«Արան լուսավորում էր մեր մութ օրերը». Լուսին Վարդանյանը՝ որդու 1-ամյակի մասին

LIFE 15 January, 2021 14:03

Դերասան-ամուսիններ Վահագն Խաչատրյանի և Լուսին Վարդանյանի ընտանիքում 2021-ը տոնական է սկսվել, քանի որ հունվարի 5-ին զույգի որդին՝ Արան, դարձել է 1 տարեկան: Tert.am Life-ի հետ զրույցում Լուսինն ասաց, որ Ամանորն առանձնապես չեն տոնել:

«Այս տարի Ամանորը մեզ համար տարբերվում էր հակասական զգացողություններով. մի կողմից մեր ազգի, բոլորիս ողբերգությունն էր պատերազմից հետո, մյուս կողմից՝ Արայիս ծննդյան առաջին տարին։ Նոր տարին դիմավորեցինք ամուսնուս ծնողների հետ, բնականաբար, այս տարի տոն չէր: Դստերս՝ Ռուզիկի, բացատրել էինք ամեն ինչ» ,- ասաց նա։

Հունվարի 5-ին զույգի որդին՝ Արան, դարձել է 1 տարեկան, ինչի առթիվ ծնողները փոքրիկ խնջույք են կազմակերպել տանը: «Այս իրավիճակում մեզ թույլ չէինք տա ավելի մեծ տոնակատարություն դրսում: Արայի ծննդյան օրը փորձեցինք տոն դարձնել երեխայի համար, որովհետև ծննդյան առաջին տարին չէինք կարող Արային և քույրիկին զրկել ուրախությունից: Տորթի թեման Սանտա Կլաուս էր, որովհետև Արան Ձմեռ պապիկի ամենամեծ, ամենալուսավոր նվերն էր մեզ համար այս դժգույն տարում» ,- նշեց նա։

Դերասանուհին ընդգծեց, որ դուստրը՝ 7-ամյա Ռուզաննան, շատ հասուն, պատերազմի օրերին ամեն ինչ հասկացել է՝ չնայած դեռ երկրորդ դասարան է: «Այդ օրերին Ռուզիկն ակամայից լսում և տեսնում էր ամեն բան, որովհետև ամբողջ օրը հեռուստացույցը միացված էր, հարցեր էր տալիս, բայց, բնականաբար, խորությամբ չէր հասկանում պատերազմ բառի էությունը: Աղջիկս գիտեր, թե ինչու սեպտեմբերի 29-ին չնշեցինք իմ ծննդյան օրը, հասկանում էր, ինչու ուրախ, զվարճալի առիթների չենք մասնակցում, ինչու ենք մենք տխուր: Երբեմն էլ, ես ուղղակի անջատում էի հեռուստացույցը, որպեսզի շատ չխորանա այդ թեմայի մեջ, որովհետև շատ էմոցիոնալ երեխա է: Զբաղվելով իր դասերով, խաղերով, բակում ընկերների հետ խաղալով՝ շեղվում էր տխուր թեմայից։ Արան լուսավորում էր մեր մութ օրերն իր փոքրիկ մարմնով ու ժպիտով, իսկ Ռուզիկն իր աշխուժությամբ»,- պատմեց Լուսինը:

Դերասանուհին նաև նկատեց, որ իր երկու երեխան բնավորությամբ տարբեր են: «Արան աշխույժ է, շատ հակացող, ժպտերես, շփվող, բայց ավելորդ անհանգստություն չի պատճառում, ավելի հանգիստ է, քան փոթորիկ Ռուզիկս՝ չնայած շատ լավ հարաբերություններ ունեն: Ռուզիկը Արային ծնված օրից չի խանդել ու ագրեսիվ պահվածք չի ցուցաբերել, անսահման սիրում է եղբորը, եղբայրն էլ իրեն, գրկում են իրար, Արան նստում է Ռուզիկի գիրկը, հանգիստ մուլտֆիլմ են դիտում: Նույնիսկ մի օր, երբ մեքենա վարելու դասընթացի էի գնացել,Վահագը տանն էր, Արան քնած, ասացի՝ Ռուզ, հանգիստ լինե՞մ, որ Արային ուշադիր կլինես, ասաց՝ հանգիստ գնա: Եկա տուն ու տեսա՝ Արան արթնացել էր, Ռուզիկը հագուստը փոխել, գրկել, նստել էր» ,- եզրափակեց Լուսինը: