ՌԴ-ն անընդունելի է համարում Մակրոնի՝ հայ-ադրբեջանական կոնֆլիկտն օգտագործելու մասին խոսքերը
POLITICSՓնտրում եք բարձր վարձատրվող աշխատանք՝ սեղմեք ԱՅՍՏԵՂ
Բաքվի և Երևանի հետ Մոսկվայի հարաբերություններում սեպ խրելու Փարիզի փորձերը դատապարտված են ձախողման և կհանգեցնեն տարածաշրջանում Ֆրանսիայի հեղինակության արժեզրկմանը։ Այս մասին հայտարարել են ՌԴ ԱԳՆ-ում։
«Մենք բացահայտ և բացարձակապես անընդունելի ենք համարում Էմանուել Մակրոնի հայտարարությունները, թե իբր Ռուսաստանը օգտագործում է Լեռնային Ղարաբաղի հակամարտությունը Հարավային Կովկասն ապակայունացնելու համար։ Նման հարձակումները համահունչ են Ռուսաստանին սատանայացնելու Արևմուտքի հակառուսական գծին և վկայում են Ուկրաինայից առճակատման տրամաբանությունը հետխորհրդային տարածքի այլ հատվածներ, այդ թվում՝ Հարավային Կովկաս տեղափոխելու փորձերի մասին»,- ասված է ՌԴ ԱԳՆ հայտարարության մեջ։
Նախարարությունը հիշեցրել է, որ ի տարբերություն Ֆրանսիայի, որը նույնիսկ Բաքվի և Երևանի միջև սրման ժամանակաշրջանում սահմանափակվում էր խաղաղության ստանդարտ կոչերով, Ռուսաստանը գործնական առումով նպաստեց հակամարտության կարգավորմանը։
«Մեր երկիրը վճռական ներդրում է ունեցել Ադրբեջանի, Հայաստանի և Ռուսաստանի ղեկավարների 2020 թվականի նոյեմբերի 9-ի եռակողմ հայտարարության ստորագրման գործում, որը վերջ դրեց արյունահեղությանը։ Սույն պայմանագրի համաձայն տեղակայված խաղաղապահ զորախումբը շարունակում է մնալ տարածաշրջանի անվտանգության երաշխավորը»,- նշել է ՌԴ ԱԳՆ-ն։
«Հենց Ռուսաստանն է սկսել աշխատանքը Բաքվի և Երևանի միջև հարաբերությունների համապարփակ կարգավորման ուղղությամբ... Մասնավորապես, քայլեր են ձեռնարկվում Հարավային Կովկասում բոլոր տնտեսական և տրանսպորտային կապերն ապաշրջափակելու, հայ-ադրբեջանական սահմանի սահմանազատման, խաղաղության պայմանագրի կնքման, հասարակության և փորձագետների միջև երկխոսություն հաստատելու ուղղությամբ», - եզրափակել են ՌԴ ԱԳՆ-ում։