«Ես ինձ լիարժեք հայուհի եմ համարում, իմ երակներով հայկական արյուն է հոսում»․ Օֆին՝ Հայաստան գալու, մանկության, հետագա ծրագրերի և հայտնիության մասին

Ամիսներ առաջ Ամերիկաբնակ ազգությամբ հայ երիտասարդ երգչուհի Օֆին հանրությանը ներկայացավ «Սիրտս պատրաստ ա» տեսահոլովակով, որը համատեղ աշխատանք էր Super Սաքոյի և Հակի հետ: Այժմ երգչուհին աշխատանքային ծրագրերն իրականացնելու նպատակով ժամանել է Հայաստան՝ իր բացառիկ հարցազրույցը վստահելով  Tert.am Life–ին։

–Տևական դադարից հետո առաջին անգամ գալիս եք Երևան, կմանրամասնե՞ք՝ ինչ ծրագրեր պետք է իրականացնեք Երևանում։

–Վերջին անգամ Հայաստանում եղել եմ 2014 թվականին՝ տատիկիս հետ։ Հուլիսի 20–ի գիշերը ժամանել եմ Հայաստան և հենց նույն օրը երեկոյան մասնակցել Աուպեր Սաքոյի մենահամերգին՝ բացումն անելով։ Մենք պատրաստել ենք նաև «Double» ալբոմը, իսկ երգերի պրեմիերաները կայացել են հենց մենահամերգի ժամանակ։ 

–Գիտեմ, որ ձեր հայրը ազգությամբ հայ է, իսկ մայրը աֆրո-ամերիկուհի և ֆիլիպինուհի է, իսկ դուք մշտական բնակությամբ ապրում եք Միացյալ Նահանգներում։ Դուք ձեզ համարու՞մ եք հայուհի, երբ ասում են հայրենիք, որո՞նք են առաջին ասոցիացիաները։ 

–Ես ինձ լիարժեք հայուհի եմ համարում և հայրենիք ասելիս միմիայն Հայաստանն եմ պատկերացնում։ Դա պայմանավորված է նրանով, որ ես մեծացել եմ հայկական ընտանիքում, հայկական միջավայրում։ Ի վերջո, իմ երակներով հայկական արյուն է հոսում։  

–Հարցազրույցներից մեկում նշել եք, որ շատ են եղել խոսակցություններ, որ արտաքնապես նման չեք հայի, հիմա ի՞նչ եք կարծում, կբախվեք նման խնդիրների Հայաստանում, երբ փողոցում քայլելիս խոսեք  հայերենով, իսկ մարդիկ զարմանք ապրեն, որ աֆրոամերիկուհու արտաքինով աղջիկը հայերեն է խոսում։ 

–Չեմ կարծում, որ մարդիկ երբևէ կդադարեն զարմանալ, որ իմ արտաքին տվյալներով աղջիկն այսքան պարզ հայերենով է խոսում։ Հիմա մարդիկ ինձ ճանաչում են որպես երգչուհի, բայց միևոնւյն է ամեն անգամ այդ զարմանքն առաջանում է շփման ժամանակ։

–Իսկ ինչպե՞ս եք սովորել հայոց լեզուն և սկսել վարժ գրել–կարդալ հայերենով։

–Հայերենն իմ առաջին և մայրենի լեզուն է։ Մանկուց սկսել եմ խոսել հայերեն, տանը տատիկս միշտ հայերենով էր խոսում ինձ հետ, չնայած, որ ապրում էինք Միացյալ Նահանգներում։ 

–Ասում էիք, որ ժամանակին բարդույթավորվել եք, որ ձեր ընկերները երկու ծնողներ ունեն, իսկ դուք՝ ոչ, հիմա նույնպես կա այդ բարդույթը, թե հաղթահարել եք այն:

–Մարդն իր տեսակով միշտ կարողանում է հարմարվել կյանքին և առկա դժվարություններին, բայց կան դատարկ տեղեր, որոնք ոչ–ոք և ոչինչ չի կարող լրացնել։

–Նշել եք, որ ժամանակին ձեզ չէին ընդունում հայկական միջավայրում․ իսկ հիմա ունե՞ք ազգությամբ հայ ընկերներ:

–Այո, եղել է նման շրջան, բայց այժմ ունեմ ազգությամբ հայ ընկերներ։ 

–Երբ ձայնագրում էիք «Սիրտս պատրաստ ա» երգի հայերեն տարբերակը կպատկերացնեիք, որ տեսահոլովակը կգրանցի նման հաջողություններ։

–Մենք ձայնագրելուց առաջ շատ էինք սիրել երգը, մեծ սպասելիքներ և ոգևորվածություն կար, բայց պետք է նշեմ, որ արդյունքը սպասվածից ավելին էր։ Անասելի շնորհակալ եմ հայ ժողովրդից։ 

–Ի՞նչ նպատակներ ունեք հետագայում։ 

–Մենք պատրաստել ենք 2 ալբոմ, որոնցից մեկը հայկական լսարանի համար է, իսկ մյուսը՝ ամերիկյան։ 

–Այս փուլում դուք ցանկություն ունե՞ք գործունեւթյուն ծավալել Հայաստանում, թե շարունակելու եք աշխատել ամերիկյան լսարանի համար։ 

–Ի սկզբանե մեր նպատակները եղել են 2 լսարանները և մենք շարունակելու ենք աշխատել հենց այդ ձևաչափով։ 

Թերեզա Հովհաննիսյան