Սյունիքի դեմ հատուկ են աշխատում

Սյունիքում պետությունն անզիջում պայքար է սկսել հանցավորության դեմ: Բացահայտվում են պետական հողերի վարձակալման ապօրինի գործարքներ, Մեղրիի ճանապարհին թմրամիջոցներ են փնտրում, դպրոցներում են աուդիտ անում: Սյունիքը, որը երբեք հանցավորության մակարդակով առաջինը չի եղել, այսօր, եթե հետեւենք իրավապահներիին, թվում է, ամենաիրավախախտ մարզն է: Եվ դա սկսվեց այն պահից, երբ Սյունիքը «չընդունեց» Նիկոլ Փաշինյանին։

Փետրվարի 22-ին ոստիկանությունն ու ՔԿ-ն առանձնապես խոշոր չափերի՝ 4 կիլոգրամ 290 գրամ հերոին եւ 2 կիլոգրամ 100 գրամ ափիոն են գտել Ալվանք գյուղ-Շվանիձոր ճանապարհին: Երեկ հաղորդեցին․ «Բերման ենթարկվեց 4 անձ, որոնցից մեկը՝ օտարերկրյա քաղաքացի»։ Ալվանքը գյուղ է Մեղրի համայնքի կազմում: «Բայց դա մեր, տեղի օպերատիվ աշխատողներն են բռնել, իրենք կապ չունեն: Մեղրիի ոստիկանության ջանքերով է եղել»,- ասաց Մեղրիի իրավապահներից մեկը: Միայն «անտենաների» գործով 24 վարույթ է հարուցվել Սյունիքում:

Դատախազությունը հաղորդեց, որ հեռահաղորդակցության օպերատորներին ենթավարձակալության տրամադրման գործընթացում չարաշահումներ կան, վերաբերում են 23 համայնքի՝ Կապան, Քաջարան, Լեռնաձոր, Մեղրի, Ագարակ, Տաթեւ եւ այլն: Բոլոր համայնքների ներկա կամ նախկին ղեկավարների գործողություններում քննիչները պաշտոնեական լիազորությունների չարաշահման երեւույթներ են բացահայտել: Սխեման, ըստ քննիչների, սա է. համայնքապետերն իրենց մերձավորներին ձեւական մրցույթներով էժան տարածքներ են տվել, վերջիններս դրանք ավելի բարձր գներով հանձնել են օպերատոր ընկերություններին:

Տարբերությունը, ըստ դատախազության, յուրացվել է, համայնքներին պատճառվել է ընդհանուր 95.617.042 ՀՀ դրամի վնաս, որի մոտ կեսը վերականգնվել է: Համայնքների 10 ղեկավար ընդունել է մեղքը, փոխհատուցել վնասը, եւ նրանց նկատմամբ ընտրվել է անազատության հետ չկապված խափանման միջոց: Միայն Մեղրիի քաղաքապետ Մխիթար Զաքարյանը չի ընդունել առաջադրված մեղադրանքը՝ լիազորությունների չարաշահում, ծանր հետեւանքներով՝ 3,5 մլն դրամի վնաս համայնքային բյուջեին: 

«Ինձ էլ են առաջարկել՝ փոխհատուցեք համայնքի վնասը, փակենք՝ գնա: Բայց սա սկզբունքային հարց է: Մենք վճարելու խնդիր չունենք: Չեմ ուզի երեսով տալ, բայց մեր ընտանեկան բիզնեսից տարեկան մի քանի անգամ ենք այդքան գումարի համայնքին բարեգործություն անում: Ի՞նչ էր եղել որ: Կարող էինք այդ 3,5 մլն-ն էլ էդ ֆորմատով վճարեինք, կորած տեղ չէր: Բայց հարցը սկզբունքն է»,- ասաց քաղաքապետ Զաքարյանը: Նա պատմեց, որ նախկին քաղաքապետը մի քաղաքացու 16 հազարով տարածք էր տվել՝ վարձակալությամբ, հետո էլ իր համաձայնությունը տվել էր, որ այդ քաղաքացին արդեն 600 հազար դրամով տարածքը տա բջջային օպերատորներից մեկին: «Հետո, ես որ ընտրվեցի համայնքապետ, տեսա, որ էդ նույն տեղում տարածքի համար «Վիվան» եւ «Յուքոմը» ամիսը 300 հազար են վճարում, ես էլ բարձրացրեցի վճարը՝ հասցնելով 300 հազարի:

Իհարկե, ես կուզեի, որ 600 հազարը նա վճարեր համայնքին, բայց այդ օպերատորը սպառնաց, որ դատի կտա մեզ, ու նա կշահեր, քանի որ ահռելի գումարներով անտենա էր կառուցել ու պայմանագիր ուներ նախկին քաղաքապետի հետ: Հիմա ո՞րն էր կարեւոր՝ 16 հազարի տեղը 300 հազա՞ր մտցնել համայնքի բյուջե, թե՞ ոչինչ չստանալ, ու համայնքը դատարանում պարտվեր: Ես վարձավճարը դարձրեցի 300 հազար, ու հիմա ինձ մեղադրում են, թե ինչու 600 հազար չեմ դարձրել, այլ համաձայնել եմ, որ 300 հազար տան»,- ներկայացնում է քաղաքապետը: Ճի՞շտ է, որ համայնքներում ձեւական ցածր գնով տարածք տալու, հետո վերավարձակալելու ու տարբերությունը յուրացնելու սխեմա է գործել: «Այո, կան մարդիկ, որ արել են այդպես, իմ կոլեգաներն են, բայց, ինչպես ասում են՝ истина дороже»: 

Հնարավոր է՝ նմանատիպ սխեմաներ գործել են նաեւ այլ մարզերում, բայց Սյունիքի  հանդեպ հատուկ վերաբերմունք է: Ինչո՞ւ են այսքան սեւեռվել մարզի վրա: Սյունիքն ի սկզբանե ամենահականիկոլական մարզն էր: Դեռ պատերազմից առաջ այստեղ ընդվզում էր հասունանում: Կապանի, Մեղրիի, Քաջարանի, Գորիսի քաղաքապետերը քրեական հետապնդումների էին ենթարկվում: Պատերազմից հետո այս տրամադրություններն ավելի սրվեցին: Շուռնուխի, Որոտանի, Խնձորեսկի հատվածներում կորուստներից հետո սյունեցիք կորցրին անվտանգության զգացողությունը: Դեկտեմբերին Փաշինյանը ստիպված էր չեղարկել իր այցը Գորիս ու Կապան եւ կեսճանապարհից հետ դառնալ: Երբ Գորիս- Կապան ճանապարհը տեղ-տեղ դուրս եկավ հայկական ուժերի հսկողության տակից, մարդիկ սկսեցին խուսափել երթեւեկելուց: Հետո հայտնի դարձավ, որ ադրբեջանցիների հետ գաղտնի պայմանավորվածություն կա Դավիթ Բեկ-Գորիս ճանապարհահատվածի մասում, ինչը դժգոհության նոր ալիք առաջացրեց: Հասկանալի է, որ Սյունիքից իշխանությունը վտանգ է զգում: