Պատվաստումը կարող է դառնալ վճարովի. քաղաքացիները չպետք է ենթարկվեն իշխանությանը

Այսօր՝ հոկտեմբերի 13-ին,  ՀՀ ԱՆ Հիվանդությունների վերահսկման և կանխարգելման ազգային կենտրոնի վարակիչ և ոչ վարակիչ հիվանդությունների համաճարակաբանության վարչության պետ Ռոմելլա Աբովյանը մամուլի ասուլիսի ժամանակ նշեց, որ հիվանդանոցներն աշխատում են շատ ծանրաբեռնված, մահճակալային ֆոնդը սպառված է, բավականին ծանր են դեպքերը, որ մտահոգիչ իրավիճակ է ստեղծվել: Այս թեմայով ԼՈՒՐԵՐ.com-ը զրուցեց «Պարացելսուս» հասարակական կազմակերպության նախագահ, բժիշկ Նունե Ներսիսյանի հետ, որն ամենևին էլ զարմացած չէր համաճարակային իրավիճակի բարդացմամբ. 

«Ներեցե՛ք, իսկ ի՞նչ էիք սպասում. իշխանության կողմից չկազմակերպված աշխատանք, կորոնավիրուսի դեմ տապալած պայքար, որը շարունակվում է առ այսօր, այս ամենից հետո դրական արդյո՞ւնք էիք սպասում»,- ասաց Նունե Ներսիսյանը:

Նա այն կարծիքին է, որ իշխանությունն ամեն ինչ անում է քաղաքացու «գրպանին դիպչելու» և նրան պատվաստվել դրդելու համար. «Սկզբից որոշումը կայացրին, որ հոկտեմբերի 1-ից պետական բոլոր աշխատողները իրենց մոտ կա՛մ պատվաստումը հաստատող հավաստագիր ունենան, կա՛մ ՊՇՌ թեստ: Բոլոր հիմնարկ-ձեռնարկությունները իրենց ղեկավարների հետ մեկտեղ հերթեր գոյացրին, որ որքան հնարավոր է շուտ ՊՇՌ թեստերի պատասխանները վերցնեն: Այս ամենից հետո հոկտեմբերի 1-ը չեղյալ համարեցին և առանց զլանալու երկրորդ անգամ մարդկանց «գրպանին կպան», որ մի հատ էլ հոկտեմբերի 14-ին թեստ հանձնեն»,- ասաց բժիշկը՝ հարցականի տակ դնելով ՊՇՌ թեստերի պատասխանները.

«Այդ ապարատները գերզգայուն են, ինչքան էլ, որ տեխնիկա է, միևնույն է, իրենք 100-ից ավելի ՊՇՌ թեստի ճշգրիտ պատասխաններ չեն կարող տրամադրել: Մեկ լաբորատորիայում Ֆիզիկապես անհնար է այդքան մեծ քանակությամբ ՊՇՌ թեստեր նայել. այս քանակի դեպքում որակ չի կարող լինել»,- նշեց բժիշկը:

Նա ընդգծում է, որ ՊՇՌ թեստի ոչ ճշգրիտ պատասխան ստանալու դեպքում, վարակի շղթան մեծանում է. ստացվում է այնպես, որ իշխանությունը կորոնավիրուսի դեմ, ի սկզբանե, ոչ միայն չպայքարեց, այլև ավելի մեծ զարկով նպաստեց վարակված քաղաքացիների թվերի աճին:

Նունե Ներսիսյանի հետ նաև խոսեցինք, հատկապես, այս օրերին գոյացող հերթերի մասին, որտեղ քաղաքացիները չեն պահպանում հակահամաճարակային կանոնները, բժիշկն ասաց, որ այս ամենն իշխանությունը դիտավորյալ է անում. «Իշխանությունը կորոնավիրուսի պիկին փակեց հակատուբերկուլյոզային դիսպանսերը, ՁԻԱՀ կենտրոնը և այն բոլոր նորմալ բժշկական հաստատությունները, որոնք իսկապես նման կատաստրոֆիկ էպիդեմիայի դեմ կարող էին պայքարել: Փակեցին նաև մարզային շատ հիվանդանոցներ, որ մարզի հիվանդները գան Երևան, իրար գլխի լցվեն, իրենք ամեն ինչ, ի սկզբանե, մտածված են արել: Քաղաքացիների աչքերին «թոզ փչելու» համար այստեղ բացել էին մի քանի իբրև կորոնավիրուսային բաժանմունքներ, հետո նորից փակեցին, ու էլի քաղաքացիները լցվում են իրար վրա: 5 օրից էլ կասեն՝ էպիդեմիան տարածվել է, նորից լոքդաուն ենք անում, լավ է՝ այս երկու «ֆիրմա» բառերը սովորել են»,- ասաց նա: 

Մեր զրուցակիցն այն կարծիքին է, որ իշխանության կողմից կորոնավիրուսի դեմ պայքարը եղել են միայն Համալիրի, ԱԻՆ-ի նկարները, Էպիդեմիա և լոքդաուն բառերի օգտագործումը. «Ես՝ որպես բժիշկ, պայքարի այլ ձև չեմ տեսել: Իշխանությունը միայն նպաստում է նրան, որ վարակի շղթան մեծանա»,- ասաց Նունե Ներսիսյանը՝ շեշտելով ՀՀ-ում գործում է պատվաստման կամավոր-պարտադիր սկզբունքը.

«Իշխանությունն այս ամեն ինչով խուճապ է տարածում, և զարմանալի է, բայց փաստ, որ պատվաստումների հակաքարոզը հենց նույն իշխանությունն է անում. օրինակ՝ երեկ ԱՆ նախարարը ասաց, որ պատվաստումից 80-ամյա քաղաքացի է մահացել. բա սա քարոզ չէ ի՞նչ է, այսքանից հետո ինչպես քաղաքացին կամովի գնա պատավստվելու»,- ասաց նա:

Վերջինս դեմ է յուրաքանչյուր պատվաստանյութի օգտագործման, քանի որ, ինչպես նշում է բժիշկը, դրանք թեստավորման փուլ չեն անցել. «Ցանկացած պատվաստանյութ պետք է անցնի թեստավորման փուլ՝ մինիմումը 5 տարի, մաքսիմումը՝ 15: Իսկ այս պատվաստանյութերի հայտնաբերումից անցել է ընդամենը 1 տարի, դրանք դեռ թեստավորման փուլ չեն անցել: Կարծում եմ՝ կորոնավիրուսի դեմ պայքարի այս փուլը ևս կձախողվի, ինչպես անցած անգամները: Հնարավոր է՝ շուտով պատվաստվելը ևս լինի վճարովի: Սա շատ մեծ բիզնես է, որի մեջ է նաև իշխանությունը, մի ձնագնդիկ է, որ գլորվելով մեծանում է. կգա ժամանակ և իրենք այս ամենի համար պատասխան կտան»,- ընդգծեց բժիշկը: 

Անդրադառնալով վերջին շրջանում տարածվող այն լուրերին, թե առաջիկայում սպասվում են նոր ավելի խիստ ռեժիմով սահմանափակումներ, Նունե Ներսիսյանն ասաց, որ, միևնույն է, տիրող համաճարակային իրավիճակին դա էլ չի օգնի, այդ մեթոդն անարդյունավետ կլինի. «ՌԴ-ն էլ էր առևտրի կենտրոններ, ժամանցի վայրեր այցելելիս քաղաքացիներից ՊՇՌ թեստ պահանջում կամ էլ պատավստման QR կոդը, բայց նրանք հետո հասկացան, որ դա անհնարին է, 1 շաբաթ հետո հանեցին այդ սահամանափակումները: Այս ամենով, կարող եմ ասել, որ իշխանությունը արհեստականորեն մեծացնում է հասարակության բողոքի ալիքը, միայն դա»,- ասաց Նունե Ներսիսյանը՝ հավելելով, որ եթե անգամ այդպիսի սահմանափակումներ լինեն, միևնույն է, քաղաքացիները չպետք է ենթարկվեն դրանց: