Ինչո՞ւ է այս շամպայնն ամենաթանկերից մեկն աշխարհում․ «Փաստ»

«Փաստ» օրաթերթը գրում է

Այսօր կան մեծ քանակությամբ տարատեսակ ալկոհոլային խմիչքներ՝ յուրաքանչյուրի համար ըստ ճաշակի և գույնի: Բայց կան հատուկ տեսակներ, որոնք հասանելի չեն բոլորին: Մասնավորաբար, գինու արդյունաբերության մեջ հայտնվել է աշխարհահռչակ «հեղուկ ոսկին»: Այն հարյուր տոկոսով արդարացնում է իր անունը:

«Crystal Louis Roederer» շամպայնը ունի ոսկու գույն,իսկ գինը այնքան բարձր է, որ հասանելի է միայն գինու իսկական կոլեկցիոներներին կամ հարուստ մարդկանց: Այս ըմպելիքն ինչպես Ռուսաստանի կայսր Ալեքսանդր Երկրորդի, այնպես էլ հայտնի Քվենտին Տարանտինոյի սիրելի ըմպելիքներից մեկն է: Շամպայնը աշխարհում ամենատարածված գինիներից մեկն է, չնայած այդ ըմպելիքի ոչ բոլոր տեսակները կարելի է այդպես կոչել: Իրականում շամպայն կարող է անվանվել միայն չոր գինին Ֆրանսիայի Շամպայն նահանգից: Այնտեղ այն արտադրվում է կրկնակի խմորման եզակի տեխնոլոգիայի միջոցով, իսկ արտադրության համար օգտագործվում է խաղողի երեք տեսակ: Այլ տեխնոլոգիայի օգտագործմամբ խմիչքները կարելի է անվանել միայն փրփրուն գինի:

Crystal-ը իսկական շամպայն է և համապատասխանում է բոլոր այդ պահանջներին: Իսկ հիմա՝ ավելի մանրամասն Crystal շամպայնի պատմության մասին: Այն սկիզբ է առել 18-րդ դարի վերջին և 19-րդ դարի սկզբին: Հենց այդ ժամանակ է հիմնադրվել Լուի Ռոդերերի շամպայնի տունը, որի անունով էլ այն կոչվել է: Նրա նկուղների գինիները մեծ պահանջարկ են ունեցել, և նույնիսկ դրանցից մեկը՝ բրյուտի շիշը, 1876 թվականին հայտնվել է Ռուսաստանի մեծ կայսր Ալեքսանդր Երկրորդի սեղանին: Սա շրջադարձային պահ է դարձել ինչպես Լուի Ռոդերերի կյանքում, այնպես էլ նրա գինեգործության զարգացման պատմության մեջ, քանի որ նոր շամպայնը շատ է դուր եկել ցարին, և նա հրամայել է այդ ժամանակից ի վեր իր սեղանին գինիներ մատուցել բացառապես Լուի Ռոդերերից: Բոլոր պալատականները հետևել են Ալեքսանդր Երկրորդին, ինչը բերել է այդ խմիչքի անհավանական ժողովրդականության:

Այդ ժամանակ Լուի Ռոդերերից գինիներ ունենալը դարձել է նրբագեղության և ոճի մարմնացում: Բացի այդ, ցարը հրամայել է իր նախընտրած շամպայնը շշալցնել միայն բյուրեղապակյա անոթների մեջ: Այդ ժամանակից ի վեր հայտնվել է այդ ըմպելիքի հայտնի անունը՝ «Crystal Louis Roderer», և պիտակի վրա հայտնվել է զինանշանը: Այս ժողովրդականությունն ու հաջողությունն առանց պատճառի չեն եղել, քանի որ շամպայն պատրաստելու նույնիսկ դասական բաղադրատոմսն է բարելավվել: Որպես հումք օգտագործվել են միայն Շամպայնի խաղողի այգիներում աճեցված Premier Cru կամ Grand Cru դասի Շարդոն և Պինո նուար տեսակի խաղողներ:

Անգամ կահավորել է առանձնահատուկ բերքի գինիների հատուկ նկուղ, որը տեղակայված է Ռեյմսում: Գինու համար պարտադիր հնեցման ժամանակահատվածը նույնպես ավելացել է և դարձել 6,5 տարի: Դա այդ շամպայնին զարմանալի համ է հաղորդում: Բացի այդ, ցիտրուսների, խնձորի և նուշի «նոտաներն» ու ըմպելիքի ծաղկային-մեղրային բույրը դարձել են այդ շամպայնի ամենահաճելի հատկություններից մեկը: 20-րդ դարի սկզբին արտադրվող բյուրեղապակյա շամպայնի մեծ մասը վաճառվել է կայսերական արքունիքին, և «Լուի Ռոդերեր» տունը դարձել է ռուսական գահի գինիների պաշտոնական մատակարարը:

Իր եզակի տեխնոլոգիաների, ինչպես նաև տասնամյակների ընթացքում ամենաբարձր որակի շնորհիվ Crystal Louis Roederer շամպայնը այսօր կարող է վստահորեն կրել աշխարհի լավագույն գինիներից մեկի կոչումը: Այդ ըմպելիքի տարեկան վաճառքը կազմում է ոչ ավելի, քան 2,5 միլիոն շիշ, ինչը համեմատաբար փոքր ցուցանիշ է: Սա ապրանքանիշի սեփականատերերի կողմից կանխամտածված քայլ է և նպատակաուղղված է պահպանել գինու որակի պահանջվող մակարդակը: Միայն թե շշերն արդեն ոչ թե բյուրեղապակուց են, այլ ապակուց: Հայտնի ռեժիսոր Քվենտին Տարանտինոն բազմիցս խոսել է այն մասին, որ մինչ Crystal-ի բույրը ճաշակելը չի սիրել շամպայն: Իսկ Պոլ Վերխովենի նկարում այդ գինին կոչվում է «սուրբ ջուր»:

2011 թվականից Լուի Ռոդերերի տնից Ռուսաստան առաքումները դադարեցվել են: Դա տեղի է ունեցել դատական գործի հետ կապված, որի հայցվորը եղել է «Սոյուզպլոդոիմպորտ» ընկերությունը: Պատճառն եղել է այն, որ շամպայնի Crystal անվանումը նման է ռուսական արտադրության «Կրիստալ» օղուն: Դատարանը բավարարել է հայցը: Բայց այս ամենը, ամենայն հավանականությամբ, չի կանգնեցնի Crystal շամպայնի իսկական գիտակներին, որոնք կարող են իրենց թույլ տալ 1000 եվրոյով մեկ շիշ «հեղուկ ոսկի» գնել և վայելել:

ԿԱՄՈ ԽԱՉԻԿՅԱՆ

Մանրամասները՝ «Փաստ» օրաթերթի այսօրվա համարում