«Հաճախ Արտյոմի վերանաշապիկներն եմ հագնում». Յուլյա Ֆինկը՝ իր 5 ամենաոճային կերպարների մասին

LIFE 19 July, 2021 16:32

Դերասանուհի Յուլյա Ֆինկն այս շրջանում հեռուստատեսային զբաղվածություն չունի, ժամանակի մեծ մասը երեխաներին է հատկացնում: Երկվորյակ տղաների մայրիկը, սակայն, չի մոռանում նորաձևության մասին և հասցնում է ներկայանալ ոճային, հետաքրքիր համադրություններով։

Tert.am Life-ի հետ զրույցում Յուլյան առանձնացրել է իր 5 ամենաոճային կերպարները:

Առաջին կերպար

Սիրում եմ արևելյան և «բոխո» ոճերը: Առաջին կերպարը Վիգեն Մնոյանի ֆոտոշարքինն է: Այդտեղ «բոխո» ոճով եմ, միշտ ցանկացել եմ այդ ոճով ֆոտոշարք ունենալ: Սև զգեստով, խոշոր աքսեսուարներով, բարձրակրունկներով եմ: Այս դեպքում ոճս բարդ չեմ ընտրել, ի սկզբանե էի որոշել: Բարդ եմ ընտրում, երբ մի քանի ոճով պետք է ներկայանամ, մտածում եմ՝ նորաձև, բայց չկրկնվող լինելու մասին: Լինում է, ինչ-որ բան նորաձև է, արդեն տարածված է դարձել, բայց կին ես, հավանում ես ու ուզում հագնել: Ստիպված կամ հետ ես մնում թրենդից՝ չես հագնում, կամ էլ փորձում ես այնպես մատուցել, որ տարբերվես: Սիրում եմ կանացի կերպարներ՝ չնայած հիմա հաճախ Արտյոմի վերանաշապիկներն եմ հագնում, ուղղակի փորձում եմ կանացի մատուցել: Արտյոմը դեմ չէ, սիրում է այդ ոճը:

Երկրորդ կերպար

Լայնեզր գլխարկներ շատ եմ սիրում, երկրորդ կերպարում նման գլխարկով, «լեոպարդ» պրինտով վերարկուով, ջինսե վերանաշապիկով և տաբատով, զինվորական ոճի կոշիկներով եմ: «Լեոպարդ» պրինտով վերարկուն բարդ է համադրել՝ չնայած սիրում եմ: Պետք է այնպես համադրես, որ կոտրես, կերպարում իշխող չլինի: Այս դեպքում վերարկուն կոտրել եմ ջինսե վերնաշապիկով և տաբատով, պրինտը դոմինանտ չէ:

Երրորդ կերպար

Երրորդ կերպարում երեկոյան զգեստով եմ, մեր ընկերներից մեկի հարսանիքին: Այդ զգեստս 5-6 տարվա վաղեմության է, բայց մինչ այսօր դրանից չեմ հրաժարվում: Զգեստի հետ կապված այնքան արձագանքներ եմ ստացել: Այն անընդհատ ձևափոխում եմ, մինչ այսօր հագնում եմ: Առհասարակ, երեկոյան զգեստները բարդ եմ ընտրում, չեմ գնում, մտավախություն ունեմ, որ գնված զգեստը կարող եմ ինչ-որ ուրիշ մեկի հագին տեսնել: Փորձում եմ երեկոյան զգեստները կարել, որ հետաքրքիր, յուրահատուկ ստացվեն: Շատ շքեղ զգեստների սիրահար չեմ:

Չորրորդ կերպար

Մյուս կերպարում կարմիր, լայն տաբատով և գծավոր՝ ծովային պրինտով բլուզով եմ: Լայն տաբատներ շատ եմ սիրում, այս կերպարն էլ բացառություն չէ: Ծովային պրինտն ավելի շատ ծովային, միջոցառումների համար է, բայց փորձել եմ ավելի քաղաքային կերպար ստեղծել: Կարմիր հագուստ գրեթե չունեմ, վառ գույներ շատ չեմ հագնում, որովհետև ինձ չեն սազում: Միշտ ասում են, որ կարմիրն ինձ սազում է, բայց ես ամբողջովին կարմիր հագնվել չեմ սիրում: Այդ գույնն ավելի շատ աքսեսուարների մեջ եմ սիրում, բայց կոնկրետ լուսանկարի տաբատը երկար ժամանակ հագել եմ:

Հինգերորդ կերպար

Ընտրածս վերջին կերպարում սև կիսատաբատով, սպորտային կոշիկներով եմ: Դա վերջին շրջանի իմ ոճն է, երեխաների հետ փորձում եմ թեթև, հարմարավետ հագնվել: Ընտրել եմ դեղին պայուսակ, որը ևս շատ թրենդային է: Երկար ժամանակ ինձ զսպում էի, չէի գնում, բայց հասկացա՝ թրենդը կանցնի, չեմ կարողանա օգտագործել ու գնեցի: