Առաջ են շարժվում մանիպուլյացիաների միջոցով քաղաքացիներին խաբելու ճանապարհով․ «Փաստ»

«Փաստ» օրաթերթը գրում է

Կորոնավիրուսը աշխարհում չի նահանջում, բայց կորոնավիրուսի ճգնաժամի արդյունքում սկսված համաշխարհային տնտեսական ճգնաժամը սկսել է նահանջել։ Եվ այս տարի համաշխարհային տնտեսության վերականգնման մասով հիմնականում պահպանվում են լավատեսական մոտեցումները։ Իսկ առանձին երկրների տնտեսություններ ուղղակի սկսել են բացառապես դրական դինամիկա ցույց տալ։ Սակայն դա Հայաստանին չի վերաբերում։ Պարզապես չի կարող վերաբերել: Հաշվի առնելով տեղի ունեցող գործընթացները՝ Հայաստանում տնտեսական ճգնաժամը հեռու է նահանջի միտում դրսևորելուց։ Նույնիսկ լրիվ հակառակը:

Չկա ռազմավարական մոտեցում, թե քայլերի ինչպիսի հաջորդականությամբ կարելի է տնտեսությունը դուրս բերել այս խոր փոսից։ Դրա փոխարեն մեծանում է հարակից գործոնների բացասական ազդեցությունը։ Մեր ազգային արժույթը՝ դրամը, դանդաղ, բայց սահուն կերպով արժեզրկվում է՝ ցույց տալով մեր տնտեսության իմունիտետի աստիճանը։ Դրան գումարվում են կառավարության նկատմամբ վստահության հսկայական դեֆիցիտը, կապիտալի արտահոսքը, պետական պարտքի անասելի աճը, սպասվող ընտրությունների հետ կապված անորոշությունը։ Դրա համար էլ տնտեսության մեջ պահպանվում է ընդհանուր բացասական ֆոնը։ Վիճակագրական կոմիտեն վերջերս ամփոփել է 2021 թվականի հունվար-փետրվար ամիսների ՀՀ սոցիալ-տնտեսական վիճակը բնութագրող մակրոտնտեսական ցուցանիշները նախորդ տարվա նկատմամբ, որի համաձայն, տնտեսական ակտիվության ցուցանիշը նվազել է 6,7 տոկոսով։ Ընդ որում, պետք է ուշադրություն դարձնել, որ ներկայացված ցուցանիշների մեջ արդյունաբերական արտադրանքի ծավալը նվազել է 7,9 տոկոսով։

Բայց այս բոլորով հանդերձ, իշխանությունները ձգտում են չափից ավելի մեծ դրական սպասումներ առաջ բերել հանրության շրջանում։ Դրա համար Փաշինյանը ՀԴՄ-ների թվերն է համեմատում, պարբերաբար խոսում է տնտեսության դրական դինամիկայի ու վերականգնողական փուլ թևակոխելու մասին։ Կանխատեսելի է, որ սպասվող ընտրություններին ընդառաջ իշխանություններն ավելի մեծ թափով են ձեռնամուխ լինելու հանրությանը համեմատաբար բարձր ցուցանիշներով մանիպուլացնելուն։ Դրա համար էլ արդեն իսկ էկոնոմիկայի նախարարն սկսել է հայտարարություններ անել, թե Հայաստանի տնտեսությունը վերականգնվում է, այս տարի անցյալ տարվա համեմատությամբ փակելու ենք 10 տոկոս տնտեսական աճով, զբոսաշրջության բնագավառում 319 տոկոս աճ ենք ունենալու և այլն։ Իհարկե, Քերոբյանի հայտարարությունները պատահականություն չեն, և նկատելի են դարձնում մարտ, ապրիլ, մայիս ամիսների մասով շատ գեղեցիկ ցուցանիշներ նկարելու և տնտեսության վերականգնման մասին հորինվածքներով հասարակությանը մոլորեցնելու՝ իշխանությունների նպատակները։

Ամբողջ հարցն այն է, որ համավարակի տարածման պատճառով անցյալ տարվա մարտից սկսած Հայաստանում խիստ սահմանափակումներ կիրառվեցին, լոքդաուն հայտարարվեց, որի արդյունքում առաջին հիմնական հարվածը մեր տնտեսությունը վերցրեց իր վրա, շրջանառությունը հասավ նվազագույնի, իսկ ցուցանիշները սկսեցին աննախադեպ գահավիժել։ Հիմա անցյալ տարվա այս ամիսների ցուցանիշների համեմատությամբ այս տարի ինչ ցուցանիշ էլ որ հնարավոր լինի ներկայացնել, դա կարող ենք համարել աննախադեպ արձանագրում։ Բացասական ցուցանիշների և 0-ի համեմատությամբ 1-ն էլ է շատ մեծ թիվ։ Տրամաբանությունը հուշում է, որ շատ շուտով ականատես կլինենք նաև նրան, թե ինչպես է Նիկոլ Փաշինյանը, իր սովորության համաձայն, սկսելու ֆեյսբուքյան էջում դրական ցուցանիշներ ներկայացնելու միջոցով թվախեղդ անել հանրությանը՝ մանավանդ որ վերջինս իր՝ մարզեր կատարած այցելությունների ժամանակ արդեն իսկ սկսել է խոսք բացել տնտեսության առանձին ճյուղերի վերականգնման միտումների մասին։

Զավեշտալի են հնչում այդ թեզերը, բայց ինքը լավ գիտի, որ ցավոք, իր հեքիաթներին հավատացողներ դեռ կան: Շատ չեն, բայց կան: Ցավոք, իշխանությունները առաջ են շարժվում մանիպուլ յացիաների միջոցով քաղաքացիներին խաբելու ճանապարհով: Սակայն այդպես հազիվ թե երկար «ձգեն». ի վերջո, մարդիկ տեսնում են, որ իրենց եկամուտները նվազել են, համատարած թանկացումներ են, գործազրկություն և այլն, ուստի իրենց ապրելակերպը, չնայած արհեստականորեն տարփողվող բոլոր կեղծ ցուցանիշներին, շարունակում է ծանրանալ։

Արտակ Գալստյան

Մանրամասները՝ «Փաստ» օրաթերթի այսօրվա համարում