ԵԱ. Մրցահարթակ դուրս կգան Գոռ Մինասյանը, Վարազդատ Լալայանն ու Արփինե Դալալյանը

Մոսկվայում ավարտվող ծանրամարտի Եվրոպայի առաջնության վերջին օրը՝ ապրիլի 11-ին Հայաստանը կունենա 3 մասնակից. +87 կգ՝ Արփինե Դալալյանը, օլիմպիական փոխչեմպիոն Գոռ Մինասյանը եւ Վարազդատ Լալայանը  (+109 կգ):

22-ամյա Արփինե Դալալյանը Հայաստանի բազմակի չեմպիոն է սկսած 2015 թվականից: 2016 թվականին Նորվեգիայում անցկացված Եվրոպայի առաջնությունում Արտաշես Ներսիսյանի գլխավորած թիմի կազմում Արփինե Դալալյանը զբաղեցրել է 6-րդ տեղը երկամարտի 213 կգ արդյունքով: Նույն տարում հռչակվել է Հայաստանի երիտասարդական առաջնության հաղթող եւ Թբիլիսիում անցկացված աշխարհի երիտասարդական առաջնությունում բավարարվել 7-րդ տեղով երկամարտի 211 կգ արդյունքով: 2016 թվականին Արփինե Դալալյանը մասնակցել է նաեւ Եվրոպայի պատանեկան առաջնությանը եւ գրավել առաջին տեղը՝ երկամարտի 2013 կգ արդյունքով: Իսկ արդեն աշխարհի պատանեկան առաջնությունում 2016 թվականին +69 կգ քաշայինների պայքարում բրոնզե մեդալակիր է դարձել: 2017 թվականին Տոկիոյում անցկացված աշխարհի երիտասարդական առաջնությունում զբաղեցրել է 4-րդ տեղը 90 կգ քաշայինների պայքարում՝ երկամարտի 234 կգ արդյունքով: 2017 թվականին Ալբանիայում կայացած Եվրոպայի երիտասարդական առաջնությունում Արփինե Դալալյանը նվաճել է չեմպիոնի տիտղոսը +90 կգ քաշայինների պայքարում երկամարտի 228 կգ արդյունքով: 2018 թվականի Հայաստանի չեմպիոնությունից հետո ծանրորդուհին Եվրոպայի երիտասարդական առաջնությունում փոխչեմպիոնի կոչումն է նվաճել 232 կգ երկամարտի արդյունքով: Իսկ մեծահասակների աշխարհի առաջնությունում, Թուրքմենստանում բավարարվել է 18-րդ տեղի արդյունքով:

Բաթումիում անցկացված Եվրոպայի առաջնությունում Դալալյանը +87 կգ քաշային կարգում երկամարտի 240 կգ արդյունքով գրավեց չորրորդ տեղը։ Պոկում վարժությունում Դալալյանը բարձրացրեց 105, հրում վարժությունում՝ 135 կգ։ Մոսկվայում ավարտվող Եվրոպայի առաջնությում կանանց հավաքականի վերջին ներկայացուցիչը հայտավորվել է 230 կգ-ով: 255 կգ-ի հայտ է ներկայացրել Թուրքիայի ներկայացուցիչ Մելիքե Գունալը, 271 կգ՝ Մեծ Բրիտանիայի ներկայացուցիչ Էմիլի Քամբելը։ +87 կգ քաշայինների պայքարը կմեկնարկի Երեւանի ժամանակով 13:50-ին:

+109 կգ քաշայինների պայքարում Հայաստանը կներկայացնեն օլիմպիական փոխչեմպիոն, աշխարհի փոխչեմպիոն Գոռ Մինասյանը եւ Վարազդատ Լալայանը։

26-ամյա Գոռ Մինասյանը Ռիոյի Օլիմպիական խաղերի փոխչեմպիոն է, 2018, 2019 թվականների աշխարհի փոխչեմպիոն, 2017 թվականի Եվրոպայի փոխչեմպիոն, Ունիվերսաիդա-2017-ի հաղթող, 2017 թվականի Եվրոպայի երիտասարդական առաջնության ոսկե մեդալակիր, 2016 Եվրոպայի փոխչեմպիոն, 2015 թվականի աշխարհի առաջնության բրոնզե մեդալակիր, 2013 թվականի աշխարհի երիտասարդական առաջնության փոխչեմպիոն, 2012 թվականի աշխարհի երիտասարդական առաջնության բրոնզե մեդալակիր, Եվրոպայի Մ-20 փոխչեմպիոն:

2019 թվականի Բաթումիի Եվրոպայի առաջնությունում ոտնաթաթի վնասվածքի պատճառով բավարարվեց փոքր բրոնզե մեդալով՝ պոկում վարժությունում բարձրացնելով 200 կգ: Նա երկամարտում 5-րդն էր՝ 422 կգ։ Նույն տարում Թաիլանդում անցկացված աշխարհի առաջնությունում Մինաայանը նվաճեց փոխչեմպիոնի տիտղոսը՝ երկամարտում հավաքելով 460 կգ։ ԱԱ-ից հետո Դոհայում տեղի ունեցած օլիմպիական վարկանիշային մրցաշարում աշխարհի փոխչեմպիոնը ոսկե մեդալ նվաճեց, ապա Բելառուսի Գրոդնո քաղաքում կրկնակի օլիմպիական չեմպիոն Ալեքսանդր Կուռլովիչի հիշատակին նվիրված Alexander Cup 2019 մրցաշարում արծաթե մեդալը նվաճեց երկամարտի 410 կգ (190+220) արդյունքով: Գոռ Մինասյանը 2019 թվականին ընդգրկվել է տարվա լավագույն մարզիկների տասնյակում։

Մոսկվայում ավարտվող Եվրոպայի առաջնությունում Գոռ Մինասյանի նախնական հայտը 450 կգ է։

Նույն՝ 450 կգ-ով է հայտավորվել նաեւ Վարազդատ Լալայանը։ 22-ամյա ծանրորդը 2016 թվականի ծանրամարտի Հայաստանի երիտասարդների չեմպիոն է, Եվրոպայի մինչեւ 17 տարեկանների արծաթե մեդալակիր։ 2016 Մալայզիայում անցկացված ծանրամարտի աշխարհի պատանեկան առաջնությունում երկամարտի 340 կգ (156+184) արդյունքով գրավել է 5-րդ տեղը: 2018 թվականին դարձել է ծանրամարտի Հայաստանի երիտասարդների չեմպիոն։ Նույն տարում ստացել է «Հայաստանի Հանրապետության սպորտի վարպետի» կոչում։

2018 թվականին Լեհաստանում նվաճել է Եվրոպայի երիտասարդական առաջնության փոխչեմպիոնի կոչումը: Մինչեւ 20 տարեկանների առաջնության գերծանր քաշային կարգում (+105 կգ) հայ ծանրորդը երկամարտում գրանցել է 406 կգ (184+222) արդյունք։ 2019 թվականին Ֆիջիում տեղի ունեցած աշխարհի երիտասարդական առաջնությում հռչակվել է չեմպիոն՝ երկամարտի 419 կգ-ով (192+227):

Լալայանը չեմպիոն է դարձել նաեւ 2019 թվականի Եվրոպայի մինչեւ 20 տարեկանների առաջնությունում +109 կգ քաշային կարգում։ Նա 3 կգ-ով գերազանցել  է մինչեւ 20 տարեկանների Եվրոպայի ռեկորդն այս քաշային կարգում՝ երկամարտում հասցնելով 424 կգ-ի։ Պոկում վարժությունում Վարազդատ Լալայանը բարձրացրել է 194 կգ, հրում վարժությունում՝ 230 կգ։ Երկու վարժություններում էլ նա բարելավել է այս տարիքային խմբի Եվրոպայի ռեկորդները։ 2021 թվականի Հայաստանի առաջնությունում Լալայանը 430 կգ-ով գրավել է երրորդ տեղը։

Մոսկվայում ավարտին մոտեցող Եվրոպայի առաջնության գերծանր քաշայինների պայքարում ոսկե մեդալի հիմնական հավակնորդը վրացի Լաշա Տալախաձեն է, ով նախնական հայտավորվել է 470 կգ-ով: Տալախաձեն Մինասյանի հիմնական մրցակիցն է։ +109 կգ քաշայինների Ա խմբի պայքարը կմեկնարկի Երեւանի ժամանակով 16:50-ին:

Հիշեցնենք, որ Մոսկվայում Հայաստանի ներկայացուցիչներից Եվրոպայի չեմպիոնի կոչումը նվաճել են Կարեն Ավագյանը (89 կգ) և Սամվել Գասպարյանը (102 կգ), Արսեն Մարտիրոսյանը (102 կգ) դարձել է Եվրոպայի փոխչեմպիոն, իսկ Անդրանիկ Կարապետյանը (89 կգ), Հակոբ Մկրտչյանը (96 կգ) և Լիանա Գյուրջյանը (81 կգ) նվաճել են բրոնզե մեդալ: Իզաբելլա Յայլյանը (55 կգ) և Ռաֆիկ Հարությունյանը (81 կգ) գրավել են չորրորդ տեղը, իսկ Դավիթ Հովհաննիսյանը (96 կգ) և օլիմպիական փոխչեմպիոն Սիմոն Մարտիրոսյանը (109 կգ) զրո են ստացել հրում վարժությունում։