Նիկոլ Փաշինյանն ընդունել է Արցախի նախագահին. Քննարկել են նաեւ Արցախի հարցը

Այսօր կառավարությունում հյուրընկալել եմ Արցախի Հանրապետության նախագահ Արայիկ Հարությունյանին: Այս մասին Facebook-ի իր էջում գրել է ՀՀ վարչապետ Նիկոլ Փաշինյանը, ով նաեւ տեսանյութ է հրապարակել:

Նիկոլ Փաշինյանն իր խոսքում նշել է. «44-օրյա պատերազմի առաջին տարելիցն է լրանում եւ իհարկե, այս ընթացքում էլ այդ աշխատանքը չի դադարել, բայց տարելիցի կապակցությամբ վերլուծելը նաեւ այս ընթացքում մեր կատարած աշխատանքը եւ իրադրությունը գնահատելը կարեւոր է: Մեր այսօրվա հանդիպման ընթացքում այդ հարցերը կքննարկենք:

Կարեւոր է արձանագրել, որ այս ընթացքում Արցախի կառավարությանը ՀՀ կառավարության հետ հաջողվել է Արցախում բնականոն կյանքի վերականգնման ուղղությամբ շատ կոնկրետ աշխատանքներ իրականացնել: Իհարկե, մենք չենք համարում, որ այն, ինչ արված է գոհացուցիչ է եւ մենք բնականաբար պետք է շարունակենք աշխատանքն  այդ ուղղությամբ՝ զուտ աջակցման ծրագրերը փոխարինելով զարգացման ծրագրերով:

Իհարկե, կարեւոր է նաեւ, որ մենք աշխատանքային մակարդակում քննարկումներ ունենանք ԼՂ հակամարտության կարգավորման մեր հետագա տեսլականի վերաբերյալ: Իհարկե, մենք կարեւոր ենք համարում, որ ԵԱՀԿ Մինսկի խմբի համանախագահության շրջանակներում բանակցային լիարժեք գործընթացը վերականգնվի, որտեղ ինչպես նաեւ համանախագահներն են մի քանի անգամ ընդգծել, հայտնի սկզբունքների հիման վրա այդ թվում ազգերի ինքնորոշման իրավունքը տեղի ունենա ԼՂ հակամարտության վերջնական եւ համապարփակ կարգավորումը, եւ ԼՂ կարգավիճակի ճշգրտումը: Այս բոլոր հարցերը մեր աշխատանքային միացյալ օրակարգում են»:

Իր հերթին Արցախի նախագահ Արայիկ Հարությունյանը նշել է. «Այն, որ Արցախի հարցի քաղաքական լուծման ճանապարհից չենք շեղվել եւ Արցախի ինքնորոշման իրավունքը որպես գլխավոր քաղաքական ուղղություն մենք շարունակում ենք պահպանել եւ միջազգային խաղացողները, այդ թվում ԵԱՀԿ Մինսկի խումբը, շարունակում են միջնորդ լինել եւ օրակարգում Ղարաբաղյան խնդրի կարգավորման առումով հիմքում դրված է նաեւ ազգերի ինքնորոշման իրավունքը:

Երկրորդ, լայնածավալ աշխատանքների արդյունքում առաջին պտուղներն ենք քաղում: Մինչեւ տարեվերջ առնվազն 300 նորակառույց բնակարան միայն Ստեփանակերտում կհանձնվի շահագործման: Դրանց մի մասը մինչեւ պատերազմը սկսված շինարարություն է, բայց մեզ հաջողվել է դրանից բացի հազարավոր բնարականների հիմքեր դնել այսօր եւ մինչեւ 2022-ի վերջը առնվազն 2500-3000 բնակարան ավարտած կլինենք, առաջին հերթին ՀՀ կառավարության կողմից Արցախին տրամադրվող գումարների շրջանակներում, եւ «Հայաստան» համահայկական հիմնադրամի կողմից հանգանակված գումարներով տարբեր ծրագրերի իրականացման ուղղությամբ»:

Արցախի նախագահը նաեւ շնորհակալություն հայտնեց, որ 2022 թվականի ՀՀ պետական բյուջեում Արցախի համար նախատեսվել է բավականին մեծ գումար, որը թույլ է տալու Արցախում իրականացնել առկա բոլոր խնդիրները:

«Ես համոզված եմ, որ 2-3 տարվա ընթացքում ամբողջությամբ կլուծենք բնակարանային եւ ենթակառուցվածքային եւ սոցիալական մնացած խնդիրները:

Այն բնականոն կյանքը, որ Արցախում կա, հիմնականում պայմանավորված է ՀՀ կառավարությանկողմից հատկացված  գումարների եւ ինչու ոչ, այն ամենօրյա աշխատանքով, որը տեղի է ունենում: