Մայրը հիշում է մղձավանջային ամսվա ամեն օրը. 1 տարի առաջ այս օրը Տիգրանը դուրս եկավ կոմայից

SOCIETY 2 January, 2016 23:12

News.am-ը գրում է.

Վանաձորցի Տիգրանը 2014թ. դեկտեմբերի 2–ին կատարվածի մանրամասները չի հիշում. միայն հիշում է` ինչպես է առավոտյան սովորականի նման արթնացել ու դպրոց գնացել։

Դպրոցի բակում վիճաբանության ժամանակ դանակահարվելուց հետո կոմայի մեկ ամիսն ընդհանրապես բացակայում է նրա հիշողության մեջ։ Մինչդեռ մայրը հիշում է մղձավանջային ամսվա ամեն օրը, որդու անկողնու մոտ անցկացրած սպասումի ամեն վայրկյանը։

Ամանորին, մինչ բոլորը շնորհավորում էին միմյանց, Տիգրանի հարազատները հիվանդանոցում աղոթում էին, որ նա կոմայից դուրս գա։ Աղոթքները տեղ հասան, հունվարի 2–ին Տիգրանը բացեց աչքերը։

Այսօր` այդ երջանիկ օրվանից ուղիղ մեկ տարի անց, Տիգրանի հարազատները նշում են նրա «երկրորդ ծնունդը»։

Կոմայից դուրս գալը միայն առաջին փորձությունն էր, որ պետք է հաղթահարեր 17–ամյա պատանին։ Կրծքավանդակի ու թիկունքի շրջանում ստացած դանակի վնասվածքների հետեւանքով Տիգրանի մոտ առողջական լուրջ խնդիրներ էին առաջացել։ Մեծ քանակությամբ արյուն կորցնելու հետեւանքով տեսողությունը սկսել էր թուլանալ, Տիգրանը զրկվել էր քայլելու ունակությունից։ Դպրոց գնալու մասին խոսք անգամ չէր կարող լինել։ Երկարատեւ ու համառ բուժումների արդյունքում Տիգրանը տասնմեկ ամիս անց ինքնուրույն առաջին քայլը կատարեց։

«Հիմա ոնց որ փոքր երեխան նորից սովորում է քայլել։ Դեռ ոչ շատ լավ, բայց արդեն առաջընթաց կա»,–ասում է մայրը` տիկին Արմինեն։

Իսրայելում անցած բուժման կուրսը նույնպես արդյունավետ է եղել` Տիգրանի տեսողությունը կամաց–կամաց վերականգնվում է։ Նախկին լիարժեք կյանքին վերադառնալու համար Տիգրանից դեռ երկար ժամանակ ու մեծ համբերություն կպահանջվի։ 18–ամյա պատանին, սակայն, առողջական խնդիրների պատճառով չի մեկուսանում. թեեւ դպրոց չի գնում, բայց շփվում է ընկերների հետ, երբեմն հյուր գնում, զբոսանքի դուրս գալիս։ Բժիշկները վստահեցրել են, որ լիարժեք ապաքինումը միայն ժամանակի խնդիր է։

Այս Ամանորը Գեւորգյանները դիմավորել են առանձնահատուկ ոգեւորությամբ` նշելով Տիգրանի «վերածնունդը»։ Տիգրանն իր ճաշակով է զարդարել տոնածառը, եղբոր որդին` 5-ամյա Գառնիկը, Ձմեռ պապին նամակ է գրել եւ խնդրել, որ հորեղբայրը շուտ ապաքինվի։

Չարաբաստիկ օրվա մասին լուռ համաձայնությամբ տանը ոչ ոք չի խոսում։ Իրականում հարազատները կատարվածի հետ չեն համակերպվել. բոլորն էլ հասկանում են, որ կհանգստանան միայն այն ժամանակ, երբ Տիգրանը լիովին առողջ, իսկ նրան դանակահարողը պատժված կլինի։

Ավելի վաղ NEWS.am-ը հայտնել էր, որ 2014թ. դեկտեմբերի 2-ին Վանաձորի Գեւորգ Չաուշի անվան թիվ 24 միջնակարգ դպրոցի բակում վիճաբանություն էր տեղի ունեցել, որի ժամանակ Վանաձորի բնակիչ 18-ամյա Նարեկ Ադամյանը դանակահարել էր 17-ամյա Տիգրան Գեւորգյանին եւ 17-ամյա Ռոբերտ Պ.-ին։

Նարեկ Ադամյանը դեպքից հետո ինքնակամ ներկայացել է ոստիկանություն եւ խոստովանել, որ ինքն է դանակով հարվածել Տիգրանին ու Ռոբերտին: Մայիսից Լոռու մարզի ընդհանուր իրավասության դատարանում ընթանում է դատավարություն։