«Այս մարդիկ հետևողականորեն քանդում ու ոչնչացնում են հայկական պետականությունը»․ «Փաստ»

«Փաստ» օրաթերթը գրում է

Նախօրեին հայտարարվեց գերիների վերադարձի մասին: Լուրը հաստատվեց վարչապետի մամուլի խոսնակի մակարդակով: Սակայն հետո պարզվեց, որ Բաքվից Երևան ժամանող ինքնաթիռը դատարկ է: Ավելի ուշ փոխվարչապետի գրասենյակը հայտարարեց, որ գերիների վերադարձը հետաձգվում է: Արցախում ռուսական խաղաղապահ բրիգադի հրամանատար Ռուստամ Մուրադովը երեկ գերիների վերադարձի շուրջ ստեղծվածը որակեց որպես պրովոկացիա՝ նշելով, որ Հայաստանի իշխանությունները մոլորեցնում են ժողովրդին: «Փաստի» հետ զրույցում ադրբեջանագետ Արմինե Ադիբեկյանը տեղի ունեցածը դիտարկեց ավելի գլոբալ խնդրի համատեքստում:

«Հին հայկական ասացվածք կա՝ գողը գողից գողացավ, Աստված տեսավ, զարմացավ: Հիմա ավազակն ավազակին խաբեց, խաբեբան խաբեբային խաբեց: Սա է եղել նախօրեին: Այսինքն, մենք հիմա մի կողմից՝ ականատես ենք հայկական իշխանությունների ապիկարության, անպատասխանատվության և, առհասարակ, անզորության փաստին, մյուս կողմից՝ տեսնում ենք Ադրբեջանի իշխանություններին, որոնք մինչև վերջ շահարկելու են գերիների թեման ու թանկ գին են պահանջելու նրանց համար: Սա է պատկերը, որին մենք ականատես ենք լինում այս ընթացքում: Իրականում ոչ մի նոր բան կամ ոչ մի յուրահատուկ բան տեղի չի ունեցել: Տեղի է ունեցել այն, ինչի մասին նոյեմբերի 9-ից հետո ամիսներ շարունակ խոսվել է»,-նշեց մեր զրուցակիցը:

Անդրադառնալով այն կարծիքներին, որ «գերիներ՝ տարածքների դիմաց» բանաձևի համար հող է նախապատրաստվում՝ Ա. Ադիբեկյանը նշեց. «Դա չի կարելի բացառել ոչ մի դեպքում, որովհետև, ինչպես նշեցի, Ադրբեջանը շատ թանկ գին է պահանջելու գերիների համար, ինչը կարող է նշանակել տարածքային կորուստներ: Թեպետ հիշեցնենք, որ իրենք տարածքային ձեռքբերումներ ունեցան անգամ առանց գերիների վերադարձի: Քարտեզի որ կետին մատը դրեցին, սուս ու փուս, առանց կրակոցի, առանց գերիների վերադարձի ստացան: Ինչ ուզեցին, ստացան ձրի և առանց նախապայմանների: Հետևաբար, նրանք ակնկալում են, որ այդ միտումն ու դիրքորոշումը շարունակվելու է»:

Անդրադառնալով ՀՀ իշխանությունների վարքագծին՝ Ա. Ադիբեկյանը հավելեց. «Ավելի լայն տեսանկյունից՝ մենք ականատես ենք լինում նրան, թե ինչպես են մի խումբ ավազակներ, մի խումբ ապիկար ու տգետ զանգված քանդում հայկական պետականությունը և մեզ զրկում մեր հայրենիքից: Ականատես ենք լինում մի երևույթի, թե ինչպես է այդ զանգվածը մեզ զրկում մեր պետությունն ունենալու իրավունքից: Մնացած բոլոր իրողությունները բխում են այս հիմնարար փաստից: Փողով է, հոգու կանչով է, ապիկարությունից է, անզորությունից է, թե պարզապես ցանկությամբ, բայց այս մարդիկ հետևողականորեն քանդում ու ոչնչացնում են հայկական պետականությունն ու հայկական պետությունը: Հիմա այդ ամենն արտահայտվում է գերիների հարցում, թե տարածքային կորուստների տեսք է ստանում, մի բան պարզ է՝ այն, ինչ տեսնում ենք, վերոնշյալ գլխավոր խնդրի հետևանքն է: Ասեմ ավելին՝ այս ավազակախումբն օգտագործելու է իր ամբողջ ռեսուրսը, որ մնա իշխանության և շարունակի իր սկսած աշխատանքները: Խոսքը հայկական պետությունն ու հայկական ինքնագիտակցությունն ապամոնտաժելու մասին է»:

Անդրադառնալով Ադրբեջանի և Թուրքիայի հերթական զորավարժություններին՝ ադրբեջանագետը նշեց. «Նրանք միշտ տարին մի քանի անգամ զորավարժություններ են անում, ինչը նորություն չէ: Նրանց համար պատերազմը չի ավարտվել: Եթե նրանք ասում են, որ պատերազմն ավարտվել է, դա նրա համար է, որ այս հիմարներին քնեցնեն: Նրանց համար պատերազմը կավարտի այն ժամանակ, երբ Հայաստանի Հանրապետությունը քարտեզից կոչնչանա, և հայերը գնչուների պես կսկսեն թափառել ամբողջ աշխարհով մեկ՝ չունենալով տուն և հենարան: Այն, ինչ պետք է Թուրքիային և Ադրբեջանին, ՀՀ իշխանությունները ջանասիրաբար իրականացնում են: Իրենց բոլոր գործողությունները մեկ նպատակ են հետապնդում, որը չի բխում ո՛չ Հայաստանի, ո՛չ էլ հայ ժողովրդի շահերից»:

Աննա Բադալյան

Մանրամասները՝ «Փաստ» օրաթերթի այսօրվա համարում