Արթուր Դավթյանն իր մասնագիտական և բարոյական վերջակետը դրեց խորհրդարանում. Նաիրա Զոհրաբյան

Այն նույն դատախազը, որը ժամանակին ուզում էր զրկել Նիկոլ Փաշինյանին պատգամավորական անձեռնամխելիությունից` կառարելով նախորդ իշխանության պատվերը, հիմա էլ կատարում է այս իշխանության պատվերը։

Այս մասին այսօր`հունիսի 16-ին  ԱԱԾ շենքի դիմաց լրագրողների հետ զրույցում ասաց ԲՀԿ պատգամավոր Նաիրա Զոհրաբյանը`անդրադառնալով Ազգային ժողովում քվեարկության արդյունքում Գագիկ Ծառուկյանին պատգամավորական անձեռնամխելիությունից և ազատությունից զրկելու թեմային:

«Տեղի ունեցածը միանշանակ քաղաքական է, իրավական գործընթաց այստեղ ընդհանրապես չկա:  Որևէ իշխանություն չի կարող Հայաստանը բլոկադայի   ենթարկել, և  հավերժ  երկարացնել արտակարգ ռեժիմը `արգելելով մարդկանց ազատ ցույցը և իրենց բողոքն ազատորեն արտահայտելու իրավունքը:

Կարծում եմ այս ամենը կարճ ժամանակ անց ավարտվելու է, պարզապես իմ հորդորն էր գլխավոր դատախազին չդնել իր մասնագիտական և բարոյական վերջակետը խորհրդարանում, նա, ցավոք սրտի, արեց դա:

 Ցավում եմ, որ հեղափոխությունը շատ տխուր վախճան է ունենալու, ես դա անկեղծորեն չէի ցանկանա, քանի որ մենք մեծ ոգևորությամբ միացանք այդ ամենին, ողջունեցինք բարեփոխումները և հիմա էլ պատրաստ ենք իրականացնել այդ բարեփոխումները: Ցավոք սրտի մենք այսօր տեսնում ենք միայն ռեպրեսիա, տեսնում ենք սուտ, համատարած ձախողումներ բոլոր ոլորտներում»,- ասում է Զոհրաբյանը:

Նրա խոսքով` այս ամենը, ինչ տեղի է ունենում Հայաստանում, չի կարող երկար տևել, քանի որ այն շատ քաղաքական ուժերի, շատ մարդկանց համար անընդունելի է, քանի որ այդ ամենը  բացահայտորեն քաղաքական է և ոչ իրավաչափ.

«Ինչպես տեսաք, արդեն մի քանի քաղաքական ուժեր համատեղ  հայտարարություններ են տարածել` ստեղծված անընդունելի իրավիճակի հետ կապված, հիմա պետք է գնա քաղաքական առողջ ուժերի կոնսոլիդացիայի, և մենք մեր երկրում վերջապես պետք է ունենանք օրենքի իշխանություն:

Ինչպես նշեց Գագիկ Ծառուկյանը` նա հետ նահանջելու տեղ չունի, քանի որ թիկունքում Հայաստանի Հանրապետության քաղաքացին է և  Հայաստանի Հանրապետությունը կորցնելու վտանգն է»:

Հարցին, եթե Գագիկ Ծառուկյանը կալանավորվի, ո՞վ է ստանձնելու կուսակցության ղեկավարությունը և կազմկոմիտում ովքեր լլինեն, Նաիրա Զոհրաբյանը պատասխանեց.

«Կազմկոմիտեում կլինեն տարբեր քաղաքական ուժերի ներկայացուցիչներ, կուսակցության ղեկավարություն ստանձնելու  մասին խոսք չկա, քանի որ ես հույս ունեմ, որ մենք պարոն Ծառուկյանի հետ  կապի մեջ  կլինենք, և եթե ամեն ինչ գնա վատատեսական ծրագրով, որն իհարկե չեմ բացառում, մեզանից յուրաքանչյուրն իր անելիքը գիտի:

Այս պահին ես չեմ ցանկանում հրապարակել մեր կուսակցական և այլ կուսակցությունների հետ  քննարկումների  բովանդակությունը, հանգիստ եղեք շարժումը շարունակվելու է»:

Անդրադառնալով իր հասցեին հնչեցված մեղադրանքներին՝ Նաիրա Զոգրաբյանը պատասխանեց.

«Ես չեմ բացառում, որ վաղն էլ ինձ կարող է ձերբակալեն, նրա համար, ինչ տարածել էին իմ մասին, թե իբրև ես քաղաքացիներին ասել եմ` մեզ առանց փող ձայն չե՞ք տալու, ինչը ծիծաղելի է:

Ասեմ, որ ինձ արդեն դիմել են  Եվրոպական շատ լուրջ փաստաբաններ, իրավապաշտպաններ և առաջարկել են բացարձակ առանց որևէ վճարի ստանձնել իմ պաշտպանությունը, եթե իմ հանդեպ որևէ մեկը կփորձի նման ֆուտուրիստական իրավական իդեաներ ունենա, բայց ես ոչնչից չեմ վախենում, ես պատրաստ եմ  կալանավորվելու»:

Պատգամավորի խոսքով`վերջինս  ուրախ է, որ  Ապօրինի գույքի բռնագանձման մասին օրենքը ընդունվել է, քանի որ ըստ նրա`  մի քանի տարի հետո  շատ հետաքրքիր բացահայտումների ականատես կլինենք:

Հարցին, թե արդյոք Գագիկ Ծառուկյանը նորից հայտարարությամբ հանդես կգա և կասի, որ նորից հեռանում է քաղաքականությունից, Նաիրա Զոհրաբյանը պատասխանեց.

«Ոչ, հնարավոր չէ, Գագիկ Ծառուկյանը մնալու է քաղաքականության մեջ, այս փորձությունները քաղաքական գործչի համար են, մեզանից յուրաքանչյուրի համար են, այնպես որ մենք վերին արտի ցորեն չենք, ես ինքս պատրաստ եմ այս ամենի միջով անցնել պատվով,  գլուխս բաց»,– ասաց նա: