«Պետք է վռնդել և դատել». «Փաստ»

«Փաստ» օրաթերթը գրում է

 

Հայաստանի և Արցախի շուրջ առկա գործընթացները կատարվում են մի իրադրությունում, երբ ողջ աշխարհը բավականին տուրբուլիզացված վիճակում է: Ցանցային հետազոտությունների ինստիտուտի տնօրեն Գագիկ Հարությունյանի դիտարկումն է, որի խոսքով, մեր երկրի շուրջ հնարավոր գործընթացները նաև աշխարհաքաղաքական իրողություններից են կախված:

«Այսօր ընթացող պատերազմն Ուկրաինայի դեմ չէ: Սա պատերազմ է Արևմուտքի, Ռուսաստանի և Չինաստանի միջև: Եվ հենց Արևմուտքի ներկայացուցիչները բավականին խճճվել են այս իրավիճակում: Տարօրինակ ձևով Եվրոպան այսօր նույնպես շատ հարցերում դարձել է անգլոսաքսերի կամակատարը, և շատ հարցերում հենց իրենք են երբեմն դժգոհում ստեղծված իրադրությունից: Եվ այս իրավիճակում դժվար էր պատկերացնել լուրջ բանակցություններ նաև մեզ առնչվող հարցերի պարագայում: Ճիշտ է՝ Ռուսաստանը շարունակում է ավելի հստակ իր դիրքորոշումները հայտնել, բայց ՌԴ-ի դիրքորոշումները ևս փոփոխվում են՝ ելնելով ստեղծված իրադրությունից: Առկա իրողությունները հաշվի առնելով՝ ներկայիս խառնաշփոթն այդ առումով զարմանալի չէ: Պետք է ընդգծել պարզապես, որ Նիկոլ Փաշինյանն այդ խառնաշփոթությունների ստեղծման մեջ իր ուրույն դերակատարությունն ունի: Իհարկե, ավելի քիչ մասշտաբով, քան, օրինակ՝ Զելենսկին, բայց նա, ամեն դեպքում, խառնաշփոթ է ստեղծել տարածաշրջանում»,-«Փաստի» հետ զրույցում ասաց Գ. Հարությունյանը:

Նրա խոսքով, իհարկե, հեշտ չէ այս ամենը դիտարկել ու սառը վերլուծել զուտ աշխարհաքաղաքական իրողությունների տեսանկյունից, որովհետև խոսքը մեր հայրենիքի, մեր երկրի ու ժողովրդի ճակատագրի մասին է. «Պարզապես պետք է արձանագրենք, որ սարսափելի ծանր ժամանակներ են, և բավականին խառը իրավիճակ է նաև Հայաստանի հետ կապված խնդիրների դեպքում: Աշխարհում առկա ծանր վիճակը մեր արդեն իսկ եղած խնդիրների վրա մեծ ազդեցություն ունի»: Գագիկ Հարությունյանն այս համատեքստում շեշտեց՝ առկա իրողություններից է կախված Արցախի ու Հայաստանի ճակատագիրը: «Այսօրվա դրությամբ ռուս խաղաղապահներն Արցախում են, ըստ իս՝ երկար դեռ պետք է մնան, եթե նրանք չլինեն, Արցախը կդատարկվի: Այսօր Արևմուտքը ինքնորոշման իրավունքը, ինչպես նաև ժողովրդավարության շատ սկզբունքներ բացառապես իր շահերին է ծառայեցնում: Հիշենք, թե իրենք ինչպիսի մեծ եռանդով Կոսովոն հռչակեցին անկախ պետություն: Մենք տեսնում ենք, որ, սակայն, ամենևին շահագրգռված չեն Արցախի անկախությունը ճանաչելու առումով, իսկ ինքնորոշման իրավունքը մոռացվել է: Այսօր Արցախի խնդիրը բխելու է վերոնշյալ պատերազմի արդյունքներից»,-ընդգծեց մեր զրուցակիցը:

Նա շեշտեց, որ այսօր «անգլոսաքսոնյան դեմոկրատիան» կոչված չէ պաշտպանել մարդկանց իրավունքները: «Եվ այս համատեքստում մեր իրողություններին անդրադառնալուց առաջ էլի պետք է այլ օրինակ բերեմ: Մենք տեսանք, թե ինչպես ամբողջ Ուկրաինան սատանայական մի կազմակերպության վերածվեց: Իրենք կարողացան ուկրաինացիներից՝ ազգից ստեղծել մի հասարակություն, որը, փաստորեն, պատերազմում է իր եղբայրների հետ: Սա վերոնշյալ ծանր իրավիճակի մի մասն է: Լրացուցիչ մասն էլ մեզ մոտ է: Այդ ծանրությունը Հայաստանում, այսպես կոչված, իշխող ուժի տեսքով է արտահայտվում, որի ներկայացուցիչներն իրականում իրենց անգլոսաքսոնական տերերի խամաճիկն են: Իրենք արդեն վաճառել են մեր երկիրը, պարզապես մնում է իրագործման փուլն ավարտին հասցնեն, ինչը գուցեև չկարողանան: Ինչո՞ւ, որովհետև, իմ կարծիքով, այն պատերազմը, որն այսօր վարում է ոչ միայն Ռուսաստանը, այլև Չինաստանը, իրենց համար հաղթանակով է ավարտվելու:

Այդ հաղթանակը նաև մեզ համար իր դրական ազդեցությունը կունենա: Իհարկե, այս ամենից զատ, առաջին հերթին ինքներս պետք է կարողանանք ուժ գտնել և այս իշխանություններին՝ «քայլականներին» վռնդել, դատել և պատժել հենց մեր երկրում: Հակառակ դեպքում կարող ենք ականատես լինել մի իրավիճակի, ինչի մասին այսօր խոսում են բոլոր նրանք, ովքեր իրենց երակներում հայի արյուն, հոգի ու միտք ունեն: Դա բերելու է հայկական պետականության ոչնչացմանը ու շատ ծանր հետևանքներ է ունենալու բոլորիս համար: Սա է պատճառը, որ մեզ համար առաջին խնդիրն այս սրիկաներին հեռացնելն է»,-ընդգծեց նա:

Գագիկ Հարությունյանի խոսքով, այս իշխանություններին հեռացնելու գործընթացը դյուրին չէ: «Այս պարագայում չէր էլ կարող դյուրին լինել: Ամեն դեպքում, հույս ունենանք, որ ձևավորված շարժումը կհասնի իր նպատակներին, որովհետև մարդկանց բավականին ստվար զանգված արդեն հասկացել է փաշինյանական ռեժիմի էությունը, բոլոր վտանգները հայրենիքի համար: Պետք է օգնել ձևավորված շարժմանը՝ հաղթանակ գրանցելու տեսանկյունից, որովհետև, ի տարբերություն 2018-ի, այսօր սթափ և հայեցի մտածողների թիվը բավականին աճել է, թեպետ այս իշխանություն կոչվածը շարունակում է իր մանիպուլ յացիոն քաղաքականությունը: Օրինակ՝ չասելով, թե Արցախը երբեք չի լինելու Ադրբեջանի կազմում, հերթական մանիպուլյացիոն քաղաքականությունն ու վարքագիծն են դրսևորում»,-ասաց Գ. Հարությունյանը՝ նկատի ունենալով նաև այն պատճառաբանությունները, թե ի պաշտոնե չեն կարող նման արտահայտություն անել:

«Վաստակավոր ստախոս Նիկոլ Փաշինյանին պատահական չեն ընտրել իր դերի համար: Նա խամաճիկ է, որին նշանակել են: Նա ամեն ինչ մանուպուլացնում է, զբաղվում է նրանով, ինչով մշտապես է զբաղվել»,-եզրափակեց մեր զրուցակիցը:

ԱՆՆԱ ԲԱԴԱԼՅԱՆ

Մանրամասները՝ «Փաստ» օրաթերթի այսօրվա համարում