Թալինի հիվանդանոցում ծննդկանի մահվան դեպքի առթիվ քրեական գործ է հարուցվել
SOCIETYՕգոստոսի 20–ին Թալինի բժշկական կենտրոնում 31–ամյա ծննդկանի մահվան դեպքի առթիվ քրեական գործ է հարուցվել ՀՀ քրեական օրենսգրքի 130-րդ հոդվածի 2-րդ մասով (բժշկական օգնություն եւ սպասարկում իրականացնողների կողմից մասնագիտական պարտականությունները չկատարելը կամ ոչ պատշաճ կատարելը)։
Ինչպես NEWS.am-ը տեղեկանում է Քննչական կոմիտեի տեղեկատվության եւ հասարակայնության հետ կապերի բաժնից, դեպքի առթիվ նյութերի նախապատրաստման ընթացքում նշանակվել է դիակի դատաբժշկական փորձաքննություն, հարցաքննվել են մի շարք անձինք, այդ թվում՝ հերթապահ բուժանձնակազմը:
Նկատի ունենալով, որ նախապատրաստված նյութերն առերեւույթ պարունակում են քրեական գործ հարուցելու օրինական հիմք եւ առիթ, ՀՀ քննչական կոմիտեի Արագածոտնի մարզային քննչական վարչությունում հարուցվել է քրեական գործ՝ ՀՀ քրեական օրենսգրքի 130-րդ հոդվածի 2-րդ մասով: Կինը ճանաչվել է տուժող:
Կատարվում է նախաքննություն: Ձեռնարկվում են անհրաժեշտ քննչական եւ դատավարական այլ գործողություններ՝ դեպքի բոլոր հանգամանքները, ծննդկանի մահվան պատճառը (պատճառները) պարզելու, օբյեկտիվ, լրիվ եւ բազմակողմանի քննությունն ապահովելու ուղղությամբ:
Ավելի վաղ հայտնել էինք, որ «Թալին» բժշկական կենտրոնում օգոստոսի 20–ին 31-ամյա ծննդկան է մահացել: