Պոկեր՝ պարզապես ժամա՞նց, թե՞ մոլախաղ. «Փաստ»

«Փաստ» օրաթերթը գրում է

Պոկերը թղթախաղի տեսակ է, որը լայն տարածում է գտել հասարակության շրջանում համեմատաբար վերջերս, չնայած իսկական երկրպագուները դրան ծանոթ էին վաղուց: Պոկերի պատմությունը սկիզբ է առել հին ժամանակներից, բայց դրա ծագման ստույգ տեղը և ժամանակը դեռ անհայտ է: Վստահաբար կարելի է ասել, որ այդ խաղի մասին առաջին գրավոր հիշատակումները հայտնվել են 16-րդ դարում: Պոկեր սիրել են խաղալ Ֆրանսիայում, Անգլիայում, Գերմանիայում և Արևմտյան Եվրոպայի այլ զարգացած երկրներում, իսկ պոկերի նախատիպերը եղել են հին թղթախաղերի որոշ տեսակներ: Ի սկզբանե այդ խաղը բավականին պարզ է եղել և շատ քիչ կանոններ է ունեցել: Խաղացողը ստացել է երեք խաղաքարտ, խաղադրույքներ են կատարվել, շահել է խաղաքարտերի ավելի մեծ համադրություն ունեցողը: Եղել են միայն երեք համադրություններ՝ «ֆլեշ», «զույգ», «եռյակ»:

Հետագայում ժամանակը շատ առումներով խաղը փոխել է: Հայտնվել է «բլեֆ»-ի հասկացությունը, որը պոկերում հակառակորդի՝ իրավիճակի կեղծ ընկալում ստեղծելու ունակությունն է: Հայտնվել են նաև նոր համադրություններ՝ «կարե», «ֆուլ հաուս» և այլն: Խաղի անունը, հնարավոր է, եկել է գերմանական pochen բառից, որը նշանակում է թակոց, կամ էլ ֆրանսիական poque բառից: Կա նաև ամերիկյան տարբերակ, որը կապված է նավաստիների հետ: Այն ժամանակ որոշ մարդիկ պոկերը համարում էին խաբեբաների խաղ, քանի որ դրա հիմքում ընկած էին բլեֆներն ու խաղաքարտերով հնարքները, որոնք նավաստիները սովորում էին գրպանահատներից: Գրպանահատներից մեկը անցորդներին ցույց էր տալիս թղթախաղային հնարքներ, իսկ մյուսը հանում էր դրամապանակը: Այդ ամենը կոչվում էր «poke»: Պոկերի առաջացման բազմաթիվ վարկածներ կան, բայց հարկ է նշել, որ, ամենայն հավանականությամբ, պոկերը ԱՄՆ են հասցրել ֆրանսիացիները, որոնք իրենց գաղութները ստեղծել էին Լուիզիանայի տարածքում, և այնտեղից շուտով խաղը տարածվել է ամբողջ Ամերիկայում:

Այդ ժամանակներից ի վեր պոկերը լրացվել է կանոններով և որոշ փոփոխություններով, բայց հիմնական սկզբունքը մնացել է անփոփոխ. խաղը բաղկացած է կոմբինացիաներից, խաղադրույքներից, բլեֆներից, և խաղում են 52 խաղաքարտային դասուկով: Ամերիկայում այն խաղալը դարձել է ազգային զվարճանք: Բոլորը՝ երեխաները, դեռահասները և մեծահասակները, սիրում են խաղալ: Փոփոխված ձևով պոկերը Ամերիկայից կրկին վերադարձել է Եվրոպա 1870 թվականին, երբ Անգլիայում ԱՄՆ-ի դեսպան, գնդապետ Ջեյքոբ Շենկը բերել է խաղի ժամանակակից տարբերակը և ցույց տվել այն արքունիքում, իսկ կանոնները տպագրվել են Վիկտորիա թագուհու համար, քանի որ նա զգալի հետաքրքրություն ուներ թղթախաղերի նկատմամբ ... Պոկերն էլ ավելի լայն տարածում է գտել Առաջին համաշխարհային պատերազմի տարիներին, երբ ամերիկացի զինվորները եվրոպացիներին սովորեցրել են խաղի իրենց տարբերակը: Պոկերի պատմությունը ԱՄՆ-ում ևս շարունակել է զարգանալ, հայտնվել են այդ խաղի բազմաթիվ տարատեսակներ:

Պոկերի ամենահայտնի տարատեսակը՝ Texas Holdem-ը, հայտնվել է Տեխաս նահանգում: Խաղը հասել է Դալլաս, իսկ հետագայում՝ Լաս Վեգասի բոլոր խաղատներ: Պոկերի առաջին լուրջ մրցույթը տեղի է ունեցել 1968 թվականին և կազմակերպվել է Թոմ Մուրի կողմից: 1970 թվականին կայացել է պոկերի աշխարհի առաջին պաշտոնական առաջնությունը: Դրանից հետո նման մրցույթներ սկսել են կազմակերպվել ամեն տարի: Ներկայումս էլ հանրաճանաչ խաղի զարգացումը շարունակվում է, համացանցի դարաշրջանը պոկերին նոր մակարդակի է հասցրել: Այժմ այն կարելի է համացանցով խաղալ աշխարհի այլ խաղացողների հետ: Այդ խաղը հնարավորություն է տալիս զգալ ադրենալինը, իսկ մոլախաղերի սիրահարների համար պոկերը պարզապես ամեն ինչ է:

Կամո Խաչիկյան

Մանրամասները՝ «Փաստ» օրաթերթի այսօրվա համարում