Բողոքի ակցիա՝ ՀՀ նախագահի նստավայրի առջև. ավազակային հարձակման ենթարկված եզդի ամուսինների հույսը ՀՀ նախագահն ու ՀՀ ոստիկանապետն են (լուսանկարներ, տեսանյութ)

Այսօր՝ դեկտեմբերի 4-ին, ՀՀ նախագահի նստավայրի մոտ բողոքի ակցիա էին անցկացնում հոկտեմբերի 15-ին ավազակային հարձակման ենթարկված Երևան քաղաքի Սիլիկյան թաղամասի 4-րդ փողոցի 1-ին տան բնակիչներ, ամուսիններ Շիրին Ալիյանը, Թառլան Սայդոյանը և նրանց հարազատները, Հայաստանի եզդի համայնքի ներկայացուցիչներ: Ինչպես հայտնում է ֆոտոլրագրող Գագիկ Շամշյանը, ամուսինները ասում էին, որ այսօր նամակ են հանձնել նախագահական նստավայր և իրենց միակ հույսը ՀՀ նախագահ Սերժ Սարգսյանն ու ՀՀ ոստիկանապետ Վլադիմիր Գասպարյանն է, և որ նրանց միջամտությամբ իրավապահ մարմինները շուտ կբացահայտեն հանցագործությունը և մեղավորները կպատժվեն:

Ինչպես ավելի վաղ հայտնել էր ֆոտոլրագրողը, հոկտեմբերի 15-ին 3 անձինք, որոնցից 2-ը՝ դիմակավորված, մուտք էին գործել ամուսինների սեփական տուն, որպես զենք օգտագործվող դանակով բռնություն կիրառել նրանց նկատմամբ և հափշտակել էին գումար, ոսկյա զարդեր, իսկ տան 2 հարկերն էլ ամբողջովին տակնուվրա էին արել:

Ավելի վաղ ֆոտոլրագրողը հայտնել էր, որ Հայաստանի քննչական կոմիտեի Երևան քաղաքի քննչական վարչության Աջափնյակ և Դավիթաշեն վարչական շրջանների քննչական բաժնում հարուցվել է քրեական գործ` ՀՀ քր. օր.-ի 175-րդ հոդվածի 2-րդ մասի 1-ին, 3-րդ և 4-րդ կետերի (ավազակություն, որը կատարվել է մի խումբ անձանց կողմից նախնական համաձայնությամբ, բնակարան, պահեստարան կամ շինություն ապօրինի մուտք գործելով, զենքի, կամ որպես զենք օգտագործվող այլ առարկաների գործադրմամբ) հատկանիշներով: 

Շարունակությունն՝ այստեղ