Նիկոլ Փաշինյանի համար ավելի անվտանգ կլինի քննչական մեկուսարանում, քան այլ տեղ. Կիմ Բալայանը պնդում է՝ Փաշինյանը պետք է քրեական պատասխանատվության ենթարկվի (տեսանյութ)

Նիկոլ Փաշինյանը ոչ միայն չպետք է շարունակի ղեկավար մնալ, այլ պետք է ենթարկվի քրեական պատասխանատվության, նրա համար ավելի անվտանգ կլինի քննչական մեկուսարանում, քան որևէ այլ տեղ: Այս մասին կառավարության շենքի մոտ Tert.am-ի հետ զրույցում ասաց ՍԴ նախկին անդամ Կիմ Բալայանը, որը երեկվանից հացադուլ է հայտարարել՝ Նիկոլ Փաշինյանի՝ սահմանադրական կարգը տապալելու հոդվածով քրեական պատասխանատվության ենթարկելու պահանջով:

Խոսելով իր առողջական վիճակի մասին՝ Բալայանն ասաց, որ քիչ առաջ բժիշկ է իրեն այցելել, մի փոքր ճնշումն է բարձր, դեղ է նշանակել:

Իսկ թե ինչու է Բալայանը կարծում, որ Փաշինյանը երկրում տապալել է սահմանադրական կարգը, նա պարզաբանեց՝ գոյություն ունի Սահմանադրության 116-րդ հոդված, որը նախատեսում է, թե ինչ բան է միջազգային պայմանագիրը, և ինչ տարրեր պետք է այն պարունակի:

«Բացի հրադադարից՝ մնացած բոլոր կետերը՝ այդ հայտարարություն կոչվածի, պետք է միայն ու միայն պայմանագրով լուծվեին: Պայմանագիրը պետք է բերվեր, կքննարկվեր կառավարությունում, ներկայացվեր Սահմանադրական դատարան, ՍԴ-ն պետք է դրական եզրակացություն տար, որից հետո պետք է ուղարկեին խորհրդարան վավերացնելու: Ավելին` այստեղ կա Նիկոլ Փաշինյանի կողմից նաև ինքնիրավչություն: Ինքը հայտարարում էր, որ Արցախի ժողովրդի կողմից չի ընտրվել և հետևապես չի կարող բանակցություններ վարել Արցախի փոխարեն, Արցախի փոխարեն ինչպե՞ս նա հանձնեց Արցախի տարածքները: Այդ կերպ խախտել է նաև Արցախի Սահմանադրությունը»,- հայտարարեց Կիմ Բալայանը:

Բալայանը պնդեց, որ ՀՀ գլխավոր դատախազն ամենամեծ մեղքն ունի այստեղ, որ մինչև այս պահը քրեական գործ չի հարուցել Նիկոլ Փաշինյանի վերաբերյալ սահմանադրական կարգը տապալելու համար:

Ինչ վերաբերում է նրան, արդյոք ՍԴ այսօրվա կազմը ճիշտ որոշում կկայացներ այս հարցի վերաբերյալ, Բալայանն ընդգծեց. «Ես վատատեսություն չունեմ ՍԴ-ի այսօրվա կազմի վերաբերյալ, որ ասեմ՝ չէ, նրանք օբյեկտիվ քննություն չեն վարի: Խորհրդարանական ուժերը պարտավոր են առաջնորդվել Սահմանադրությամբ, իսկ այս հանգամանքները, որոնք թվեցի, անվիճարկելի են: Այստեղ այլ խնդիր կա. ՍԴ-ն կարող է եզրակացություն տալ, որ այն չի համապատասխանում ՀՀ Սահմանադրությանը, քանի որ սահմանային փոփոխությունները պետք է հանրաքվեի միջոցով լուծվեն, իսկ եթե նույնիսկ միանգամից համաձայնություն տար, ԱԺ-ում պետք է քննարկվեր ու վավերացվեր, և շատ հնարավոր էր՝ մասնակի վավերացվեր, և նույն ՍԴ-ն կարող էր ինչ-որ կետի վերաբերյալ վերապահում ունենալ»:

Հարցին էլ՝ այս իրավիճակում, երբ արդեն հայտարարության կետերը կյանքի են կոչվում, այսօր արդեն Քարվաճառն անցավ թշնամուն, ի՞նչ կարելի է անել, Բալայանն ասաց՝ հիմա ՀՀ-ում և Արցախում անիշխանություն է բառի բուն իմաստով: Նա պատմեց, որ երեկ Մարտակերտի շրջանի Շահումյան գյուղ են մտել ռուս խաղաղապահներ և ադրբեջանական զորքի միավոր և պարտադրել են Շահումյան գյուղը տեղահանել, քանի որ նախկինում՝ մինչև 88 թիվը, այնտեղ բնակվել են ադրբեջանցիներ: Նրա խոսքով՝ Շահումյանում բացառապես ապրել են նախկին Շահումյանից տեղահանված փախստականները: «Սա Մարտակերտի շրջանի մեջ է մտնում, և որևէ նշում չկար հայտարարության մեջ, թե պետք է ազատվեն Շահումյանն ու հարակից գյուղերը, բայց քանի որ հայկական կողմից որևէ ներկայացուցիչ չկա, չկա մեկը, որ ասի՝ սա քարտեզն է, սա հայտարարությունն է, այս ի՞նչ ենք անում: Այսինքն՝ սա նաև անիշխանության վնասակար հետևանքներ են»,- շեշտեց նա:

Մանրամասները՝ տեսանյութում: