Այժմ խոսքի ազատության գոյության պայքար է․ «Փաստ» օրաթերթը 5 տարեկան է

Հինգ տարի առաջ՝ 2016 թվականի այս օրը`  նոյեմբերի 9-ին, լույս տեսավ «Փաստ» օրաթերթի առաջին համարը: «Փաստ» օրաթերթի հիմնադիր Վարուժան Բաբաջանյանը մեզ հետ զրույցում ասաց, որ թեև շատերը այդ ժամանակահատվածում թերթ հրատարակելն անիմաստ են համարել, սակայն ժամանակը ցույց է տվել, որ «Փաստի» գործունեությունը նպաստել է թերթի տպագրության մշակույթին․

«Այն ժամանակ, երբ մենք թերթը բացում էինք, ինձ զանգում ասում էին, որ այդ պայմաններում առնվազն անմտություն է թերթ հրատարակելը՝  թերթը համարելով մեռնող մշակույթ։ Ես պնդում էի հակառակը, որ պետք է փաստարկված լրագրություն, ինչպիսին թերթն է, պետք է ապագան լինի նրանը։ Հասկանալի է, որ ինտերնետ արագությունների դարում շատ հեշտ է ամեն տեսակի ինֆորմացիա մատուցելը, իսկ թերթը շարունակում է իր ավանդական գործելաոճը, երբ ժամանակ կա աշխատելու, ստուգելու, երբ ծավալների խնդիր կա, երբ դու չես կարող այդ նյութը հեռացնել թերթից, ուրեմն ավելի պատասխանատու մոտեցում պետք է լինի։ Պարզվեց, որ դա աշխատեց։ Եթե կհիշեք, այդ ժամանակահատվածում Հայաստանում թերթերը հիմնականում․․․, շատերը փակվել էին, շատերը տպվում էին պարբերականությունը փոխած, և մեկ-երկու թերթ կար, որ նորմալ շարունակում էր գործունեությունը, և «Փաստ»-ի գործունեությունից հետո մամուլի, թերթերի նկատմամբ կարծես ինչ-որ վերաբերմունք փոխվեց, և թերթերը վերականգնեցին իրենց գործունեությունը»։

Բաբաջանյանին հարցրինք՝ բայց չէ՞ որ թերթի տպագրությունը եկամտաբեր չէ, վաճառքի գումարները չեն փակում ծախսերը:

«Դուք ևս թերթի ներկայացուցիչ եք և գիտեք, որ այն եկամտաբերություն ունենալ չի կարող, թերթն ավելի շատ հոլդինգի տրամաբանության մեջ է գործում, այսինքն՝ լրատվական ընկերություն է, որը գործունեություն է իրականացնում և՛ ինտերնետ տիրույթում, և տպագիր տիրույթում։ Ինտերնետային կայքի գովազդային եկամուտներից ուղղվում է թերթի հրատարակությանը, որովհետև մեր լրատվական կայքերի լոկոմոտիվը դառնում է թերթը, այդ առումով մենք չենք ափսոսում այն գումարների համար, որը ծախսում ենք թերթի համար»,- պատասխանեց լրատվամիջոցի հիմնադիրը։

Բաբաջանյանի խոսքով՝ այժմ մամուլի համար աննախադեպ ժամանակներ են, երբ լրատվամիջոցները խոսքի ազատության գոյության պայքար են տանում: «Մամուլի ազատության համար կատաստրոֆիկ փուլ ենք մտնում, սա, ըստ էության, խոսքի ազատության գոյության պայքար է, որովհետև ցանկացած անողնաշար իշխանության պարագայում, որի միտումները տանում են դեպի ավտորիտար ռեժիմ, իսկ Ազգային ժողովի ամբիոնի մոտ նույնիսկ տոտալիտար դրսևորումներ ենք տեսնում, երբ պատգամավորի թևից բռնած` դուրս են հանում, բնականաբար, նրանց կողմից առաջ է գալիս նաև մամուլին ճնշելու օրակարգ։

Օրինակ՝ այս պահին Ազգային ժողովում քննարկվում է գովազդի սահմանափակումների մասին օրենքը, որից, բնականաբար, պակասում է մամուլի ֆինանսավորումը։ Հիմա ընդհանրապես ամեն ինչ տանում է դրան և իրենց այդ ֆեյքային լկտի հարձակումները մամուլի տարբեր միջոցների նկատմամբ վերջին 3 տարիների ընթացքում։ Դա տանում է նրան, որ փորձում են ուզուրպացնել հասարակական միտքը, և այն կարծիքը, որն իրենց է պետք հասարակության մեջ գեներացնել, իրենց «Perfect.tv»-ներով, իրենց այդ «մուտիլովկաների» մակարդակով փորձելու են դա տարածել և հանրային գիտակցությունը գեներացնել այդ ուղղությամբ։ Լրատվամիջոցներն անում են հակառակը, փորձում են տալ հակառակ կարծիքը, ժամանակին դա փայլուն ստացվել է, բայց այսօր ամեն ինչ անում են ճնշելու, փակելու համար։ Կյանքը, սակայն, ցույց է տվել, որ մեր լրատվամիջոցներն իմունիտետ ունեն, այնպես որ` կդիմանանք»,- պատասխանեց Բաբաջանյանը։