Մազկտրիչ. դանակներից, կացիններից ու թրերից մինչև էլեկտրական սարքեր. «Փաստ»

«Փաստ» օրաթերթը գրում է

Էվոլ յուցիայի ընթացքում մարդիկ սկսել են ավելի ու ավելի մեծ ուշադրություն դարձնել իրենց արտաքին տեսքին: Արդյունքում նրանք սկսել են մտածել, թե ինչպես բարելավել արտաքին գեղեցկությունը պահպանող սարքերը։ Սկզբում մարդը դանակներ, կացիններ ու թրեր էր օգտագործում մազերը կտրելու համար, սակայն նման գործիքներ օգտագործելուց հետո սանրվածքը տգեղ տեսք էր ունենում, իսկ գործընթացն ինքնին շատ անհարմար էր։

Այս թերությունները խթան հանդիսացան մազերը կտրելու հատուկ գործիքների ստեղծման համար, մասնավորապես մկրատի և մազկտրիչի: Այդ իրերի հայտնվելով՝ վարսավիրների առաքելությունը, այն է՝ մարդկությանը գեղեցիկ և ոճային դարձնելը, զգալիորեն պարզեցվել է: Ենթադրվում է, որ մազ կտրելու առաջին սարքը հայտնվել է 19-րդ դարի սկզբին Ամերիկայի Միացյալ Նահանգներում: Հեղինակը Լելանդ անունով մի մարդ էր։ Բայց այդ պնդման հակառակորդներ էլ կան։ Ոմանք կարծում են, որ սարքը հայտնվել է արևոտ Իտալիայում, իսկ նրա ստեղծողը եղել է իտալացի ոճաբան Ալբերտո Գոմեսը, որը շատ սիրված էր տեղի «էլիտայի» կողմից։

Առաջին մազկտրիչը եղել է մեխանիկական: Այդ սարքը օգտագործվել է տղամարդկանց և երեխաների մազերը կտրելու համար։ Սարքով հեշտ էր աշխատել և սպասարկել մարդկանց: Միակ բանը, որ անհարմարություն էր պատճառում աշխատանքի ընթացքում, ձեռքերի ցավն էր, որը առաջանում էր մեքենայի բռնակի ինտենսիվ սեղմումից։ Կանանց կարճ սանրվածքների նորաձևության գալուստով մազկտրիչը ընդունելի է դարձել նաև հասարակության գեղեցիկ կեսի վարսահարդարների կողմից: Հիմա էլ որոշ հեռավոր վայրերում, որտեղ կան հոսանքազրկումներ, կամ երկարաժամկետ արշավների ժամանակ դեռ օգտագործվում են ձեռքի մազկտրիչներ:

Քաղաքների և գյուղերի գլոբալ էլեկտրաֆիկացման և վարսահարդարների աշխատանքի որակը բարելավելու, ինչպես նաև հաճախորդների թվի ավելացման արդյունքում ստեղծվել է մազկտրիչ սարքի նոր մոդելը՝ էլեկտրական մազկտրիչը: Պարզ պլաստիկ պատյանում թաքցվել է շարժիչ, որը թույլ է տալիս շեղբերին արագ շարժվել՝ շփվելով միմյանց, իսկ վարպետին՝ կենտրոնանալ միայն սանրվածքի վրա: 1911 թվականին ԱՄՆ-ի Իլինոյս նահանգում երիտասարդ ուսանող Լեո Ջ. Ուոլը, ճշգրիտ գիտություններն ուսումնասիրելու փոխարեն, երազում էր էլեկտրական շարժիչի անհայտ հնարավորությունների մասին։ Այդ եռանդուն երիտասարդ ջենթլմենն առաջինն էր, ով նկատել էր, որ մազ կտրող ձեռքի սարքը թարմացման կարիք ունի: Այսպիսով, երիտասարդ մշակողի փայլուն գաղափարների շնորհիվ ծնվել է մազ կտրելու առաջին էլեկտրամագնիսական մեքենան, որը կոչվում էր «Մոդել 66»:

Այդ մոդելը ամենակարճ ժամանակում հանրաճանաչություն է ձեռք բերել ամբողջ աշխարհում, այդ սարքը գնել ցանկացողներին վերջ չի եղել: Այդ ժամանակից ի վեր էլեկտրական մազկտրիչ սարքի աշխատանքի սկզբունքը չի փոխվել: Միակ բանը, որ փոխվել է, արտաքին պատյանն է։ Բացի դա, բոլոր տեսակի «չափիչ» վարդակների տեսականին ավելացել է այնքան, որքան պահանջում է ժամանակակից նորաձևությունը: Մարդիկ չեն անտեսել նաև իրենց փոքր «եղբայրներին»։

Մազկտրիչները սկսել են ավելի ու ավելի օգտագործվել կենցաղային նպատակներով: Այդ սարքի օգնությամբ տերերը սկսել են վերափոխել իրենց շներին և խուզել ոչխարների բուրդը։ Արդեն մի ամբողջ դար է, որ մարդիկ օգտագործում են այդ հրաշքը և վայելում դրա պարզությունն ու արդյունավետությունը։

ԿԱՄՈ ԽԱՉԻԿՅԱՆ

Մանրամասները՝ «Փաստ» օրաթերթի այսօրվա համարում