Ինչո՞ւ գարեջուրը լցվեց թիթեղյա տարայի մեջ. «Փաստ»

«Փաստ» օրաթերթը գրում է

Երբեմն տարբեր ըմպելիքների ժողովրդականության վրա կարող են ազդել ոչ միայն նրանց համային հատկանիշները, այլ նաև այն ձևը, որով դրանք մատուցվում են: Հետևաբար, արտադրողները փորձում են հնարավորինս բավարարել գնորդների պահանջները: Նույնը տեղի է ունեցել նաև գարեջրի հետ: Գարեջրի վաճառքն ավելի խթանելու համար արտադրողները գտել են հարմար փաթեթավորում` թիթեղյա տարողություն: Արդյունքում շուկայում հայտնվել է միանգամայն նոր ապրանքատեսակ` «պահածոյացված» գարեջուր, որն իր համով տարբերվել է ստանդարտից: Թիթեղյա տարողությամբ գարեջրի պատմությունը սկսվել է 1910 թվականից: Սակայն այդ ժամանակ և մինչև 1933 թվականը գործել է Չոր օրենքը, այսինքն՝ արգելվել են սպիրտային ըմպելիքների վաճառքը և օգտագործումը, որն էլ հենց ազդել է այդ գաղափարի ուշ իրականացման վրա:

Այնուամենայնիվ, Միացյալ Նահանգներում այդ օրենքի չեղարկումից հետո արտադրողները արագորեն սկսել են հետ բերել կորսվածը: Ընդ որում, սկզբից գարեջուրն ավելի ուժեղ մրցակիցներ է ունեցել, այն է՝ ավելի թունդ սպիրտային ըմպելիքները, և մարդիկ սկզբում քիչ ուշադրություն են դարձրել թույլ ալկոհոլային խմիչքներին: Այդ առումով անհրաժեշտ էր իրականացնել արտադրանքի վաճառքի խթանման մի քանի փուլեր, որոնցից է արտադրանքը ավելի մատչելի և էժան դարձնելը: Դրա լավագույն օրինակը գարեջրի թանկարժեք ապակյա շիշը թիթեղյա տարողությամբ փոխարինելն էր: Բոլորին է դուր եկել այս գաղափարը, ընդ որում, ոչ միայն գինը նվազեցնելու, այլ նաև նոր ու հարմարավետ փաթեթավորմամբ գարեջուրը գնորդներին հասցնելու տեսակետից: Gottfried Kreuger գարեջրագործական ընկերության արտադրության մեջ թիթեղյա տարաներ օգտագործելու առաջին վեց ամիսներին վաճառքի ծավալն աճել է 6 անգամ: Սա լավ օրինակ է դարձել այլ գարեջրագործների համար, որոնք ևս արագորեն սկսել են անցում կատարել նոր փաթեթավորմանը:

Նման հաջողություն չէր կանխատեսում անգամ ամերիկյան Can Company ընկերությունը, որն էլ հենց մշակել և ստեղծել էր այդ թիթեղյա տարաները: Արդյունքում թիթեղյա տարայով գարեջուրը դարձել է Ամերիկայի այնպիսի խորհրդանիշ, ինչպես ջինսը կամ ջազը: Սկզբում տարաները պատրաստվել են երկաթե թիթեղներից, և դրանք բացվել են միայն հատուկ բանալիով, որը վաճառվել է գարեջրի հետ միասին: Բնականաբար, գարեջրին ավելացվել են որոշակի կոնսերվանտներ, որպեսզի գարեջուրը ռեակցիայի մեջ չմտնի երկաթի հետ: Այդ իսկ պատճառով գարեջուրը ձեռք է բերել նոր համ, որը հատկապես դուր է եկել դրա որոշ երկրպագուներին:

Այդպես հայտնվել է գարեջրի նոր տեսակ: Հետագայում, իհարկե, երկաթը փոխարինվել է ալ յումինով, որը ավելի պրակտիկ է և թեթև: Թիթեղյա տարայով գարեջուրը առաջացրել է դրա օգտագործման որոշ ավանդույթներ: Օրինակ, երբ գարեջուրը արդեն խմված է, կա տարան սեղմելու ծես, որը, կարծես թե, գործընթացին վերջակետ է դնում: Քանի որ ներկայումս պայքար է ընթանում ալկոհոլային արտադրանքների օգտագործման դեմ, և հատկապես թունդ ալկոհոլային խմիչքների, թիթեղյա տարայով գարեջուրն այժմ ոչ միայն խմիչք է, այլ նաև որոշակի կենսակերպ, որն ունի իր սովորություններն ու վարքի կանոնները:

ԿԱՄՈ ԽԱՉԻԿՅԱՆ

Մանրամասները՝ «Փաստ» օրաթերթի այսօրվա համարում