Հրաշքով փրկվածներն ու ողբերգության մանրամասները․ ինչպե՞ս է տեղի ունեցել բնակելի շենքի պայթյունը (լուսանկարներ, տեսանյութ)

Ինչպես արդեն տեղեկացրել է Past.am-ը, Վոլգոգրադում բնակելի շենքի բնակարաններից մեկում պայթյուն է տեղի ունեցել, ինչի հետեւանքով կան զոհեր եւ վիրավորներ։ Պայթյունը տեղի է ունեցել բնական գազի արտահոսքի հետեւանքով, պայթյունի հետեւանքով շենքի մի մասը քանդվել է, 9 հարկերում հրդեհ է բռնկվել։ Ի հայտ են եկել ողբերգության սարսափելի մանրամասներ։

«Այս բնակարանում մեկ գիշեր հասցրինք քնել։ «Վատ բնակարանի» հենց վերեւի հարկում։ Չէինք էլ հասցրել հարեւանների հետ ծանոթանալ, նորամուտ նշել։ Դեպքի պահին գնացել էինք հին բնակարանից իրերը բերելու։ Հիմա բնակարանն ամբողջովին ավերվել է»,- պատմում է Սլավան, ում ընտանիքը նոր-նոր էր բնակարան գնել տխրահռչակ շենքում։

Պայթյունի հետեւանքով 30-ից ավելի բնակարան է փլուզվել, մարդիկ ընտանիքներով մնացել են դրսում։ Փորձելով փրկվել՝ մարդիկ ցած էին նետվում պատուհաններից: Վոլգոգրադի Կոսմոնավտների փողոցի 47 շենքում պայթյունը տեղի է ունեցել կիրակի կեսօրին։ Շատերը տանն էին, հանգստյան օր էր։ Սկզբում պայթյունի ձայն է հնչել, շենքի մի մասը փլուզվել է, ապա հրդեհ է սկսվել։ Բնակիչներից Ալեքսեյը եղել է աղբատար խողովակի կողքին այդ պահին՝ 5-րդ հարկում։

«Ձայն լսեցի ու տեսա, ինչպես կողքս փլուզվեց: Վազեցի տուն, բոլորին ասացի, որ փախչեն։ Մուտքի դուռը փլվել էր, պատուհաններից նետվում էինք, որ փրկվենք»,- պատմում է նա։ Փրկարարները վայրկենապես դեպքի վայր են ժամանել, անգամ ձեռքերով են ստիպված եղել քանդել փլատակները՝ մարդկանց հանելու համար։ «Մի կերպ աստիճաններ մոտեցրին շենքին, առաջինը մի կնոջ փրկեցինք՝ նորածին երեխայի հետ։ 7-րդ հարկի պատուհանից մի մարդ էր կախվել, հետո ընկավ, ու մենք ծածկոցներով նրան պահեցինք»,- պատմում են ականատեսները։

Անդրեյ Օլեյնիկը, ով 3-րդ կուրսի ուսանող է, շենքի 8-րդ հարկում էր ապրում։ Նա փրկարարների հետ հավասար օգնել է դուրս բերել փլատակների տակ մնացած մարդկանց։

«Պայթյունից ուղիղ 5 րոպե առաջ հայրս զանգեց։ Հանգստյան օր էր, քնած էի, նա ինձ արթնացրեց։ Ես կիսաքնած վեր կացա, դեռ չէի հասցրել ուշքի գալ, հանկարծ դղրդյուն լսվեց ու ես ուժեղ հարված զգացի։ Սկզբում խուճապի մեջ ընկա, հետո հասկացա, որ պետք է փախչել։ Արագ հագնվեցի, ուզում էի փաստաթղթերս վերցնել, հատակը սկսեց ցնցվել, էլ ոչինչ չհացրի, մի կերպ դուռը բացեցի, վազեցի դուրս։ Մուտքի դուռը փակվել էր, ստիպված մարդկանց առաջին հարկի պատուհանից էինք իջեցնում, առաջինը տարեցներին էինք գրկում, իջեցնում։

Երբ դուրս եկա, շենքի կողքին կանգնած էի, մեկը ձեռքիցս արագ քաշեց ու հենց այդ պահին շենքը փլվեց այնտեղ, որտեղ կանգած էի վայրկյաններ առաջ»,- պատմում է Անդրեյը։

Կաբանովների ընտանիքը պայթյունից հրաշքով է ողջ մնացել։ Բազմազավակ ընտանիքը հավատացյալ է, նրանց 5 երեխաներից ամենափոքրը՝ Նաստյան, մեկ տարեկան է։ Ընտանիքի հայրը՝ Ալեքսանդրը, եկեղեցու սպասավոր է։

Այդ կիրակի ողջ ընտանիքով եկեղեցում էին՝ պատարագի, հենց դա էլ նրանց կյանքը փրկել է։ «Կինս երեխաների հետ գնաց տուն, hասել են մուտքի մոտ, ու պայթյունը տեղի է ունեցել։ Կինս անմիջապես վերցրել է երեխաներին ու փախել։ Ես անչափ շնորհակալ եմ Աստծուն, որ նրանք ողջ են մնացել։ Ես դեռ եկեղեցում էի, երբ ինձ մոտացավ մի տղամարդ ու ասաց, որ մեր շենքը փլվել է։

Մինչեւ կնոջս կզանգահարեի, կիմանայի՝ ինչպես են, ինձ թվաց՝ մի դար անցավ»,- պատմում է Ալեքսանդրը։

«Վատ» բնակարան Այդ օրը ոչ բոլորի բախտը բերեց։ 12 հոգի վնասվել է, որից 3-ը՝ երեխաներ։ Նրանք տարբեր վնասվածքներով գտնվում են հիվանդանոցում։ 1 հոգու դին արդեն հայտնաբերվել է, եւս 4-ը կարող են փլատակների տակ գտնվել, 3-ը շենքի բնակիչներ են, 1-ը՝ հյուր։

Բնակարանի տերը՝ Ֆանիս Հասանովը, որտեղ տեղի է ունեցել պայթյունը, մահացել է։ Ոչ ոք չի կասկածում, որ պայթյունի մեղավորը նրա թոռն է՝ Դենիսը։ «Այդ բնակարանում մի կին էր ապրում հոր ու որդու հետ։ Նրանց տնից անընդհատ ինչ-որ տարօրինակ հոտ էր գալիս՝ բենզին էր, թե ինչ, չգիտենք։

Որքան բողոքել ենք, դուռը թակել, չեն բացել»,- ասում են հարեւանները։ Նրանք պնդում են, որ կնոջ հայրը հիվանդ է եղել, մութ գործերով զբաղվել է որդին՝ Դենիսը։ Նա անընդհատ ինչ-որ գազի բալոններ է տուն բերել, բենզին ու նման այլ բաներ։ Նախնական տվյալներով՝ տղան տանը մոտոցիկլետներ է վերանորոգել։ Պարզվել է նաեւ, որ նա հոգեբուժարանում հաշվառված է եղել։