Մեր ճակատագիրը միասնական է, չի լինելու ոչ մի խաղ ժողովրդի մեջքի հետեւում. Բաբայան
POLITICSՓնտրում եք բարձր վարձատրվող աշխատանք՝ սեղմեք ԱՅՍՏԵՂ
Բոլորս միասանական պաշտպանելու ենք Արցախը, հնարավորությունը կա փրկելու Արցախը: Այս մասին Վերածննդի հրապարակում բազմահազարանոց հանրահավաքի ընթացքում ասաց Արցախի ԱԳ նախարար Դավիթ Բաբայանը:
«Այն, որ բոլորդ կանգնած եք այստեղ, պատգամ է ամբողջ աշխարհին, մարդկությանը: Մենք ապրում ենք օրհասական ժամանակահատված՝ առերեսվելով գոյաբանական վտանգների: Նաեւ Մայր Հայաստանը եւ Սփյուռքն են առնչվում նման գոյաբանական վտանգների: Այս ամենը հաղթահարելու համար պետք է աշխատենք եւ ներքին,եւ արտաքին ոլորտներում»,- ասաց Բաբայանը՝ հավելելով, որ ամենակարեւորը անտարբեր չլինելն է, հենց անտարբերությունը մեզ կարող է կործանել: Նրա խոսքով՝ յուրաքանչյուրից է կախված մեր ապագան, լինելո՞ւ է հաղթանակ, թե՝ պարտություն:
Դավիթ Բաբայանն ընդգծեց՝ անընդունելի է ցանկացած փաստաթուղթ, որտեղ Արցախը կարող է դիտարկվել որպես Ադրբեջանի մաս:
«Մենք մերժելու ենք նման ցանկացած առաջարկ: Եթե նման բան մեզ ներկայացնեն միջազգային ատյաններից, դիտարկելու ենք որպես միջազգային իրավունքի կոպտագույն խախտում: Հավատացեք՝ ի վիճակի ենք պաշտապանել Արցախը, կա այդ ներուժը, այն ձեզնից յուրաքանչյուրի մեջ է»,- հայտարարեց Դավիթ Բաբայանը:
Նա ընդգծեց՝ մեր ճակատագիրը միասնական է, չի լինելու ոչ մի խաղ ժողովրդի մեջքի հետեւում:
« Մենք բարձր ենք գնահատում Ռուսաստանի դերակատարությունը տարածաշրջանում եւ խաղաղապահ առաքելության բարդ աշխատանքը: Երբ մենք ասում ենք, որ հայ եւ ռուս ժողովուրդները եղբայրական են, դա ուղղված չէ այլ ժողովրդի դեմ: Եկեք համախմբվենք ու չհուսահատվենք. կան բոլոր շանսերը պահելու մեր երկիրը»,- նշեց Բաբայանը: