Ամենաթանկարժեք հայ ֆուտբոլիստների տասնյակը՝ ըստ Transfermarkt-ի

ԱԱ-2022-ի ընտրական փուլի խաղերը լավ առիթ են ևս մեկ անգամ անդրադառնալու հայ ֆուտբոլիստների տրանսֆերային արժեքներին։ Ինչ թարմացումներ է արել հեղինակավոր Transfermarkt-ը, որ ֆուտբոլիստների արժեքն է բարձրացել, որոնցը՝ նվազել․ ներկայացնում ենք Հայաստանի ազգային հավաքականի ամենաթանկարժեք ֆուտբոլիստների թոփ-10-ը։



Ամենաթանկարժեք հայ ֆուտբոլիստների տասնյակը միանձնյա գլխավորում է Հայաստանի ազգային հավաքականի և իտալական «Ռոմայի» կիսապաշտպան Հենրիխ Մխիթարյանը։ Հեղինակավոր Transfermarkt պարբերականը նրա արժեքը գնահատում է 20 միլիոն եվրո։ Այս արժեքը պորտալը թարմացրել է 2020-ի դեկտեմբերի 29-ին։ Իսկ հայ ֆուտբոլիստի երբևէ ամենաբարձր տրանսֆերային արժեքը եղել է հեռավոր 2016-ին, երբ նա գնահատվում էր 37 միլիոն եվրո։ Արժեքի անկումը, ամենայն հավանականությամբ, պայմանավորված է Մխիթարյանի տարիքով․ նա արդեն 32 տարեկան է, ինչը երիտասարդ չես համարի ֆուտբոլիստի համար։ Չնայած 2016-ի համեմատ ֆուտբոլիստի արժեքը նվազել է, բայց այն ստաբիլ է վերջին տարիների համար։



2-րդ տեղում, ըստ Transfermarkt-ի, Հայաստանի ազգային հավաքականի ու «Հոֆենհայմի» հարձակվող Սարգիս Ադամյանն է՝ 3,5 միլիոն եվրոյով։ Ադամյանի արժեքը թարմացել է այս տարվա փետրվարին և նվազել է նախորդ տարվա մարտի համեմատ, երբ նրա արժեքը 5 միլիոն եվրո էր։ Դա հայ ֆուտբոլիստի երբևէ ամենաբարձր տրանսֆերային արժեքն էր համարվում։



3-րդ տեղում Հայաստանի ազգային հավաքականի և ռուսական «Ռոստովի» կիսապաշտպան Խորեն Բայրամյանն է։ Transfermarkt-ը նրա արժեքը գնահատում է 3 միլիոն եվրո։ Սա նշանակում է, որ Բայրամյանի տրանսֆերային արժեքը բարձրացել է նախորդ՝ 2,8 միլիոն եվրոյի համեմատ։ Ի դեպ, 3 միլիոն եվրոն մեր ֆուտբոլիստի ամենաբարձր տրանսֆերային արժեքն է երբևէ։



Հայաստանի ազգային հավաքականի վերջին խաղերին փայլուն խաղով աչքի ընկած Տիգրան Բարսեղյանը Transfermarkt-ի լավագույն տասնյակի 4-րդ տեղում է։ Նրա արժեքը 1,5 միլիոն եվրոյից բարձրացել է 2 միլիոնի։ Սա ղազախական «Աստանայի» հայ ֆուտբոլիստի համար ամենաբարձր տրանսֆերային արժեքն է, որն այսպիսի խաղով, վստահ ենք, միայն բարձրանալու է։



5-րդ տեղ․ Նորբերտո Բրիասկո Բալեկյան։ Հայաստանի ազգային հավաքականի և արգենտինական «Ատլետիկո Ուրականի» հարձակվող Նորբերտո Բրիասկոյի տրանսֆերային արժեքը ևս բարձրացել է նախկին 475 հազար եվրոյի փոխարեն հասնելով 1,5 միլիոն եվրոյի։ Սա ևս ֆուտբոլիստի ամենաբարձր տրանսֆերային արժեքն է։



Ռուսական «Խիմկիի» հայ ֆուտբոլիստ Արշակ Կորյանի տրանսֆերային արժեքը նույնպես բարձրացել է։ Նախկինում Կորյանը գնահատվում էր 800 հազար եվրո, իսկ վերջին թարմացված տվյալներով Transfermarkt-ը նրա արժեքը հասցրել է 1 միլիոն եվրոյի։



Հայաստանի ազգային հավաքականի և «Աստանայի» մեկ այլ ֆուտբոլիստի՝ Վարազդատ Հարոյանի արժեքը վերջին ժամանակներս կայուն է․ 800 հազար եվրո։ Սա, սակայն, մեր պաշտպանի համար ամենաբարձր տրանսֆերայինարժեքը չէ։ Ամենաբարձրը եղել է 2019-ին, երբ Transfermarkt-ը նրա արժեքը գնահատում էր 1,2 միլիոն եվրո։ Բայց եկեք համաձայնեք, որ Հարոյանը հիանալի խաղեր անցկացրեց հավաքականի կազմում, ինչը կարող է նպաստել նրա տրանսֆերային արժեքի վերանայմանը։



8-րդ տեղում Հայաստանի ազգային հավաքականի նորեկ, ռուսական «Կրասնոդարի» 20-ամյա ֆուտբոլիստ Էդուարդ Սպերցյանն է։ Transfermarkt-ը նրան գնահատում է 650 հազար եվրո՝ նախկին 450 հազարի փոխարեն։ Իսկ Էդուարդի ֆուտբոլային կարիերան դեռ առջևում է։



9-րդ տեղում Հայաստանի հավաքականի արագավազ ֆոտբոլիստ Կամո Հովհաննիսյանն է 600 հազար եվրոյով։ Այս թիվը, սակայն նվազում է Կամոյի համար․ նախկինում նա գնահատվում էր 700 հազար եվրո։ «Կայրաթի» հայ ֆուտբոլիստի համար ամենաբարձր տրանսֆերային արժեքը եղել է 2019-ին, երբ նա գնահատվում էր 1 միլիոն եվրո։



Լավագույն տասնյակը եզրափակում է «Կայսարի» հայ ֆուտբոլիստ Գեղամ Կադիմյանը։ Նրա արժեքը բարձրացել է՝ հասնելով 600 հազար եվրոյի։ Ավելի վաղ նրա արժեքը 450 հազար եվրո էր։ Նույնքան է գնահատվում նաև 21-ամյա Վահան Բիչախչյանի տրանսֆերային արժեքը, որն, անկասկած, դեռ կշարունակի բարձրանալ։



Իսկ Հայաստանի ազգային հավաքականի մյուս նորեկ, ԲԿՄԱ-ի 19-ամյա ֆուտբոլիստ Ժիրայր Շաղոյանը Transfermarkt-ի ներկայացրած արժեքնեով հայ ֆուտբոլիստների 56-րդ հորիզոնականում է․ նա գնահատվում է 175 հազար եվրո՝ նախկին 125 հազարի փոխարեն։

Նշենք նաև վերջերս հավաքական հրավիրված մյուս ֆուտբոլիտների տրասնֆերային արժեքները․

Էդգար Բաբայան– 500 հազար եվրո
Հովհաննես Համբարձումյան – 500 հազար եվրո
Անդրե Չալըշըր – 400 հազար եվրո
Ալեքսանդր Կարապետյան – 300 հազար եվրո
Տարոն Ոսկանյան – 300 հազար եվրո
Դավիդ Յուրչենկո – 250 հազար եվրո
Վբեյմար Անգուլո – 250 հազար եվրո
Սոլոմոն Իմե Ուդո – 250 հազար եվրո
Հակոբ Հակոբյան – 250 հազար եվրո
Կարեն Մուրադյան – 225 հազար եվրո
Արտակ Գրիգորյան– 200 հազար եվրո
Սերոբ Գրիգորյան – 200 հազար եվրո
Արսեն Բեգլարյան – 175 հազար եվրո
Անատոլի Այվազով – 175 հազար եվրո
Հայկ Իշխանյան – 175 հազար եվրո
Արթուր Միրանյան – 125 հազար եվրո