Մանրամասներ՝ «Նովելլա Հոլի» վթարից. վարորդներից մեկը հայտնի բռնցքամարտիկի որդի է
SOCIETYՃՈ ճանապարհատրանսպորտային պատահարների գործերով հետաքննության և վարչական վարույթի իրականացման բաժանմունքի պետ Գրիգոր Ավետիսյանի որոշմամբ հետաքննչական խմբի ղեկավար նշանակված, նույն բաժանմունքի ավագ հետաքննիչ Վարդան Բաբաջանյանի կողմից նյութերի նախապատրաստման ընթացքում պարզվել է մայիսի 27-ին Երևանում՝ ոստիկանության Երևան քաղաքի վարչության դիմաց, «Նովելլա Հոլ»-ի մոտ խոշոր ավտովթարի հետևանքով հիվանդանոց տեղափոխված վիրավորների և վարորդների ինքնությունը, գրում է shamshyan.com-ը:
Ըստ աղբյուրի՝ «Ford»-ը վարել է Երևանի բնակիչ, 60-ամյա Ռաֆիկ Իշխանյանը, «Opel»-ը վարել է Երևանի բնակիչ, 32-ամյա Սմբատ Քոչարյանը, «Hyundai»-ն վարել է Երևանի բնակիչ, 57-ամյա Հովհաննես Շահնազարյանը, իսկ «BMW»-ն վարել է Երևանի բնակիչ, 29-ամյա Սարգիս Խաչատրյանը:
Վթարի հետևանքով վնասվել է նաև Երևանի բնակիչ, 36-ամյա Արմեն Սարգսյանին պատկանող ու կայանված «Dodge» մակնիշի ավտոմեքենան:
Վթարի հետևանքով Հ. Շահնազարյանը, նրա ուղևոր, Երևանի բնակիչ, 30-ամյա Անի Բաբայանը, վարորդներ Ս. Քոչարյանը և Ս. Ղազարյանը մարմնական վնասվածքներով տեղափոխվել են թիվ 1 Համալսարանական հիվանդանոց: Մյուս անձինք հիվանդանոցում բժշկական օգնություն են ստացել, այնուհետև հրաժարվել են հետագա բուժօգնությունից:
Ըստ աղբյուրի՝ «Ford»-ի վարորդ Ս. Քոչարյանը ծառայում է ՀՀ ՊՆ N զորամասում, իսկ BMW-ի վարորդ Ս. Խաչատրյանը հայտնի բռնցքամարտիկ, ԽՍՀՄ հնգակի չեմպիոն, Եվրոպայի նախկին չեմպիոն Սամսոն Խաչատրյանի որդին է:
Երեք վարորդները հիվանդանոցում ենթարկվել են սթափության փորձաքննության, պարզվել է, որ նրանք եղել են սթափ, իսկ Ս. Ղազարյանի սթափությունը պարզելու նպատակով հետաքննիչի հանձնարարականով արյան նմուշ է վերցվել:
Ավելի վաղ աղբյուրը հայտնել էր, որ մայիսի 27-ին խոշոր ավտովթար էր տեղի ունեցել Երևանում: Ժամը 22:00-ի սահմանում ոստիկանության Երևան քաղաքի վարչության դիմաց՝ «Նովելլա Հոլլ»-ի մոտ, բախվել էին 4 ավտոմեքենաներ, ինչի հետևանքով մեքենաներից մեկը կողաշրջվել էր, իսկ 5 հոգի տարբեր աստիճանի մարմնական վնասվածքներով հոսպիտալացվել էին: