Օրենքի՝ ուժի մեջ մտնելուց հետո կառուցված ինքնակամ կառույցները օրինականացման ենթակա չեն լինի
POLITICSԱրդարադատության նախարարությունն առաջարկում է փոփոխություններ և լրացումներ կատարել քաղաքացիական, հողային, վարչական իրավախախտումների, քրեական և հարկային օրենսգրքերում: Ըստ այդմ, օրենքն ուժի մեջ մտնելուց հետո կբացառվի կառուցված, կառուցվող կամ կիսակառույց ինքնակամ կառույցների հետագա օրինականացման հնարավորությունը, ինչպես նաև կապահովվի արդեն իսկ կառուցված ինքնակամ կառույցների օրինականացման գործընթացը:
Հակիրճ բնութագրում նշվում է, որ նշյալ գործընթացում անհրաժեշտություն է առաջացել նախ և առաջ տարբերակել նախկինում կառուցված և հետագայում կառուցվելիք ինքնակամ շինությունների միջև: Մասնավորապես, նախատեսվում են այնպիսի կարգավորումներ, որոնց ուժով օրինականացման ենթակա չեն լինի այն ինքնակամ կառույցները, որոնք կառուցվել են մշակված օրենքի նախագիծն ուժի մեջ մտնելուց հետո: Ներկայացնենք փոփոխություններից մի քանիսը:
Քաղաքացիական օրենսգրքում փոփոխությունների ու լրացումների արդյունքում ինքնակամ կառույցը չի կարող ճանաչվել օրինական և ենթակա է քանդման, ինչի կարգը և ժամկետները սահմանվելու են կառավարության որոշմամբ: Պետության կամ համայնքային սեփականություն հանդիսացող հողամասում ինքնակամ կառույցի քանդման որոշումը կայացնելու է համայնքի ղեկավարը և այլն:
Միևնույն ժամանակ նշվում է, որ մինչև այս օրենքն ուժի մեջ մտնելը ինքնակամ կառույցները ենթակա են օրինականացման: Պետական կամ համայնքային սեփականություն հանդիսացող հողամասում գտնվող ինքնակամ կառույցի նկատմամբ ճանաչվում է պետության կամ համայնքի սեփականությունը, անկախ նրանից, թե ով է այն կառուցել: Ինքնակամ կառույցի նկատմամբ ճանաչվում է այն անձի սեփականության իրավունքը, որին սեփականության իրավունքով պատկանում է այն հողամասը, որի վրա գտնվում է կառույցը:
Վարչական իրավախախտումների վերաբերյալ օրենսգրքում կատարվող փոփոխությունների համաձայն՝ շենքեր և շինություններ ինքնակամ կառուցելը, ինքնակամ կառույցի կասեցման դեպքում շենքեր և շինություններ ինքնակամ կառուցելը շարունակելը հանգեցնելու է տուգանքի՝ նվազագույն աշխատավարձի երկուհազարապատիկի չափով: