Ռուսաստանի ԱԳՆ-ն պաշտոնական հայտարարություն տարածեց հայ-ադրբեջանական սահմանի վերաբերյալ
POLITICSՌուսաստանն ուշադիր հետևում է հայ-ադրբեջանական սահմանին տիրող իրավիճակին ու օպերատիվ կապ է պահպանում զինվորականների ու սահմանապահների գծով: Այս մասին ասված է ՌԴ ԱԳՆ հայտարարության մեջ:
«Շարունակում ենք ուշադիր հետևել իրավիճակին՝ կապված Հայաստանի ու Ադրբեջանի սահմանին տեղի ունեցած միջադեպի հետ: Ռուսական կողմն աջակցում է Հայաստանին ու Ադրբեջանին լարվածությունը թուլացնելու հարցում՝ դա անելով բարձրագույն ու բարձր մակարդակներում պարբերական շփումների միջոցով: Օպերատիվ կապ է պահպանվում զինվորականների ու մեր երկրի սահմանապահ ծառայության գծով»,-ասված է մեկնաբանության մեջ:
Մոսկվան հայտնում է, որ հակամարտության լուծումը տեսնում է սահմանի դելիմիտացիայի գործընթացի մեկնարկման, ապա դրա դեմարկացիայի մեջ. «Ելնում ենք նրանից, որ բոլոր նմանատիպ միջադեպերը պետք է լուծվեն բացառապես խաղաղ միջոցներով, բանակցությունների ճանապարհով: Ռուսական կողմը պատրաստ է այսուհետ ևս աջակցություն տրամադրել Հարավային Կովկասում իրավիճակի կարգավորմանը»:
ՌԴ ԱԳՆ-ում նաև նշել են, որ պետք է խստորեն հետևել հրադադարի ռեժիմի պահպանմանը, ինչպես նաև անշեղորեն կատարել 2020 թվականի նոյեմբերի 9-ի ու 2021 թվականի հունվարի 11-ի հայտարարությունները: