Պուտինը խոսել է Խաղաղության պայմանագրի «Վաշինգտոնյան» տարբերակի մասին
POLITICSՓնտրում եք բարձր վարձատրվող աշխատանք՝ սեղմեք ԱՅՍՏԵՂ
Հայաստանի և Ադրբեջանի միջև խաղաղության պայմանագիր է պետք, բայց Ռուսաստանը ոչինչ չի պարտադրի և չի թելադրի, հայտարարել է ՌԴ նախագահ Վլադիմիր Պուտինը։
«Մեր դիրքորոշումն այն է, որ այդ խաղաղության պայմանագիրը, իհարկե, անհրաժեշտ է։ Եվ մենք աջակցում ենք խաղաղ կարգավորմանը, ինչպես նաև սահմանի սահմանազատմանն ու սահմանային հարցի ամբողջական կարգավորմանը. մենք կողմ ենք դրան։ Հարցը, թե որ տարբերակն ընտրել, Հայաստանի, հայ ժողովրդի և Հայաստանի ղեկավարության գործն է», - ասել Է Պուտինը «Վալդայ» միջազգային բանավիճային ակումբի լիագումար նստաշրջանում։
Միևնույն ժամանակ, Պուտինը նշել է, որ Ռուսաստանը կաջակցի հայ ժողովրդի ցանկացած ընտրությանը՝ Ադրբեջանի հետ խաղաղության պայմանագրի պարամետրերով: «Եթե հայ ժողովուրդն ու հայկական այսօրվա ղեկավարությունը կարծում են, որ պետք է ընտրել այդ խաղաղ պայմանագրի ինչ-որ կոնկրետ տարբերակ, այսպես կոչված, «վաշինգտոնյան», որքանով ես հասկանում եմ, այն նախատեսում է Ադրբեջանի ինքնիշխանության ճանաչում Ղարաբաղի նկատմամբ, ապա եթե Հայաստանն այդպես է կարծում, դե խնդրեմ։ Մենք կաջակցենք հայ ժողովրդի ցանկացած ընտրությանը», - հավելել է ՌԴ նախագահը։
«Եթե հայ ժողովուրդն ու հայկական ղեկավարությունը կարծում են, որ Ղարաբաղն ունի իր առանձնահատկությունները, որ պետք է հաշվի առնել այդ առանձնահատկությունները և ինչ-որ կերպ դա պետք է քննարկել ապագա խաղաղության պայմանագրում, դա նույնպես հնարավոր է։ Բայց, անշուշտ, պետք է պայմանավորվել Ադրբեջանի հետ։ Պետք է, որ այդ պայմանավորվածություններն ընդունելի լինեն նաև մյուս կողմի համար՝ Ադրբեջանի համար», - ընդգծել է Պուտինը։
«Ցանկացած դեպքում, ինչ տարբերակ էլ լինի, եթե դա հանգեցնի խաղաղության, մենք կողմ ենք, բայց մենք չենք պատրաստվում որևէ բան պարտադրել, մենք չենք կարող և չենք պատրաստվում Հայաստանին ինչ-որ բան թելադրել», - ընդգծել է ՌԴ նախագահը: