Սահմանամերձ գյուղերի երեխաները 2016 թվականից խաղաղություն են ակնկալում

SOCIETY 24 December, 2015 17:39

Հայաստանի Հանրապետության սահմանամերձ գյուղերի երեխաների ներկայությամբ դեկտեմբերի 24-ին վառվեցին Նախագահի նստավայրի տոնածառի լույսերը: ՀՀ նախագահ Սերժ Սարգսյանի և տիկին Ռիտա Սարգսյանի հյուրերը պատերազմ տեսած և հակառակորդի կրակահերթերի ներքո հասակ առնող երեխաներն են: Բոլորի շուրթերին մեկ բառ է, Ձմեռ պապիկին ուղղված մեկ ցանկություն` խաղաղություն:

«Այստեղ հիմնականում ներկա են սահմանամերձ շրջանների երեխաները: Բոլորի համար խաղաղությունն ամենացանկալին է: Մարդն ապրի Տավուշում, թե Երևանում, խաղաղությունը երկուսի համար էլ նույն բարձր արժեքն ունի, որովհետև պատերազմը շատ վատ բան է, սիրելի՛ երեխաներ: Եվ մենք ձեզ ցանկանում ենք, որպեսզի երբեք, որևէ անգամ դուք կրակոց չլսեք: Ամեն, ամեն ինչ անելու ենք, որպեսզի այդպես լինի: Աշխարհի ամենալավ բանը գիրքն է, սիրելի՛ երեխաներ: Ուզում եմ, որպեսզի դուք, ինչպես ասում են՝ պինդ լինեք, առաջին հերթին՝ տղաները: Ուզում եմ, որ մեր աղջիկներն էլ շատ հոգատար լինեն, նմանվեն իրենց մայրերին, իրենց տատերին, լինեն շատ գեղեցիկ, կարգապահ, որ հեռու ապագայում ունենաք ձեզ պես կարգապահ, գեղեցիկ երեխաներ»,- շնորհավորելով մանուկների գալիք Ամանորը և Սուրբ ծնունդն ասաց Նախագահը և ցանկություն հայտնեց, որ մի քանի տարի հետո նրանք այս դահլիճ գան արդեն բոլորովին այլ կարգավիճակով:

«Արմենպրես»-ը զրուցել է Նախագահի նստավայրում հյուրըկալված մանուկների հետ և փորձել մանրամասներ իմանալ նրանց առօրյայի, նպատակների և երազանքների մասին:

Սահմանից ընդամենը 1.5 կմ հեռավորության վրա գտնվող Մովսես գյուղում, օրինակ, արդեն մի քանի ամիս է կրակոցներ չեն հնչում: Գյուղում կյանքն ընթանում է իր բնականոն հունով: Մեզ հետ զրույցում այս մասին պատմեց Մովսեսի փոքրիկ բնակչուհի, իննամյա Լինա Մեջլումյանը և անմիջապես նկատեց. «Բայց Ղարաբաղում են կրակում»: Լինան պատմում է, որ կրակոցների ժամանակ երբեմն դասեր չեն կարողանում անել: Իսկ փողոցում եղած ժամանակ անմիջապես տուն են վազում: Նոր տարուն Լինան Ձմեռ պապիկից խնդրել է խաղաղություն աշխարհին, իսկ իր համար ուզում է Հովհաննես Թումանյանի հ եքիաթների գիրքը: Իսկ իր ամենասիրած հեքիաթը «Կռնատ աղջիկն» է:

2016 թվականին աշխարհին խաղաղություն է մաղթում նաև 12 տարեկան Աբրահամ Գալաջյանը, ում ընտանիքը մեկ տարի առաջ է Սիրիայից տեղափոխվել Հայաստան արդեն իր հինգերորդ տարին թևակոխող սիրիական պատերազմի հետևանքով: Սիրիայում մնացել են այնքան, մինչև որ այլևս մնալու հնար չի եղել: Աբրահամն ուրախ է, որ կարողացել է տեսնել իր պատմական հայրենիքը, Սևանա լիճը, որոնց մասին ժամանակին միայն գրքերից էր կարդացել և լուսանկարներով տեսել: Հայաստանում, 12-ամյա պատանու բնորոշմամբ, կան ապրելու «հարմար» պայմաններ: «Սիրիայում քրիստոնյաներ քիչ կային, իսկ այստեղ բոլորը քրիստոնյա են: Դպրոցներում ռուսերեն չէինք սովորում, արաբերեն էինք սովորում: Այստեղ դասերը մի քիչ բարդ են, բայց աշակերտները ավելի լավ են սովորում»,- ասաց նա, ապա ավելացրեց,- «Այնտեղ ամեն օր ռմբակոծում էին. եթե մի օր կրակոցներ չէին լինում, երջանկություն էր»:

Իսկ Տավուշի մարզի Կողբ գյուղի թիվ 2 միջնակարգ դպրոցի աշակերտ Տարոն Սարգսյանը Նախագահի նստավայր էր եկել հատուկ նպատակով և անհամբեր էր տեսնել ու նկարվել պետության ղեկավարի հետ: «Ես նոր Նախագահին տեսա: Ես մտածում էի, որ միայն կտեսնեմ նրան, բայց կարողացա խոսել նրա հետ, նկարվել: Նախագահն ինձ հարցրեց` լա՞վ եմ սովորում, թե՞ ոչ: Ես ասացի, որ գերազանցիկ եմ, որովհետև իրոք գերազանցիկ եմ»,- հպարտությամբ պատմում է 10 տարեկան Տարոնը: Նպատակասլաց պատանին ծրագրում է դառնալ իրավաբան կամ ծրագրավորող: Ինչպես ինքն է բացատրում` դպրոցում բոլոր առարկաները լավ է սովորում և դեռ չի կողմնորոշվել, թե որ մասնագիտությունը կընտրի:

Տավուշի մարզի նույն գյուղից է նաև 11-ամյա Սոնա Խասիկյանը, ով սովորում է գյուղի թիվ 1 միջնակարգ դպրոցում: Կողբը համարվում է Տավուշի մարզի ամենամեծ գյուղական համայնքը և ունի երկու դպրոց: Սոնան ազատ ժամանակը նկարչությամբ է զբաղվում, դպրոցում լավ է սովորում: Ձմեռ պապիկից էլ խաղաղություն ու իր համար գրքեր է ուզել:

Բերդավան գյուղի 10-ամյա Լիլիա Աբովյանը նույնպես խաղաղություն է ուզում Ձմեռ պապիկից: «Ուզում եմ, որ պատերազմներ չլինեն, մարդիկ չարտագաղթեն, բարի լինեն և աշխատանքով ապահովված»,- ասում է փոքրիկը: Լիլիան բացատրում է, որ ժամանակ առ ժամանակ իրենց գյուղում լսվում են սահմանին հնչող կրակոցները, այդ ժամանակ իրենք իջնում են տան ներքևի հարկը, ու դրա համար էլ ինքը ցանկանում է, որ աշխարհում պատերազմներ չլինեն, ու մարդիկ բարի լինեն:

Սահմանամերձ համայնքներից երեխաները մայրաքաղաք են ժամանել մեկ օր առաջ, և Նախագահի նստավայրում տոնական միջոցառմանը մասնակցելուց բացի, նրանց համար կազմակերպվել է մշակութային լրացուցիչ ծրագիր՝ այցելություն Հայաստանի պատմության թանգարան և Հովհաննես Թումանյանի տուն-թանգարան: Երեխաների համար դեկտեմբերի 23-ին նաև շրջայց է կազմակերպվել գիշերային տոնական Երևանով: