ՊԱՏՄՈՒԹՅԱՆ ԱՅՍ ՕՐԸ (6 ՆՈՅԵՄԲԵՐԻ). Դադարեցվել են բեռնափոխադրումները Հայաստան, երիտասարդները բողոքի ակցիա են իրականացրել կրթության նախարարության շենքի մոտ. «Փաստ»

«Փաստ» օրաթերթը գրում է

ՏՈՆԵՐ ԵՎ ՀԻՇԱՐԺԱՆ ՕՐԵՐ

Պատերազմների և ռազմական հակամարտությունների ժամանակ արտաքին միջավայրի շահագործման կանխարգելման համաշխարհային օր, Մարդու կողմից սպանված կենդանիների հիշատակի համաշխարհային օր, Դոմինիկյան Հանրապետություն, Տաջիկստան և Թաթարստան՝ Սահմանադրության օր, Ուկրաինա՝ Կիևի ազատագրման օր, Ֆինլանդիա՝ Շվեդական մշակույթի օր:

ՀԱՅ-ՀԱՅԱՍՏԱՆ

1807 – ծնվել է Անիի հայերից սերած լեհ բանաստեղծ Կարոլ Անտոնևիչը:

1866 – ծնվել է բանաստեղծ, դրամատուրգ Վահան Միրաքյանը:

1911 – ծնվել է օպերային և կամերային բարիտոն երգիչ Պավել Լիսիցյանը:

1920- հայ թուրքական պատերազմի ընթացքում թուրքերը մտել են Ալեքսանդրապոլ:

1921– Հայաստանի և Վրաստանի միջև կնքվել է պայմանագիր, համաձայն որի, Ախալքալաքն ու համանուն գավառը անցել են Վրաստանին:

1944 – ծնվել է հեռուստահաղորդավար Ստեփան Քիրեմիջյանը:

1945 – ծնվել է գրող և դիվանագետ Սևդա Սևանը (Ֆրանսուհի Բահչեջյան):

1961- վախճանվել է մեծանուն դերասան Հրաչյա Ներսիսյանը:

1962 – վախճանվել է իրավաբան, հասարակական, քաղաքական գործիչ Գրիգոր Չուբարյանը:

2006-Երևանի «Ռոսիա» կինոթատրոնը, որը Հայաստանի անկախության առաջին տարիներին վերանվանվել էր «Այրարատ» և գործում էր որպես տոնավաճառ, կրկին վերանվանվել է հին անվամբ և սկսել է գործել որպես առևտրամշակութային կենտրոն:

2007- Շրի Լանկայի Գերագույն դատարանը արգելել է Շրի Լանկայից փիղ ուղարկել Հայաստանի կենդանաբանական այգուն:

2012-Փոթի նավահանգստի աշխատակիցների գործադուլի արդյունքում դադարեցվել են բեռնափոխադրումները Հայաստան:

2018-«Արժեքների հեղափոխության» փորձից հինգ տարի անց Շանթ Հարությունյանը համաներմամբ ազատ է արձակվել «Վարդաշեն» քրեակատարողական հիմնարկից։

2019-ՀՅԴ Հայաստանի երիտասարդական միությունը բողոքի ակցիա է իրականացրել կրթության նախարարության շենքի մոտ: Մասնակիցները պահանջել են նախարարի հրաժարականը. պատճառը նախարարության մի շարք որոշումներն են, մասնավորապես այն, որ բուհական ծրագրերում «Հայոց լեզու» և «Հայոց պատմություն» առարկաները դարձել են ոչ պարտադիր:

2020-Ղարաբաղյան երկրորդ պատերազմի ժամանակ կատաղի մարտեր են ընթացել Շուշիում և մերձակայքում, ըստ պաշտոնական տեղեկատվության, հայկական կողմին հաջողվել է չեզոքացնել քաղաք ներխուժած ադրբեջանական դիվերսիոն խմբերին։

ԱՇԽԱՐՀ

1772 – Ռուս-թուրքական պատերազմի ընթացքում Հոնիական ծովի Պատրիակոս նեղուցում տեղի է ունեցել ծովամարտ օսմանյան Թուրքիայի և Ռուսական Կայսրության միջև:

1814 - ծնվել է բելգիացի երաժշտական գործիքների ստեղծող Ադոլֆ Սաքսը, որը հորինել է սաքսաֆոնը:

1825 – ծնվել է իտալացի քրեաբան և ֆիզիկոս Չեզարե Լոմբրոզոն:

1860 - Միացյալ Նահանգների 16-րդ նախագահ է ընտրվել հանրապետական Աբրահամ Լինքոլնը:

1851 - ծնվել է ամերիկացի լրագրող Չարլզ Հենրի Դոուն, որը հանդիսանում է Dow Jones & Co ընկերության համահիմնադիր և Արդյունաբերական պալատի Դոու-Ջոնս ինդեքսի հեղինակ:

1858 - ծնվել է ֆրանսիացի նկարիչ-կարիկատուրիստ Կարան դը Աշը (իսկական անունը՝ Էմմանուել Պուարե):

1861– ծնվել է կանադացի սպորտի մարզիչ, բասկետբոլ խաղի հեղինակ Ջեյմս Նեյսմիթը:

1869– տեղի է ունեցել «ամերիկյան ֆուտբոլ» խաղի առաջին հանդիպումը:

1887 - հիմնադրվել է շոթլանդական «Սելտիկ» ֆուտբոլային ակումբը:

1893– վախճանվել է ռուս մեծ կոմպոզիտոր, դիրիժոր, մանկավարժ, երաժշտական քննադատ Պյոտր Չայկովսկին:

1913 - Հարավային Աֆրիկայում հանքափորների երթը գլխավորելու ժամանակ ձերբակալվել է Մահաթմա Գանդին:

1943- Երկրորդ համաշխարհային պատերազմի ժամանակ խորհրդային զորքերը գեներալ Նիկոլայ Վատուտինի գլխավորությամբ վերագրավել են Կիևը:

1987– ծնվել է սերբ թենիսիստուհի Անա Իվանովիչը:

1995 - լույս է տեսել «Queen» խմբի վերջին ալբոմը Ֆրեդդի Մերկուրիի մասնակցությամբ:

2004 - Ֆրանսիան և Կոտ դը Իվուարը փոխադարձ ավիահարվածներ են իրականացրել:

2012 - Բարաք Օբաման երկրորդ անգամ ընտրվել է Միացյալ Նահանգների նախագահ:

Մանրամասները՝ «Փաստ» օրաթերթի այսօրվա համարում