«Խաղաղություն մուրացողների դերի միջոցով կործանում են մեր պետականությունը». «Փաստ»

«Փաստ» օրաթերթը գրում է

Նախօրեին Ադրբեջանի նախագահ Իլհամ Ալիևը կրկին ռազմատենչ հռետորաբանությամբ ու ագրեսորի դիրքերից է խոսել: Մասնավորապես, նշել է, որ Արցախի կարգավիճակի մասին հայտարարությունները վտանգավոր են Երևանի համար, և «եթե Հայաստանը շարունակի կասկածի տակ դնել Ադրբեջանի տարածքային ամբողջականությունը, Ադրբեջանն այլ ընտրություն չի ունենա, քան կասկածի տակ դնել Հայաստանի տարածքային ամբողջականությունը»:

«Հայ ազգային ճակատ» կազմակերպության նախագահ, ռազմական գործիչ Գևորգ Գևորգյանը «Փաստի»հետ զրույցում այս հայտարարությունները դիտարկել է ներկա ու նախկին իրողությունների համատեքստում: «Նախ՝ ֆիքսենք, որ կատվի մլավոցը դարձավ ագրեսիվ կոչված հռետորաբանություն, որովհետև դրսի ուժերի աջակցությամբ Հայաստանում իշխանությունը զավթեցին թուրք-ադրբեջանական տանդեմի սպասարկողները: Այս իշխանազավթները չորեքթաթ, խնդրողի և աղերսողի, խաղաղություն մուրացողների դերում են: Թեպետ իրենք այլ դերում չեն կարող լինել, քանի որ դա հենց այն դերն է, ինչի համար իրենք եկել են իշխանության: Սա այն դերն է, որի միջոցով իրենք կործանում են մեր պետականությունը: Ինչքան մնան իշխանության, այնքան ավելի ու ավելի վատ վիճակում ենք լինելու: Ալիևի այդ հռետորաբանություն կոչվածը կվերանա այն ժամանակ, երբ սրանց պատասխանատվության ենթարկենք: Այդ ժամանակ թշնամին կանգ է առնելու ու կրկին փորձելու է կատվի մլավոցով դիմել միջազգային հանրությանը և օգնություն խնդրել՝ ասելով, որ հայ ժողովուրդը կրկին արթնացել է, ու շատ հավանական է՝ շուտով իրենց «հերն անիծվի»»,-նշեց Գ. Գևորգյանը:

Վերջինս ընդգծեց՝ իրողությունները վաղ անցյալում չեն եղել, և այդ իմաստով հեշտ է վերլուծել ու հասկանալ գործընթացները. «Հիշենք, թե ինչպես էր Նիկոլն սկսում բանակցել իր զրոյական կետից, կամ, ինչպես ինքն էր ասում, ինչի մասին ուզում, այդ մասին էլ բանակցում էր: Ասում էր նաև, որ նախկիններն ամեն ինչ տվել էին, դրա համար էլ զրոյական կետից էր սկսելու: Բնականաբար, ինչպես նախկինում, հիմա ևս մանիպուլացնում է ժողովրդին, փորձում բթացնել ժողովրդի ինքնապահպանման բնազդը: Բթացնելով՝ փորձում է արագ իրականացնել այն գործողությունները, ինչի համար եկել է: Խոսքը Արցախը հանձնելուց բացի, նաև Հայաստանի Հանրապետությունը կապիտուլ յացիայի ենթարկելու նպատակի մասին է: Հիշենք նաև, թե ինչպես էր ասում՝ «պայքարելու ենք», «չկասկածեք իմ՝ գերագույն գլխավոր հրամանատար լինելու հարցում»: Գնաց, Արցախում գոռաց «Արցախը Հայաստան է և վերջ», հետո եկավ ու ասաց՝ «ինչ էլ ուզում է լինի, մենք մեզ պարտված չենք ճանաչելու»: Հետո խոսեց խաղաղության դարաշրջանի մասին, իսկ արդեն անցած շաբաթ ԱԺ-ում ասաց՝ «խաղաղությունը մեծ հարցականի տակ է»: Իրականում սա նույն ձեռագրի, նույն մոտեցման մասին է: Սկզբից մի բան է խոսում, հետո՝ ուրիշ, հետո՝ պատերազմ, և ասում է՝ նայեք, մենք մեղավոր չենք: Երեք փուլով են աշխատում: Հիմա արդեն երրորդ փուլում են, ու ասում է՝ «միջանցքը կարմիր գիծ է»: Զուգահեռ՝ Ալիևն այնտեղից հոխորտում է, ըստ էության, ասելով՝ «խելքի չեկաք, մենք հարցի լուծումն արդեն ուժային ճանապարհով ենք տալու»: Ու երբ սրանք ասում են խաղաղությունը հարցականի տակ է, հետո էլ ասելու են՝ ժողովուրդ, մենք մեղավոր չենք»:

Ռազմական գործիչը վերոնշյալ հայտարարությունների մեջ հստակ վտանգ է տեսնում. «Ըստ էության, իրենց հերթական պլանն է նախապատրաստվում: Խոսքը նոր ռազմական գործողությունների վերսկսման հավանականության մասին է, ինչի ֆոնին փորձ կարվի ներկայացնել, թե չկարողացան պահել ու տվեցին նաև Սյունիքը: Չմոռանանք նաև, որ Ռուսաստանի հետ մի խաղ են խաղում, Արևմուտքի հետ՝ մեկ այլ խաղ: Չի բացառվում, որ վերջում նորից ասեն՝ մեր ռազմավարական գործընկերոջը, ՀԱՊԿ անդամ երկրներին հերթական անգամ դիմեցինք, բայց մեզ կրկին հուսախաբ արեցին: Իրենք, մեծ հաշվով, իրենց առ ու ծախով, թալանով, երբեք չեն եղել ու չեն էլ լինելու իշխանություն: Իրենք վատթարագույնն էին, ինչը կարող էր պատահել հայ ազգի հետ»:

Գևորգ Գևորգյանի խոսքով, երբ մի բանից փախչում ես, ավելի շուտ է հասնում, քան կհասցնես փախչել:

«Իրականում հարկավոր չէ փախչել պատերազմից: Հոխորտացող թուրքը երբեք իրենից ոչինչ չի ներկայացրել, չի էլ ներկայացնելու:Եթե Հայաստանում իրենց կամակատարների կողմից իշխանազավթում չլիներ, այլ իրավիճակ կլիներ: Ամեն դեպքում, երբ մենք ազգովի նորից և ուղիղ աչքերով կնայենք պատերազմին, այդ ժամանակ կտեսնենք, թե ինչպես է թուրքը միանգամից կանգ առնում ու ասում՝ «իրավիճակ փոխվեց, պետք է հասկանանք՝ ինչ ենք անում»: Հայաստանում իշխանազավթներն այսօր սողացողի քաղաքականություն են վարում, ինչը փորձում են փաթաթել հայ ազգի պարանոցին, որ ցույց տան, թե հայ ազգն իրենց նման է, խնդրող է, վախեցող է, կոնֆիլկտներից խուսափող է: Հայ ազգն իրականում Աստծո լույսը կրող ժողովուրդ է: Մենք ագրեսոր չենք եղել, բայց յուրաքանչյուր ագրեսորի արժանի հակահարված ենք տվել, տալիս ենք ու տալու ենք: Իշխանազավթների այս քաղաքականությունը հայ ազգինը չէ: Դա միայն իրենց քաղաքականությունն է, որն ուզում են փաթաթել հայ ազգի պարանոցին, բայց չի ստացվելու, հայ ազգը թույլ չի տալու՝ արթնանալով թեկուզև վերջին պահին»,-եզրափակեց Գ. Գևորգյանը:

ԱՆՆԱ ԲԱԴԱԼՅԱՆ

Մանրամասները՝ «Փաստ» օրաթերթի այսօրվա համարում