Հատիս լեռան վրա մեկնարկեցին Հիսուս Քրիստոսի արձանի կառուցման աշխատանքները
SOCIETYԼրագրողները, քաղաքացիները մեքենաներով բարձրանում են Հատիս լեռը: Տեղ-տեղ ուղիղ, տեղ-տեղ ոլորապտույտ ճանապարհը մեքենաների համար արդեն հարմարեցված է, բայց որոշ մեքենաներ, իրենց տեխնիկական կառուցվածքով պայմանավորված, դեռևս չեն կարող հաղթահարել նոր-նոր կարգի բերվող, դեռևս քարքարոտ ուղին: Ճանապարհի երկու կողմերում աշխատում են տրակտորները, արդեն իսկ տեղադրված են մի քանի էլեկտրասյուներ: Ճանապարհային դժվարությունը հաղթահարված է, արդեն լեռան գագաթին ենք, որտեղ հուլիսի 9-ին մեկնարկեցին Հիսուս Քրիստոսի արձանի կառուցման աշխատանքները:
Ներկա էին ԲՀԿ նախագահ Գագիկ Ծառուկյանը, ՀՀ էկոնոմիկայի նախարար Վահան Քերոբյանը, ՄԱԿ-ի Զբոսաշրջության համաշխարհային կազմակերպության գլխավոր քարտուղար Զուրաբ Պոլոլիկաշվիլին, տեղական և արտասահմանյան լրատվամիջոցների ներկայացուցիչներ, հյուրեր: Պարոն Ծառուկյանին ուղղված առաջին հարցը վերաբերում էր տեղանքի ընտրությանը, ինչու հենց Հատիս լեռը: Նշեց` տևական քննարկումներ են եղել, մի քանի տեղանք ուշադրության կենտրոնում հայտնվեցին` Խոր Վիրապը, Սևանա թերակղզին, Ծաղկաձորը: «Տեսաք արձանի տեղադրման տեղը, դիրքը, մեր երկրի տարբեր հատվածներից արձանը տեսանելի կլինի, այդ պատճառով մեր ընտրությունը կանգ առավ Հատիսի վրա: Բացի դա, կային քննարկումներ, որ արձանը չտեղադրվի պատմամշակութային տարածքներում, հետևել ենք նաև այդ առաջարկներին»,-նշեց Գագիկ Ծառուկյանն` ընդգծելով, որ այս նախաձեռնությունը մեր ժողովրդին համախմբելու կարևոր ուղերձն է կրում իր մեջ: Հետաքրքրվեցինք նաև ենթակառուցվածքներից:
ԲՀԿ նախագահն ասաց, որ ճանապարհը, բնականաբար, կասֆալտապատվի: «Մյուս կողմից լինելու է ճոպանուղին` մոտավորապես 5 կմ երկարությամբ, այս մասով ևս քննարկումներ, քարտեզագրման աշխատանքներ են սկսվել: Արձանը պատվելու է ֆոսֆորով, գիշերային ժամերին ինքն իրենով լուսավորվելու է: Վերևի հատվածում` արձանի շուրջբոլորը, որևէ բան չի լինելու: Իսկ ահա սկզբնամասում կլինեն սրճարաններ, հյուրանոցներ, ռեստորաններ, այն, ինչ անհրաժեշտ է, որպեսզի մարդիկ կարողանան իրենց ժամանակը վայելել: Արդեն իսկ աշխուժություն է նկատվում մարդկանց շրջանում, բավականին աճել են հարակից հողատարածքների արժեքները, մարդիկ ցանկանում են ներդրումներ կատարել և սա շատ լավ է: Առհասարակ, եթե ես ինչ-որ գործ եմ ձեռնարկում, ապա ամեն ինչ շատ հարմարավետ ու լավը պետք է լինի, ի վերջո, մենք այս արձանով նաև ամբողջ աշխարհին ենք ներկայանալու: Աշխարհում առաջինն ենք քիստոնեություն ընդունել, այո, շատ երկրներում Հիսուս Քրիստոսի արձաններ կան, բայց մերը վստահաբար տարբերվելու է: Երբեմն հարցնում են` իսկ ինչու պիտի Հայաստան գան, այլ ոչ թե Բրազիլիա գնան: Մարդիկ ազատ են իրենց ցանկությամբ գնալու ուր ցանկանում են, բայց վստահ եմ, որ երբ ամեն ինչ պատրաստ լինի, մեր երկիր զբոսաշրջիկների հոսքն անընդհատ է լինելու: Երբ մարդիկ գան ու տեսնեն արձանը, վերադառնան իրենց երկիր, պատմելու են դրա մասին իրենց բարեկամներին ու ընկերներին, նրանք էլ ցանկություն կունենան այցելել մեր երկիր ոչ միայն արձանը տեսնելու, այլ նաև մեր հյուրընկալությունը վայելելու համար: Սա մեծապես նպաստելու է զբոսաշրջության աճին, ամեն զբոսաշրջիկ միջինում 1000 դոլար փող է թողնելու երկրում, սրանք միջին հաշվարկներ են: Բայց ամենակարևորը` աշխարհին հիշեցնում ենք, որ առաջինն ենք ընդունել Քրիստոնեությունը, պատմում մեր մշակույթի ու արժեքների մասին»,-եզրափակեց Գագիկ Ծառուկյանը:
ՄԱԿ-ի Զբոսաշրջության համաշխարհային կազմակերպության գլխավոր քարտուղար Զուրաբ Պոլոլիկաշվիլին շնորհավորեց Գագիկ Ծառուկյանին այս հրաշալի նախաձեռնության կապակցությամբ: «Սա շատ նորարարական մի բան է այս տարածաշրջանում: Վստահ եմ, որ երեք տարի անց այս գեղեցիկ վայրի բացման արարողությանը ներկա կգտնվենք: Տեսել եմ Հ. Քրիստոսի տարբեր արձաններ, բայց Հայաստանում տեղադրվելիքը վստահաբար շատ յուրօրինակ է լինելու: Հայաստանը զբոսաշրջային նոր նախագծերի կարիք ունի, և սա կլինի դրանցից մեկը: Կբացվեն մի շարք նոր աշխատատեղեր, կգործակվեն ենթակառուցվածքները, սա կխթանի Հայաստան` էլ ավելի մեծ թվով զբոսաշրջիկների ժամանելուն»,-ընդգծեց Զուրաբ Պոլոլիկաշվիլին:
Էկոնոմիկայի նախարար Վահան Քերոբյանը նշեց, որ սա գուցե Հայաստանում ամենամեծ մասշտաբի զբոսաշրջային նախագիծն է, և Կառավարությունը պատրաստ է ամեն կերպ աջակցել դրան: «Ստորագրեցինք հուշագիր, որով Կառավարությունն իր օժանդակությունը հայտնեց այս նախագծին: Կստեղծվի աշխատանքային խումբ` բոլոր խնդիրներին հընթացս լուծում տալու համար»,-հավելեց Քերոբյանը:
Լուսինե Առաքելյան