«Սիրելիս ասաց՝ «կլինի՞ ոչինչ չասեմ»». Լիանա Հակոբյանը՝ մազերը վառ դեղին ներկելու, սիրելիի արձագանքի և 9-րդ դասարանում շիկահեր դառնալու մասին

LIFE 2 July, 2021 15:35

Դերասանուհի Լիանա Հակոբյանը, որը հեռուստադիտողներին հայտնի է «Ոսկե դպրոց» և «Դեպի ճամբար» նախագծերից, երեկ ոճափոխություն է արել և մազերը ներկել դեղին գույնով: Tert.am Life-ի հետ զրույցում նա պատմել է ոճափոխության և սիրելիի արձագանքի մասին:

Լիանայի խոսքով՝ մոտ մեկուկես ամիս է՝ մազերը դեղին ներկելու ցանկություն ուներ: «Անկեղծ ասած, կարմիր, վարդագույն գույները մազերի վրա չեմ սիրում, դեղին գույնը արտասահմանյան մոդելներից մեկի մոտ եմ տեսել: Վաղուց մազերս փոփոխելու ցանկություն ունեի, մանավանդ՝ 26 կգ նիհարելուց հետո: Վարսահարդարիս ասել էի այդ մասին, բայց միանգամից չկարողացանք ներկել, քանի որ դեղինը տարածված գույն չէ, այդ պահին չուներ: Նա ասաց, որ մազերը դեղինով ներկելու ցանկություն դեռ ոչ ոք չէր ունեցել։ Ավելի ոգևորվեցի, երբ իմացա, որ դեղին գույնով ներկելու մասին դեռ միայն ես եմ ասել»,- պատմեց Լիանան:

Ըստ դերասանուհու՝ դեղին գույնը ռիսկային էր, բայց դա միայն ներկելու ընթացքում է հասկացել: «Չէի պատկերացնում, որ այդքան դեղին է լինելու, մտածում էի՝ թեթև է երևալու, բայց ընթացքում հասկացա՝ վառ դեղին է ստացվել: Նույնիսկ լուսանկարներով այնքան վառ չի երևում, որքան իրականում է: Երբ ինձ առաջին անգամ հայելու մեջ նայեցի, շատ հավանեցի, ասացի՝ այն էր, ինչ ուզում էի, նույնիսկ իմ սպասածից ավելին: Գուցե որոշ ժամանակ անց մազերս մեկ այլ վառ գույնով ներկեմ: Ամառ է, տաք է, ինչ-որ բաներ փոփոխելու իսկական ժամանակն է»,- ասաց նա:

Լիանան նկատեց, որ կարևոր է, երբ արտաքին փոփոխություններից հետո ներքին փոփոխությունների ես հանգում: «Իմ կյանքը հիմա եռում է, շուտով ծննդյանս օրն է, դառնալու եմ 24 տարեկան: Հետաքրքիր է՝ մեծ եմ, բայց ինձ այսքան փոքր երբեք չեմ զգացել: 20-21 տարեկանում ինձ ավելի մեծ էի զգում, քան հիմա, այն ժամանակ ամեն ինչ ավելի լուրջ էր, հասուն: Հիմա հասկանում եմ՝ կյանքը վայելելու ժամանակն է, հասել եմ այն ամենին, ինչ ցանկացել եմ: Քաշի կորուստն իմ կյանքում մեծ ձեռքբերում է, սիրելիս՝ ևս: Ներքին ուրախությունս արտահայտում եմ մազերիս միջոցով»,- նշեց նա:

Հարցին, թե ինչպե՞ս է սիրելին արձագանքել մազերի վառ գույնին, Լիանան պատասխանեց. «Սիրելիիս վաղուց ասել էի, որ ուզում եմ մազերս դեղինով ներկել՝ չնայած նա կողմ չէ գունավոր ներկերին: Երբ ասացի, որ ներկը բերել են, պետք է ներկեմ, դեռ չէր գիտակցում, թե ինչ վառ դեղինի մասին է խոսքը: Ներկեցի, լուսանկարներն ուղարկեցի, սիրելիս ասաց՝ «կլինի՞ ոչինչ չասեմ»: Կարծում եմ, երբ ինձ երջանիկ, բավարարված է տեսնում, ուրախանում ինձ հետ: Իր համար ամենակարևորը դա է»,- ընդգծեց Լիանան:

Դերասանուհին վերհիշեց, որ տարիներ առաջ՝ 9-րդ դասարանում մազերը ներկել է, շիկահեր դարձել: «Վերջին զանգի օրն այդպես գնացի դպրոց: Ուսուցիչները, աշակերտները շոկի մեջ էին, այդ ժամանակ դա ռիսկային քայլ էր: Ժամանակները փոխվել են, մարդկանց հայացքները՝ ևս, հիմա դա ռիսկային քայլ չեմ կարող համարել»,- ասաց նա:

Լիանան նաև շեշտեց, որ իրեն ռիսկային մարդ չի համարում: «Փոփոխություններից առաջ մտածում եմ արածիս հետևանքների մասին: Մազերը ներկելը ռիսկային քայլ չեմ համարում, որովհետև ամեն պահի կարող ես գույնը փոխել: Գլոբալ հարցերը միշտ քննարկում եմ սիրելիիս հետ, երկար մտածում, նոր որոշումներ կայացնում»,- եզրափակեց դերասանուհին: