«Թշնամանքը ճանապարհ է դեպի կործանում, մեր միջից պետք է հանենք ատելությունը»․ «Փաստ»

«Փաստ» օրաթերթը գրում է

Խորհրդարանական ընտրությունների արդյունքները, հավանաբար, կվիճարկվեն, տեղի կունենան վերահաշվարկներ, գուցե նաև լինի ԱԺ անցած ու չանցած քաղաքական ուժերի «վստահության» տոկոսների որոշ փոփոխություն: Վստահաբար ասել, որ կփոխվի ընտրությունների արդյունքների ընդհանուր պատկերը, բարդ է: Ամեն դեպքում, ինչպես այս օրերին հաճախ են ասում, ունենք այն, ինչ ունենք: Նկատելի է, որ հասարակության մեջ կան անհատներ, որոնք շարունակում են մեղադրել իրար ընտրությունների նման արդյունքի համար, ակնհայտ է, սակայն, որ արդեն իսկ մարդկանց գերլարված հույզերի պոռթկման պարագայում որևէ դրական բան ակնկալել չենք կարող: Կան մարդիկ, որոնք հուսահատվել են, ոմանք ակնարկում են արտագաղթելու մասին, մյուսներն էլ պլանավորում են մեր երկրում երկարաժամկետ անելիքների ուղեգիծը: Համահայկական գրողների միության նախագահ, գրականագետ Աբգար Ափինյանը նշում է՝ հուսահատությունը ելք չէ:

«Ճիշտ է՝ ընտրությունների արդյունքները սոսկալի էին, անհավատալի, բայց դրան որոշակի բացատրություն կարող է տրվել: Մեր մտավորականների խորհրդում ամեն շաբաթ նիստեր ենք կազմակերպել, քննարկել այդ հարցերը: Դեմ էինք այս ընտրություններին, քանի որ վստահաբար այն կարծիքն ունեինք, որ կապիտուլ յանտի հետ ընտրապայքարի մեջ մտնել ոչ մի դեպքում չի կարելի: Սա մեր տեսակետն էր, բայց, ցավոք, այսօր մեր քաղաքական ուժերը մեր մտավորականների ձայնը չեն լսում կամ գուցե չեն հասկանում: Ամեն դեպքում այդ կոնտակտը չկա: Արդյունքում տեղի ունեցան ընտրություններ՝ մեր ցավին ավելացնելով ևս մեկը: Հիմա արդեն աջ ու ձախ բոլորը բոլորին մեղադրում են: Սկսում են մեղադրել ժողովրդին, սկսում են մեղադրել սյունեցիներին, գյումրեցիներին և բոլորին: Սա շատ սխալ ընթացք է, որը պետք է կասեցնել, որովհետև վստահաբար պետք է ասեմ, որ ժողովուրդն այս ամենի մեջ ոչ մի մեղք չունի:

Տարիներ շարունակ մեր հեռուստատեսությամբ, մեր պետական-մշակութային քաղաքականությամբ մեր ժողովրդից «խլել» ենք մեր Հովհաննես Շիրազին, Րաֆֆուն, Հովհաննես Թումանյանին: Մեր մշակույթի մեծերը, որոնք սնուցել են հայի հոգին, չեն եղել ժամանակակից հայի տեսադաշտում: Անընդհատ պրոպագանդվել է լավ կյանքն արտասահմանում, փողը, դրամը: Տասնյակ տարիներ ժողովրդին քարոզել դրամասիրություն, իսկ ժողովրդի աչքերի առջև չլինի Աստված. սա եղել է Հայաստանի կյանքը: Մենք պայքարել ենք դրա դեմ: Ինքս մշտապես պայքարի մեջ եմ եղել»,-«Փաստի» հետ զրույցում ասում է Ափինյանը:

Ընդգծում է՝ տարին տարվա վրա սոսկալի փոփոխություններ տեղի ունեցան հանրության մեջ: «Վերջին մի քանի տարվա ընթացքում մտավորականների մեր խորհուրդը զբաղված էր կասեցնելու այն սոսկալի արշավանքը, որն ուղղված էր Րաֆֆու դեմ: Նրա «Սամվել» վեպն էր հարվածի տակ հայտնվել: Մենք հասկանում էինք, թե այս շարժումն ուր էր տանելու: Հասարակության մեջ սկսեցին տիրապետել անհայրենիք մարդկանց գաղափարախոսությունն ու հայրենիքը դավաճանելու և ուրանալու հակումները»,-նշում է մեր զրուցակիցը:

Գրականագետն ընդգծում է՝ այսօր պետք է վերադառնանք մեր ակունքներին: «Դեմքով շրջվենք դեպի գյուղը, հողը: Մարդկանց կրկին դաստիարակենք այն արժեքներով, որոնցով մենք դարեր շարունակ պահել ենք մեր հող հայրենին: Մեր փրկօղակը միայն ու միայն կրթությունը պետք է լինի: Ես դրան հավատում եմ: Մտավորականների մեր խորհուրդն այժմ աշխատում է այդ ուղղությամբ»,-ասում է գրականագետը: Կարծում է, որ այսօր և միշտ մտավորականների ձայնը պետք է լսելի դարձնել, այն պետք է բարձր հնչի: «Մեր ժողովրդի առջև նորից պետք է դնենք մեր դասական բարձր արժեքները՝ հայ երաժշտությունը, գրականությունը, այդ թվում՝ ժամանակակից գրականությունը: Կրթական լուրջ աշխատանք պետք է տանել: Ես ատելության քարոզին մշտապես դեմ եմ եղել, բայց կարծում եմ, որ այս ողբերգության հիմնական պատճառը տգետ հայերի բազմանալն էր: Հայ մարդը, որը միշտ ապրել է, միշտ հաղթել է իր մշակույթին հենված, նրա գլխավոր հենարանը՝ հայ մշակույթը, իր թևի տակից հանեցին»,-նշում է մեր զրուցակիցը:

Հավելում է, որ հասարակությունը պետք է խաղաղվի, նրա անդամները պետք է դադարեն իրար վիրավորել ու նեղացնել, քանի որ սա ոչ մի տեղ տանող ճանապարհ է:«Թշնամանքը ճանապարհ է դեպի կործանում, ես վստահ պնդում եմ, որ ատելության քարոզը, փոխադարձ վիրավորանքի այս մթնոլորտը ոչ միայն պետությանը, այլ նաև ազգին տանելու է դեպի կործանում: Ահա թե ինչու անցյալը փակում ենք, դնում մի կողմ՝ ընդունելով մեր թույլ տված սխալները: Ամեն ինչի մեջ պետք է դնենք ազգայինի սերը, փոխադարձ հարգանքը, ամեն հարց կարող ենք քննարկել, բայց ատելությունը մեր միջից պետք է հանենք: Գոնե մենք պետք է հանենք, իսկ ընթացքում կտեսնենք, թե ովքեր են շարունակում ատելության քարոզը»,-եզրափակում է Աբգար Ափինյանը:

Մանրամասները՝ «Փաստ» օրաթերթի այսօրվա համարում