Ախալքալաքում 19-ամյա հայազգի զինծառայող է մահացել
SOCIETYՎրաստանի Ախալցխայում Սամցխե-Ջավախեթիի դատաբժշկական փորձաքննության բյուրոյի մոտ հավաքվել են Նինոծմինդայի մունիցիպալիտետի Փոկա գյուղի բնակիչներ՝ մոտ 70 մարդ։ Տեղի բնակիչները բողոքում են 19-ամյա հայազգի տղայի մահվան պատճառով: Նինոծմինդայում ոստիկանների մոբիլիզացիա է նկատվում, հաղորդում է tv9news.ge-ն:
19-ամյա Սարգիս Սահակյանը ծառայում էր Ախալքալաքի զորամասում: Նոյեմբերի 11-ին Ախալցխայի ուղեգրային հիվանդանոցում նա ստամոքսի խոցի վիրահատության է ենթարկվել։ Ընտանիքը տեղեկացվել է հաջորդ օրը։ Սարգիս Սահակյանը նոյեմբերի 16-ին դուրս է գրվել, սակայն կլինիկան հիվանդից պահանջել է վերադառնալ զինվորական հոսպիտալ։ Իսկ այսօր՝ ժամը 13:30-ի սահմաններում, հիվանդանոցից զանգահարել են ընտանիքին և հայտնել, որ զինծառայողը մահացել է։ Փոկա գյուղի բնակիչները պահանջում են գործի քննություն։
Ռադիո NOR-ն այս հարցով կապ է հաստատել պաշտպանության նախարարության հետ, սակայն օպերատորը նշել է, որ անհրաժեշտ է զանգահարել աշխատանքային ժամին։