Ձվի գի­նը բարձ­րա­ցել է. որ­քա­նո՞վ է կա­յու­նա­ցել շու­կան, ի՞նչ վնաս­ներ են կրել ար­տադ­րող­նե­րը

Ամիսներ շարունակ ձվի շուկայում արձանագրված գնանկումից հետո վերջին շրջանում շուկայում որոշակի գնաճ է նկատվում: Ի տարբերություն նախորդ ամիսների, այսօր սուպերմարկետներում 19-22 դրամով ձու գրեթե չկա: Իսկ պաշտոնական տվյալներով, ձվի գինը 2020 թ. օգոստոսին 2020 թ. հուլիսի համեմատ 2 տոկոսով բարձրացել է: «Հայաստանի թռչնաբույծների միություն» ՀԿ նախագահ Սերգեյ Ստեփանյանը «Փաստի» հետ զրույցում նշեց, որ թեպետ շատ մեծ դժվարությամբ, բայց շուկան դեպի կայունացում է գնում:

Նրա խոսքով, թեպետ մարտին ձվի գնի նվազման շուրջ այլ կասկածներ կային, բայց փաստն այն էր, որ իրականում արտադրության ծավալներն էին մեծացել: «Գերարտադրության հետևանքով ստիպված գինը շատ իջեցրինք, որովհետև բացի խոշոր ընկերություններից, մյուսները երկարաժամկետ պահեստավորման հնարավորություններ չունեին: Դրա համար գինը իջեցրին, որպեսզի կարողանան սպառում ապահովել և իրենց օրվա ծախսերը կատարել: Այս ընթացքում կրճատեցին նաև ածան հավերի գլխաքանակը, և ձվի քանակը նվազեց: Օրվա կտրվածքով 4000 արկղից այսօր 3000 արկղի ենք իջեցրել:

Ու կարելի է ասել՝ թեպետ դանդաղ, բայց կարողացանք որոշակի կայուն վիճակ ստեղծել, կայունացնել թե՛ ձվի քանակը, թե՛ գինը, որպեսզի վնասները շարունակական բնույթ չկրեն: Բայց, այնուամենայնիվ, համաճարակային պայմաններում սպառողական հնարավորությունները շատ նվազեցին: Այսօրվա վիճակով, այդուհանդերձ, ձվի պահանջարկը կրկին ցածր է, ինչը բնական է՝ հաշվի առնելով, որ նաև մարդկանց գնողունակությունն է պակասել: Հիմա փորձում ենք ուղղակի կայունացած վիճակը պահել, որ մեր արտադրողները կարողանան գոնե վնասով չաշխատել, քանի որ հիմա ոչ մեկը եկամտով չի աշխատում»,ասաց ՀԿ նախագահը:

Ս. Ստեփանյանը շեշտեց՝ ամեն ինչ արվում է, որ ձվի շուկայում գների ո՛չ թռիչքային բարձրացում լինի, ո՛չ էլ կտրուկ նվազում: «Կարևոր է, որ շուկայում կայուն գին ապահովվի: Մեր հաշվարկով, բարձրացման վտանգ չկա, գների կայունացում է գնում և, երևի, մինչև տարեվերջ նույնկերպ կշարունակվի: Մեր խնդիրն այն է, որ ձվի գինը չբարձրանա, լինի ինքնարժեք + առավելագույնը 2-3 դրամ և ոչ մի հավել յալ եկամուտ: Իսկ այն վնասները, որոնք կրել ենք այս ընթացքում, կփորձենք վերականգնել հաջորդ տարի, երբ վիրուսը կանցնի»,-ասաց նա: Անդրադառնալով ընդհանուր շուկային, ձեռբերումներին ու խնդիրներին՝ Ս. Ստեփանյանն ընդգծեց. «Մենք հիմա անգամ ձու ենք արտահանում Ռուսաստան, որ մեր շուկայում ավելցուկ չառաջանա ու գնանկում չլինի:

Առհասարակ, վերջին երկու տարվա մեջ հաջողություն ենք գրանցել, որովհետև Հայաստանը ձվի շուկայով երբեք ինքնաբավ չէր եղել: Միշտ ձվի պակասություն էր լինում ու ներկրվում էր, ինչի պատճառով հոկտեմբեր-դեկտեմբերին գինը բարձրանում էր: Երկու տարվա մեջ հասել ենք նրան, որ ներկրում չկա: Ու քանի որ սկսել ենք ինքնաբավ դառնալ, արդեն մեկ տարի է՝ «Հայաստանի թռչնաբույծների միությունը» կառավարության առաջ մի հարց է բարձրացրել: Խոսքը ձվի վերամշակման գործարան ստեղծելու մասին է: Այդ արտադրությունը կփրկի մեզ այն առումով, որ էլ չենք մտածի շուկան կարգավորելու մասին:

Այսինքն, որքան հնարավոր է, կարող են ձու արտադրել, և եթե անգամ պահանջարկից ավելի լինի, այն կգնա վերամշակման՝ փոշու և հեղուկի տեսքով, որի պահանջարկը, ի դեպ, դրսում շատ մեծ է: Հայաստանում էլ մեծ պահանջարկ կա: Արտադրության 9 ճյուղ փոշի կամ հեղուկ ձու է օգտագործում: Օրինակ՝ օգտագործվում է հրուշակեղենի, մակարոնեղենի, մսամթերքի, մայոնեզի արտադրության, ինչպես նաև խմիչքների մեջ: Մենք բարձրաձայնել ենք պետության հետ համատեղ ձեռնարկություն բացելու մասին, ինչը լայն հնարավորություններ կտա նախ՝ շուկա դուրս գալու իմաստով, երկրորդ՝ գործարանի առկայության դեպքում արտադրողները վնասներ չեն կրի:

Կառավարությունն ընդունել է, որ այն իսկապես կարևոր է, երկու անգամ քննարկում է եղել: Գյուղատնտեսության և վերամշակման ոլորտում եղած ծրագրերի մեջ այն դասվել է առաջին տասնյակի մեջ: Հիմա մնում է տեսնել, թե գործնականում ինչ անդրադարձ կլինի, մնում է ձեռնամուխ լինեն նշվածն իրագործելու տեսանկյունից»: