Օտարման ու առքուվաճառքի ամենաբարձր ցուցանիշն է արձանագրվել. «Փաստ»

«Փաստ» օրաթերթը գրում է

2021 թվականի առաջին կիսամյակում Հայաստանում, ընդհանուր առմամբ, անշարժ գույքի 91 157 գործարք է կատարվել: Այս մասին տեղեկանում ենք Կադաստրի պետական կոմիտեի հրապարակած տվյալներից, որոնք վերաբերում են 2021 թ. առաջին կիսամյակում անշարժ գույքի շուկայում արձանագրված ցուցանիշներին: 2020 թ.առաջին կիսամյակի համեմատ գործարքների ցուցանիշը 2021 թ. նույն ժամանակահատվածում ավելացել են 27,5 տոկոսով: ՀՀ-ում 2021 թ. նշված ժամանակահատվածում գործարքների առավել բարձր՝ 36,7 տոկոսը, գրանցվել է օտարման, ամենացածր՝ 1,9 %-ը՝ օրինականացման գործարքների նկատմամբ:

Գրավադրման գործարքները 100 տոկոսանոց սանդղակում կազմել են 12,5 տոկոս: Վարձակալության գործարքներն այդ սանդղակում կազմել են 6,1, իսկ առաջնային գրանցման գործարքները համեմատաբար բարձր՝ 16,8 % են կազմել: Միևնույն ժամանակ նկատենք, որ օտարման գործարքները 2020 թ. առաջին կիսամյակի համեմատ 2021 թ. նույն ժամանակահատվածում ավելացել են 25 %-ով: Մասնավորապես, առքուվաճառքի գործարքներն ավելացել են 24,9 %-ով: Նվազում կա փոխանակման գործարքների պարագայում: Նախորդ տարվա առաջին կիսամյակի համեմատ նշված տեսակի գործարքները 18,6 տոկոսով նվազել են: Վարձակալության գործարքները նվազել են 1 տոկոսով, իսկ գրավադրման գործարքներն ավելացել են 14,1%-ով:

Ժառանգության դեպքում՝ շուրջ 50, օրինականացման գործարքների պարագայում 68,5 տոկոս աճ կա: Վիճակագրությունը փաստում է, որ 2021 թ. առաջին կիսամյակում ևս ընդհանուր գործարքների առավել բարձր՝ 34,4 տոկոսաչափը գրանցվել է հողերի նկատմամբ: Ամենացածրը՝ 2,2%, գրանցվել է արտադրական նշանակության շինությունների նկատմամբ: 2021 թ. առաջին կիսամյակում նախորդ տարվա նույն ժամանակահատվածի համեմատ բնակարանների նկատմամբ իրականացված գործարքներն ավելացել են 27,5 տոկոսով, անհատական բնակելի տների դեպքում աճը կազմել է 27,2 %, արտադրական նշանակության շինությունների նկատմամբ իրականացված գործարքներն ավելացել են 13,8%-ով:

Հասարակական նշանակության շինությունների գործարքների աճը կազմել է 23 տոկոս, հողերի պարագայում աճը կազմել է 27,8 %: Գյուղատնտեսական նշանակության հողերի նկատմամբ իրականացված գործարքներն աճել են 29,4 տոկոսով: Վերլուծությունից ակնհայտ է դառնում, որ 2021 թվականի առաջին կիսամյակում վերջին հինգ տարվա նույն ժամանակահատվածի համեմատությամբ օտարման ամենաբարձր ցուցանիշն է գրանցվել: 2021թ. առաջին կիսամյակում անշարժ գույքի նկատմամբ գրանցված օտարման գործարքների առավել բարձր՝ 30,6 տոկոսաչափը գրանցվել է Երևանում, իսկ առավել ցածրը՝ 1,9 %, Վայոց ձորի մարզում: Ինչ վերաբերում է մասնավորապես առքուվաճառքի գործարքներին, ապա 2021 թ. առաջին կիսամյակում կատարվել է, ընդհանուր առմամբ, առքուվաճառքի 24 961 գործարք:

Վերջին հինգ տարվա համեմատությամբ այս ցուցանիշը ևս ամենաբարձրն է: Երևանում առքուվաճառքի գործարքները 2021 թ. առաջին կիսամյակում նախորդ տարվա համեմատ ավելացել են 26,7 տոկոսով: Ինչ վերաբերում է մարզերին, ապա այս առումով առանձնանում է Սյունիքը: Եթե մնացած բոլոր մարզերում առքուվաճառքի աճ է գրանցվել, Սյունիքում 2020 թ. առաջին կիսամյակի համեմատ 2021 թ. նույն ժամանակահատվածում 4 տոկոս նվազում կա: Ընդհանուր առմամբ, մարզերում առքուվաճառքի գործարքները նշված ժամանակահատվածում 21,1 տոկոսով են աճել, իսկ գյուղական բնակավայրերում աճը կազմել է 26 %:

2021 թ. առաջին կիսամյակում հանրապետությունում գրանցված առքուվաճառքի գործարքների առավել բարձր՝ 45,2 տոկոսաչափը գրանցվել է հողերի, իսկ առավել ցածրը՝ 1,3 %, արտադրական նշանակության շինությունների նկատմամբ: Երևանում 2021 թ. առաջին կիսամյակում առքուվաճառքի գործարքների առավել բարձր՝ 60,6 տոկոսաչափը գրանցվել է բնակարանների, իսկ առավել ցածրը՝ 1 %, արտադրական նշանակության շինությունների նկատմամբ: Բնակարանների առքուվաճառքը մայրաքաղաքում նախորդ տարվա առաջին կիսամյակի համեմատ ավելացել է 32,9 տոկոսով, առանձնատներինը՝ 27,4 %-ով: Հողերի նկատմամբ առքուվաճառքը նվազել է 3,8, իսկ արտադրական նշանակության շինություններինը՝ 6 տոկոսով:

Մարզերում 2021 թ. առաջին կիսամյակում առքուվաճառքի գործարքների առավել բարձր տոկոսաչափը՝ 61%, գրանցվել է հողերի, իսկ ամենացածրը՝ 1,4 %, արտադրական նշանակության շինությունների նկատմամբ: Ինչ վերաբերում է բազմաբնակարան բնակելի շենքերի բնակարանների առքուվաճառքի գործարքներին, ապա 2021 թ. առաջին կիսամյակում նման 7029 գործարք է եղել: Նախորդ տարվա նույն ժամանակահատվածի համեմատ այս ցուցանիշն ավելացել է 27,8 տոկոսով:

Կադաստրի կոմիտեի տվյալներով, գնային փոփոխությունների ուսումնասիրությունը ցույց է տալիս, որ 2021 թ. առաջին կիսամյակում Երևանում բազմաբնակարանային բնակելի շենքերի բնակարանների շուկայական միջին գները 1 քմ-ի հաշվարկով 2020 թ. առաջին կիսամյակի համեմատ աճել են 5,1 տոկոսով: Նշված ժամանակահատվածում մարզերում վաճառվել է 2437 բնակարան, ընդ որում՝ առքուվաճառքի 7,1 տոկոսը գրանցվել է գյուղական բնակավայրերում: Մարզերի քաղաքներում բազմաբնակարանային շենքերի բնակարանների շուկայական միջին գները 1 քմ-ի հաշվարկով 2020 թ. առաջին կիսամյակի համեմատ նվազել են 3,4 %-ով:

ԱՆՆԱ ԲԱԴԱԼՅԱՆ

Մանրամասները՝ «Փաստ» օրաթերթի այսօրվա համարում