Կա՞ Հայաստանում մարդ, ով պատրաստ է վստահել հաջորդ պատերազմը Նիկոլ Փաշինյանին. Արշակ Զաքարյան

Հայաստանում ստեղծված իրականությունն անհանգստացնող է։ Այս մասին այսօր՝ փետրվարի 1-ին, հրավիրված ասուլիսին ասաց Նիկոլ Փաշինյանի հրաժարականի պահանջով հունվարի 28-ի հանրահավաքի կազմկերպիչներից Տիգրան Չոբանյանը։

Հանրահավաքի կազմակերպիչներից Արշակ Զաքարյանը, որը երեկ է ազատ արձակվել, նշեց, որ իրենց նպատակը շենք-շինություն գրավելը չէր. «Մեր նպատակն էր որպես քաղաքացի մեր պարտքը կատարել ու պահանջել  ձերբակալել իրավիճակի իրական մեղավորներին։ Ճնշումը բավարար չէր, որ ինչեւ վերջ գնայինք այդ քայլի իրականացմանը։ Նիկոլին ավելի հատուկ է շենք-շինություն գրավելը։ Մեզ փորձում էին վերագրել, թե ջարդելու մտադրություն ունեինք, բոլորս հասուն քաղաքացիներ ենք եւ գիտենք, որ շենքի ամեն ինչը մեզ է պատկանում, որն այսօր զավթել են երկրի թշնամիները։ Թշնամին  գրավել է մեր երկիրը եւ կտոր-կտոր հանձնում է իր բարեկամներին»։

Զաքարյանի խոսքով՝ իրենք դեմ են հեղափոխությանը, ըստ նրա, պատերազմի ժամանակ երկրում պետք է տեղի ունենար ռազմական հեղաշրջում. «Մենք սպասում էինք, որ պատերազմի ժամանակ կլինեժ զինվորական հեղաշրջում, բայց չստացանք։ Սպասում էինք, որ հրապարակում կլինեին հոգեւորականներ, բայց չկային։ Շատ մարդիկ կային, որ մեծ-մեծ խոստումեր տվեցին, բայց չեկան կամ հրահանգ ստացան։ Մենք հրահանգ կատարող չենք, նրանք երեւի փորձում են տեսնել, թե ով է կանգնած մեր հետեւում, բայց տեսան, որ սովորական քաղաքացիներ ենք»։

Արշակ Զաքարյանն ընդգծեց, որ ակցիաների ժամանակ բազմաքանակ ոստիկանների՝ հրապարակ բերելը վախի նշան է։

Տիգրան Չոբանյանն էլ հավելեց, որ բավականին լուրջ վախի դրսեւորում էր, քանի որ իշխանությունը տեսնելով,  որեւէ ներազդեցություն չկա մեզ վրա, որով կարող են ճնշումներ գործադրել, անհանգստացրեց իշխանությանը. «Մեզ մեղադրեցին շենք-շինությունների գրավման փորձ կատարելու համար, ինչը զավեշտալի է, որովհետեւ այն ժամանակ, երբ սկսվեց հրմշտոցը, ինչը միանշանակ սադրանք էր, ես կանգնած էի ոստիկանության շարքերի մեջ եւ դիմում էի ցուցարարներին, որ նրանք կանգ առնեն եւ ոստիկանության մի գնդապետ ասաց, որ պատրաստ է դուռը բացել, որ մենք ներս մտնենք, ես էլ ասացի՝ ոչ, ներս չենք մտնում»։

Արշակ Զաքարյանն էլ ընդգծեց, որ այդ քայլով իրենց փորձել են ծուղակը գցել, որ հիմնավորեին՝ նպատակը ներս մտնելն էր. «Մենք պարզապես ցույց տվեցինք, որ նույնիսկ այդքան քիչ զանգվածով այդ 5000-անոց զորքից չենք վախենում։ Եթե թուրքից չենք վախենում, հայ ոստիկանից վախենալու իմաստը ո՞րն է»։

Զաքարյանը նշեց, որ իրենք ուզել են մուտք գործել Կառավարության շենք ոչ թե ջարդելու համար, այլ՝ բանակցելու, որ Կառավարության շենքը ժողովրդին է պատկանում։

«Կա՞ Հայաստանում մարդ, ով պատրաստ է վստահել հաջորդ պատերազմը Նիկոլ Փաշինյանին։ Որեւէ մեկը կա՞, որ այս իշխանության որեւէ օղակի վստահում է, որ կարող են թույլ չտալ՝ պատերազմ լինի»,- նշեց Արշակ Զաքարյանը։

Հարցին՝ հաջորդ հավաքը ե՞րբ է լինելու, Չոբանյանն ասաց, որ այդ հարցով դեռեւս պետք է քննարկում ունենան։

Չոբանյանը երկրի անվտանգության հարցով դիմեց հայ ժողովրդին. «Բոլոր հայեր, մի փոքր բանականություն ունեցեք, ո՞նց ստացվեց, որ փետրվարի 1-ին Կարսում սկսվում են հարձակողական զորավարժություններ եւ նորից փետրվարի 1-ից էլ թույլատրվում են չվերթներ դեպի Ռուսաստան։  Հենց հիմա իրականացվում է հայաթափում։ Տեսել եմ՝ ինչպես օդանավակայանում տղամարդկանց մի զգալի զանգված  թողել են իրենց ընտանիքներն ու գնում են հաց վաստայելու։ Թուրքը գալու է մտնի ձեր տուն։ Էսօրվանից մտածում եմ՝ ինչ տեսակի զենք առնեմ, դնեմ իմ տունը, որ երբ թուրքը գա իմ ընտանիքիս ցեղասպանելու՝ ես կարողանամ ինքնապաշտպանվել»։