Հակոբ Հակոբյանի 33-ամյակի խնջույքը, հայտնի հյուրերն ու տորթի ընտրությունը

LIFE 24 June, 2021 15:32

Երգիչ Հակոբ Հակոբյանը երեկ դարձել է 33 տարեկան, ինչի առթիվ կազմակերպված խնջույքին ներկա է եղել նաև Tert.am Life-ը: Լուսանկարել ենք երեկոյի հետաքրքիր դերվագներն ու զրուցել Հակոբի հետ:

Ըստ Հակոբի՝ թույլ չի տվել, որ ընկերները կեսգիշերին հատուկ անակնկալ անեն: «Աշխատանքի վայրում էի, բայց ընեկերներս տորթով, մոմերով շնորհավորեցին: Նախկինում կեսգիշերի անակնկալները շատ էի սիրում, բայց գնալով ձանձրացա: Անկեղծ ասած, ծննդյանս օրվա նախորդ օրն եմ որոշել, որ պետք է նշեմ օրը: Բոլորը սպասում էին, որ նախորդ տարվա պես պետք է Սևան գնայինք, բայց արևն ուժգին էր, կարող էինք մեզ վատ զգալ: Որոշեցի փակ տեղում նշել ծննդյանս օրը»,- պատմեց նա:

Երեկոյին ներկա են եղել երգիչ Արմեն Հովհաննիսյանը, դերասանուհի Տաթևիկ Ադումյանը, հաղորդավար Հրաչ Մուրադյանը, դերասան Թելման Խաչատրյանը, երգչուհիներ Նարե Գևորգյանը, Ալինա Մարտիրոսյանը, Նարե Գրիգորյանը, Իրինա Հարությունյանը և այլք: Երգչի խոսքով՝ երեկ հավաքվել են ընկերական շրջապատով, առհասարակ իր կյանքում ընկերները մեծ տեղ ունեն:

«Երեկ ներկա էին իմ սիրելի մարդկանցից շատերը: Բոլորը չկային, որովհետև մի մասը երկրում չէր, մի մասը զբաղվածություն ուներ, ընկերներիցս Հրաչուհի Ութմազյանը ներկա չէր, որովհետև կորոնավիրուսի պատճառով հավաքույթների չի գնում: Շատ լավ մարդիկ կային, որոնք երեկ ներկա չէին: Մեկ առաջ էի ասել, որ նշում եմ օրը, շնորհակալ եմ բոլոր նրանց, ովքեր եկան,- ասաց նա և հավելեց, որ ծննդյան տորթը հատուկ չէր ընտրել,- Գնացի խանութ ու ուղղակի գնեցի տորթը»:

Հակոբը նկատեց, որ այս տարի նպատակները թե՛ անձնական կյանքի, թե՛ գործնականի հետ են կապված: «Երկուսն էլ շատ եմ ուզում, երկուսն էլ կարևոր են: Գործնական կյանքում շատ կարևոր անելիքներ ունեմ, անձնական կյանքում էլ կարևոր բաց կա: Այդ բացը պետք է լրացնեմ, որովհետև հոգեպես պատրաստ եմ դրան»,- նշեց նա:

Երգիչն ընդգծեց, որ իր կյանքում ոչինչ հեշ՛տ չի տրվել, միշտ դժվարությունների միջով է անցել, հաճախ չի էլ ընկալել, որ տանջվում է: «Իմացել եմ, թե հանուն ինչի եմ բարդությունների միջով անցնում, սրտանց եմ արել: Իմ նպատակներն արագ, հեշտ չեն կատարվում, բայց կատարվում են: Ես կոտրվող տեսակ չեմ, ինձ դժվար է կոտրել: Կարողանում եմ ինքս ինձ հանել բարդ իրավիճակներից, ստացվում է: Գիտեմ, որ եթե այդ օրը տագնապային է, հաջորդ օրը լավն է լինելու: Իմ երաժշտական ճանապարհին այնքան շատ են երջանիկ էմոցիաները, դրանք ինձ պահում են: Կարող եմ դուրս գալ փողոց, մարդիկ տեսնեն, ճանաչեն, լուսանկարվեն, ես էլ դրանից լիցքավորվեմ»,- ասաց նա:

Հակոբն այս տարի դարձել է 33 տարեկան: Նշեց, որ միշտ է ասել՝ տարիքը մարդուն չի փոխում, հիմա այլ կարծիք ունի: «30-ից հետո իմ կյանքում շատ բան փոխվեց: Ամեն տարիք մարդու վրա որոշակի ազդեցություն է ունենում, սկսել եմ մարդկանց, հարցերին, իրադարձություններին այլ կերպ նայել: Ժամանակն ու տարիները մեզ ուղղորդում են: Հիմա կյանքն ավելի խորքային եմ ընկալում, բայց դա իմ կյանքը չի բարդացնում: Եթե գիտեմ դիմացինս ով է, գիտեմ նաև նրա բացասական ու դրական կողմերի մասին, նույնիսկ եթե իմ հանդեպ վատ քայլ անի, չեմ նեղսրտի: Կարելի է ասել, որ մարդկանց արդեն ճանաչում եմ»,- եզրափակեց նա: