Մարինացնող սարք. ի՞նչ է այն իրենից ներկայացնում. «Փաստ»

«Փաստ» օրաթերթը գրում է

Որոշ ուտեստների պատրաստման համար անհրաժեշտ է մթերքների նախնական մարինացում։ Այդ գործընթացը երկար է, մսամթերքի համար այն կարող է տևել մինչև մեկ օր: Ընդհանրապես, մարինացված մթերքը շատերն են սիրում: Սակայն քչերն են տեղյակ, որ դրա համար նույնիսկ հատուկ սարք կա: Մթերքի մարինացումն արագացնելու համար ստեղծվել է մարինատորը: Այն հիմա արդեն շատ սիրելի «հյուր» է դարձել շատ տանտիկինների խոհանոցում, առավել ևս՝ սննդի կետերում: Վարունգի մարինացումը երկար ժամանակ օգտագործվել է այդ սննդամթերքը երկար պահելու համար։ Մարդիկ հասկացել են, որ, օրինակ՝ մի կտոր մսի վրա աղ ու թթու ավելացնելը ոչ միայն թույլ չի տալիս այն փչանալ, այլ նաև արագացնում է եփման ժամանակը, և, որ ամենակարևորն է, այն ավելի համեղ է դառնում։

Մարինադի համար նոր բաղադրիչների հայտնվելով՝ բարելավվել է մարինացման գործընթացը: Տարան, որում մարինացվում էին ապրանքները, նախկինում էական նշանակություն չուներ։ Միայն արդյունաբերական արտադրության զարգացմամբ է հարց առաջացել՝ ինչի՞ մեջ մարինացնել սնունդը և ինչպե՞ս մեքենայացնել այդ գործընթացը։ Բայց եթե ձեռնարկությունների համար այս հարցը վաղուց լուծված է, ապա տան խոհանոցում վարունգի մարինացումը շարունակել է կատարվել «ձեռքով»: Միայն 1988 թվականին են ամերիկացիներ Ջորջ Հենդը և Ռոման Կուպերը (Interplastic Corp.) ստացել կենցաղային մարինատորի արտոնագիր, որը սննդամթերքի և մարինադի տարաների համակարգ է: Սննդամթերքը և մարինացնող խառնուրդը դոզավորված լցվել է արտադրական տարայի մեջ և այնտեղ խառնվել:

Որոշ ժամանակ անց մարինատորը բարելավվել է: Մարինացման գործընթացն արագացնելու համար ավելացվել է վակուումային պոմպ՝ տարայի օդը հեռացնելու համար, իսկ գործընթացը սկսել է վերահսկվել էլեկտրոնային եղանակով։ Մարինատորը բաղկացած է հերմետիկ փակ կոնտեյներից, վակուումային պոմպից և էլեկտրական շարժիչից, որը տեղադրված է կառավարման վահանակով հատուկ պատյանում։ Տարայի եզրերը էլեկտրական շարժիչով մտցվում են թափքի ակոսների մեջ։ Հավաքածուն ներառում է շերտավոր թակիչ՝ մսի կտորները թակելու համար: Սարքը կոմպակտ է, քիչ տեղ է զբաղեցնում, ինչը շատ կարևոր է խոհանոցի համար։ Պարզ մոդելներում հեռակառավարման վահանակի վրա կան միայն միացման և անջատման կոճակներ, իսկ ավելի թանկերի վրա՝ նաև ժամանակաչափ և ջերմաստիճանի կարգավորիչ։ Բացի կառավարման կոճակների տարբերություններից, մարինատորները միմյանցից տարբերվում են միայն տարայի ծավալով և արտադրության նյութով՝ պլաստմասե, թրծված ապակի կամ չժանգոտվող պողպատ:

Չժանգոտվող պողպատից պատրաստված տարան ավելի ամուր է, սակայն թափանցիկ տարաները թույլ են տալիս դիտել մարինացման գործընթացը: Օդը տարայից դուրս է մղվում կա՛մ ձեռքի վակուումային պոմպով, կա՛մ ավտոմատ կերպով: Առաջին դեպքում անհրաժեշտություն է լինում ձեռքի աշխատանք: Փոխարենը, եթե ավտոմատ պոմպը փչանում է, այն հեշտ չէ վերանորոգել։ Մարինատորը աշխատում է 220 վոլտ ստանդարտ լարման սովորական սնուցման աղբյուրից և ունի շատ ցածր էներգիայի սպառում՝ տնտեսական լամպի մակարդակի: Մարինատորի օգտագործումը շատ պարզ է: Նախ՝ պատրաստում են մարինացվող խառնուրդը, ապա սննդամթերքը՝ միսը, ձուկը կամ բանջարեղենը կտրատում են ցանկալի չափի կտորների և այդ ամենը լցնում տարայի մեջ։

Պատրաստի արտադրանքը լցնում են սարքի մեջ, օդը դուրս մղում կոնտեյներից: Այնուհետև շարժիչը միանում է, և սկսվում է տարայի պտույտը, որի արդյունքում սննդամթերքը մանրակրկիտ խառնվում և ներծծվում է: Բայց մարինատորի հիմնական առավելությունն այն է, որ օդը դուրս մղելուց հետո մարինացված բաղադրիչների մանրաթելերը վակուումում ընդարձակվում են և բառացիորեն ներծծում մարինացնող խառնուրդը: Ընդ որում, մարինացման գործընթացը մեծապես արագանում է: Սովորաբար, մարինատորի մեկ աշխատանքային ցիկլը տևում է յոթից տասը րոպե, ինչը բավարար է բանջարեղենի, ձկան, թռչնի մսի համար: Ավելի կոշտ մսի դեպքում գործընթացը կարող է կրկնվել: Արդյունքում մթերքը հիանալի մարինացվում է:

ԿԱՄՈ ԽԱՉԻԿՅԱՆ

Մանրամասները՝ «Փաստ» օրաթերթի այսօրվա համարում