«Պետք է օգտագործել նաև մարզերի հնարավորությունները». «Փաստ»

«Փաստ» օրաթերթը գրում է

Վերջին օրերին մեր երկիր մեծ թվով օտարերկրացիներ են ժամանում, հիմնականում` Ռուսաստանից և Ուկրաինայից: Հոսք, իրոք, նկատելի է, բայց սա զբոսաշրջությանը բնորոշ ժամանակահատված չէ, այս մասին «Փաստի» հետ զրույցում հավաստում է նաև Տուրիզմի հայկական ֆեդերացիայի նախագահ Մեխակ Ապրեսյանը:

«Բավականին ակտիվ հոսք կա: Այս սեզոնին նման հոսք չէր լինում, այն ավելի շատ սկսվում էր մարտի կեսերին, երբ Նովրուզով պայմանավորված՝ Իրանից զբոսաշրջիկները ժամանում էին Հայաստան: Այս օրերին մեր երկիր օտարերկրացիների հոսքը պայմանավորված է ուկրաինական ճգնաժամով: Վիճակագրական, դասական առումով այս մարդիկ հաշվառվում են որպես զբոսաշրջիկներ, նրանք գալիս են Հայաստան ժամանակավոր, մեր երկրի ռեզիդենտներ չեն, չեն աշխատում տեղի գործատուների մոտ և չեն վարձատրվում տեղի աղբյուրներից, լրիվ համապատասխանում են զբոսաշրջիկ սահմանմանը: Այլ բան է, իհարկե, թե որն է Հայաստան ժամանելու նրանց նպատակը: Նրանք եկել են այստեղ ոչ թե հանգստի, ժամանցի, պատմամշակութային վայրեր այցելելու համար, այլ գալիս են կա՛մ տրանզիտով, կա՛մ էլ բիզնես նպատակով: Նման կարծիքներ ևս կան, կարծես թե, անգամ վիճակագրություն, որ բիզնեսներ են տեղափոխում Հայաստան և այլն: Մոտավոր հաշվարկներով` մոտ երկու տասնյակ հազար զբոսաշրջիկ արդեն ժամանել է, եթե կոպիտ հաշվարկ ենք անում չվերթների քանակով: Նրանք Հայաստանում անցկացնում են (անցկացնելու են) մեկ-երկու շաբաթ կամ մի քանի օր, մեր երկրում մնալու ժամկետները տարբեր են: Կան մարդիկ, որոնք ավելի երկար ժամանակով են մնալու»,-ասում է Ապրեսյանը:

Չնայած մարդկանց նման հոսքին, ֆեդերացիայի նախագահն ուշադրություն է հրավիրում մեկ այլ հանգամանքի վրա. այս ընթացքում եղել են նաև չեղարկումներ: «Մարդիկ, որոնք որոշ ժամանակ առաջ պլանավորել էին, որ Հայաստան կգան ժամանցի և հանգստի նպատակով, չեղարկում են իրենց այցերը, իհարկե, ոչ բոլորը, բայց չեղարկումներ ունենք: Մի կողմից` պատժամիջոցների պայմաններում Հայաստանը քիչ այլընտրանքային երկրներից է, որտեղ մարդիկ կարող են Ռուսաստանից գալ, այս դեպքում զբոսաշրջային այցելությունների շեշտակի աճ ենք ունենում, բայց մյուս կողմից` կա զսպող գործոն, այն է՝ ռուսական ռուբլու արժեզրկումը: Սա գնողականությունն էականորեն նվազեցնում է: Բացի դրանից, այս ընթացքում շեշտակի բարձրացել են ավիատոմսերի գները, այս ընթացքում հանգստի մեկնելու ցանկությունը մեծ չէ: Սրանք բոլորը զսպող գործոններ են»,-նշում է «Փաստի» զրուցակիցը:

