Ցուցարարները ֆուտբոլ խաղացին Բաղրամյան պողոտայում. Օսիպյանը հրաժարվեց միանալ խաղին
BLOGԵրեւանի Բաղրամյան պողոտայում էլեկտրաէներգիայի սակագնի որոշումը կասեցնելու պահանջով հավաքված քաղաքացիներն այսօր՝ հունիսի 25-ին, Երեւանի փոխոստիկանապետ Վալերի Օսիպյանին առաջարկել են ոստիկանների թիմ ստեղծել եւ միասին ֆուտբոլ խաղալ:
NEWS.am-ի թղթակիցը հաղորդում է, որ ցուցարարները մոտեցել են Օսիպյանին եւ առաջարկել միանալ իրենց ֆուտբոլային խաղին:
«Երբ որ քաղաքի վիճակը կարգավորվի, մեծ հաճույքով ոստիկանների հետ խումբ կկազմենք եւ կմիանանք ձեզ: Համոզված եմ, որ ֆուտբոլային խաղում ոստիկանները կհաղթեն»,- ասաց Երեւանի փոխոստիկանապետը՝ հրաժարվելով ցուցարարների հետ ֆուտբոլ խաղալուց:
Մի քանի ցուցարարներ մոտ 5 րոպե ֆուտբոլ խաղացին Բաղրամյան պողոտայում:
Այս պահին նստացույցը շարունակվում է:
Նշենք, որ քաղաքացիները հունիսի 22-ին երեկոյան 19:00-ից նստացույց են սկսել Բաղրամյան պողոտայում՝ պահանջելով անհապաղ կասեցնել էլեկտրաէներգիայի թանկացման վերաբերյալ հունիսի 17-ին Հանրային ծառայություննները կարգավորող հանձնաժողովի կայացրած որոշումը:
Հիշեցնենք, որ չնայած էլեկտրաէներգիայի սակագնի բարձրացման դեմ ուղղված բազմաթիվ բողոք-ակցիաներին հունիսի 17-ին, ՀԾԿՀ հանձնաժողովի նիստում հաստատվել է էլեկտրաէներգիայի նոր սակագինը։ էլեկտրաէներգիան թանկացել է 6.93 դրամով՝ մեկ կՎտ/ժ-ի դիմաց 41.85 դրամից դառնալով 48.78 դրամ։ «Հայաստանի էլեկտրական ցանցեր» (ՀԷՑ) ընկերությունը առաջարկել էր էլեկտրաէներգիայի մեկ կիլովատտ/ժամը թանկացնել 17 դրամով:
Լուսանկարը՝ Անի Ստեփանյանի ֆեյսբուքյան էջի