշման նախագիծը շրջանառության մեջ դնելու, մասնավորապես նախագծում յուրաքանչյուր բնակելի տարածքի մակերեսը հաշվելու և ներառելու համար նախատեսվել է կոմիտեի աշխատակիցների այց Ոսկեվան համայնք՝ տեղում սենյակների տեղադիրքը և համարները ճշտելու նպատակով: ՀՀ-ում կորոնավիրուսով պայմանավորված արտակարգ դրության պատճառով տեղում տեղադիրքերն ուսումնասիրելու աշխատանքները հետաձգվել են: 

Հաշվի առնելով դա՝ կոմիտեն համապատասխան գրությամբ Տավուշի մարզի Ոսկեվան համայնք է ներկայացրել Ոսկեվան ուսուցչի տան հատակագիծը և խնդրել տրամադրել սենյակների տեղադիրքերը հատակագծում՝ ըստ համարների: Պատասխան գրությունը ստանալուց հետո կառավարության որոշման նախագիծը սահմանված կարգով կշրջանառվի»,-ասված է պետգույքի կառավարման կոմիտեից «Փաստին» ուղարկված պատասխանի մեջ: 

Այս ամբողջ շրջապտույտի մեջ հետաքրքրական է այն փաստը, որ բնակիչները դեռևս նախորդ տարվանից շրջանառում են այս խնդիրը, բայց լուծումն ուշանում է պետգույքի կառավարման կոմիտեի կամ գուցե հենց կառավարության բյուրոկրատական քաշքշուկի, եթե կուզեք՝ նաև որոշակի դանդաղկոտության պատճառով: 

Դե, իսկ հիմա էլ «մեղավոր են» կորոնավիրուսը և հայտարարված արտակարգ դրությունը: Հուսանք գոնե մոտ ապագայում քաղաքացիները որպես նվիրատվություն կստանան այդ բնակելի տարածքները, ինչը հնարավորություն կտա նրանց իրենց լիարժեք տեր զգալ սեփական տներում:

ԼՈՒՍԻՆԵ ԱՌԱՔԵԼՅԱՆ