Ընդգծում է` առաջիկա մեկ-երկու շաբաթվա ընթացքում ամեն ինչ ավելի պարզ կլինի: «Շատ հարցերում կանխատեսումներ անել չենք կարող: Մինչև ապրիլ նույնիսկ չեղարկումներ ունենք, կան, իհարկե, նաև այցելություններ, չեղարկումները համատարած բնույթ չեն կրում: Բայց, տեսեք, մի կողմից՝ մարդկանց մեծ հոսք, շեշտակի աճ ու պահանջարկ, մյուս կողմից՝ չեղարկումներ, որոնց պարագայում մարդիկ պլանավորել էին իրենց հանգիստն ու ժամանցը Հայաստանում անցկացնել»,-հավելում է Ապրեսյանը: Նրա դիտարկմամբ, հոսք կա նաև դեպի մարզեր, բայց այս դեպքում զբոսաշրջիկները հիմնականում հաստատվում են Երևանում: «Իհարկե, պետք է ուղղորդել դեպի մարզեր, խորհուրդ տալ, որ այցելեն: Սա հետաքրքիր փորձառություն կլինի մեր երկրին ծանոթանալու առումով: Ճիշտ է, շատերն այս օրերին Հայաստան գալիս են ճգնաժամով, այլ խնդիրներով պայմանավորված, բայց առիթը բաց չեն թողնում պատմամշակութային վայրեր այցելելու, շրջելու, երկիրը ճանաչելու համար: Սա, այսպես թե այնպես, տեղի ունենում է»,-ընդգծում է մեր զրուցակիցը:

Վերջին օրերին շատ խոսվեց այն մասին, որ բարձրացել են վարձով բնակարանների, ինչպես նաև հյուրանոցային սենյակների գները: «Պետք է անպայման շեշտեմ, որ մեզ մոտ հյուրանոցների գները չեն բարձրացել: Ի պատիվ մեր ժողովրդի, նաև մեր մասնավոր հատվածի, ըմբռնումով ենք մոտենում և առիթից չենք օգտվում, արհեստականորեն կամ թեկուզ շուկայի պահանջարկից ելնելով՝ գները չեն բարձրացել: Սա մեր երկիր այցելող հյուրերը ևս պետք է հաշվի առնեն: Օրավարձով բնակարանների մասին հետևյալը կասեմ: Հրապարակումներ կային, որ բնակարաններ կան, որոնց օրավարձը 400 հազար է, անգամ Գյումրիում 1000 ԱՄՆ դոլարով վարձով բնակարան է տրվում: Մեր երկրում արդեն մի քանի տարի է՝ օրավարձով բնակարաններ տրամադրելու միտում կա, ինչպես ամբողջ աշխարհում, այնպես էլ Հայաստանում նոր ինդուստրիա է ձևավորվում: Օրավարձով բնակարանները հյուրանոցային տնտեսության օբյեկտի ձև են դառնում: Անգամ առաջարկել ենք, որ նրանց հյուրանոցային տնտեսության օբյեկտի կարգավիճակ տրվի, ինչը շատ կարևոր է:

Օրավարձով բնակարանների գները տատանվել են տասը հազարից մինչև հարյուր հազարի սահմաններում` կապված նրա հետ, թե որտեղ է գտնվում բնակարանը, ինչ շքեղության է, ինչ պայմաններ ու քանի սենյակ ունի: Եթե բնակարանը վարձով տրվի օրական տասը հազար դրամով, ամսական այդ նույն գինն է ստացվում: Իհարկե, եթե բնակարանը Կենտրոնում է, լավ կահավորված ու լավ պայմաններով, դրա միջին գինը 2025 հազար է: Բնական է, եթե բնակարանը վարձով են վերցնում երկար ժամկետով, միջին գին է ստացվում, օրավարձի դեպքում մի քիչ ավելի թանկ է: Մեր դիտարկումներով, այո, գնի բարձրացում, հնարավոր է, մի փոքր եղել է, բայց շեշտակի աճի մասին խոսք լինել չի կարող, բացի դա, հյուրանոցները չեն բարձրացնում գինը, իսկ օրավարձով բնակարանների տարբերակին միշտ դիմել են, քանի որ դրանք ավելի էժան են եղել, քան հյուրանոցները: Օրավարձով բնակարանների գները չեն կարող հյուրանոցի գներից ավելի բարձր լինել»,-նշում է Տուրիզմի հայկական ֆեդերացիայի նախագահը:

Ամեն տարվա պես այս տարի ևս մարտի կեսերին ակնկալվում է նաև իրանցի զբոսաշրջիկների հոսք մեր երկիր: Պատրա՞ստ ենք նման քանակի զբոսաշրջիկներ ընդունել մեր երկրում: «Այժմ մեր երկիր ժամանողները հիմնականում մայրաքաղաքի կենտրոնական հատվածում են հաստատվում: Պետք է հատկապես օգտագործել մարզերի հնարավորությունները, և պատրաստ կլինենք ընդունել մեծ թվով զբոսաշրջիկների»,եզրափակում է Մեխակ Ապրեսյանը:

ԼՈՒՍԻՆԵ ԱՌԱՔԵԼՅԱՆ

Մանրամասները՝ «Փաստ» օրաթերթի այսօրվա համարում