Գեւորգ Սաֆարյանը փաստաբանի միջոցով ուղերձ է փոխանցել եւ հացադուլ հայտարարել

«Հիմնադիր խորհրդարանի» անդամ Գեւորգ Սաֆարյանը, ով ներկայում կալանավորված է, իր փաստաբանի միջոցով բաց ուղերձ է հղել Ազատության հրապարակում նստացույցը շարունակող իր ընկերներին` շնորհակալություն հայտնելով նրանց, որ եղանակային ցուրտ պայմաններում աջակցում են իրեն:

«Երբեք չկաշկանդվեք իմ կալանավորմամբ եւ փաստորեն, գերեվարմամբ։ Միայն անընդմեջ պայքարը կարող է բերել այն պետության ստեղծմանը, որին արժանի են մեր ժողովուրդը եւ ապագա սերունդները։ Բանտերով ու ոստիկաններով մեր պայքարը կասեցնել հնարավոր չէ, մենք ստեղծելու ենք այն պետությունը, որտեղ մարդը ոչ թե ռեսուրս է, այլ արժեք, որտեղ հայրենիքը ոչ թե ինքնահաստատվելու կամ քաղաքական փիարով զբաղվելու միջոց է, այլ իրական արժեք։ Պետություն, որտեղ հարգվում են մարդու իրավունքները եւ որտեղ օրենքը բոլորի համար է, պետություն, որը ընտրելու է զարգացման ճանապարհ այլ ոչ թե…»,-ըստ «Հիմնադիր խորհրդարանի» տարածած հաղորդագրության, այստեղ Սաֆարյանի գրառումն ընդհատվել է, եւ Գեւորգին թույլ չեն տվել ավարտել այն:

Իր հերթին, հայտարարությամբ է հանդես եկել «Հայկական վերածնունդ» կազմակերպությունը՝ պահանջելով ազատ արձակել Գեւորգ Սաֆարյանին: «Այն դեպքում, երբ հանրապետության բոլոր վայրերում, ինչպես նաեւ ողջ աշխարհում տոնածառներ էին տեղադրված, ՀՀ ոստիկանությունը բռնի ուժով արգելեց «Նոր Հայաստանին» փոքրիկ տոնածառ տեղադրել Ազատության հրապարակում: Ոստիկանները, որոնցից մի մասը եղել է ոգելից խմիչքի ազդեցության տակ, չբավարարվելով տոնածառը հափշտակելով եւ այն կոտրատելով, կամայականորեն եւ առանց օրինական հիմունքների հարձակվել եւ ծեծի են ենթարկել մի շարք ակտիվիստների: Իսկ Գեւորգ Սաֆարյանին քրեական մեղադրանք են ներկայացրել եւ մինչ այժմ պահում են կալանքի տակ: Օրինազանց ոստիկաններից եւ ոչ մեկը պատժի ու պատասխանատվության չի ենթարկվել, իսկ նրանցից ոմանք ընդդիմության նկատմամբ իրենց ատելությունը շարունակել են արտահայտել սոցիալական ցանցերում՝ վիրավորանքներ եւսպառնալիքներ տարածելով «Նոր Հայաստանի» մասնակիցների նկատմամբ:

Ակնհայտ է, որ տոնական օրով հարբած ոստիկանների մասնակցությամբ սադրիչ գործողություններ ձեռնարկելով եւ ընդդիմադիր քաղաքացիների բերման ենթարկելով ու կալանավորելով, ՀՀ իշխանությունները հերթական անգամ ընդդիմության նկատմամբ քաղաքական ահաբեկում են իրականացնում: Փորձ է արվում բռնաճնշել «Նոր Հայաստան» շարժումը՝ վերջինիս սահմանադրական փոփոխություններին դեմ արտահայտվելու եւ շարունակաբար իշխանությունների հրաժարականը պահանաջելու պատճառով: Սակայն այս անգամ ոստիկանությունը հատկապես աչքի ընկավ իր լկտիությամբ՝ սադրանքը կազմակերպելով Ամանորի նախօրեին եւ որպես պատրվակ ընտրելով ոչ այլ ինչ, քան տոնածառի տեղադրումը:

Խստորեն դատապարտում ենք ՀՀ իշխանությունների ապօրինի քաղաքական հետապնդումները «Նոր Հայաստան» շարժման նկատմամբ եւ պահանջում ենք անհապաղ ազատ արձակել Գեւորգ Սաֆարյանին: Այն ժամանակ, երբ Հայաստանը ակամա գտնվում է նախապատերազմական կարգավիճակում, ՀՀ ոստիկանության սադրանքները, ապօրինի ձերբակալությունները եւ ատելության անթաքույց արտահայտությունները անկայունություն են սերմանում հասարակությունում, որն առանց այն էլ գտնվում է լարված վիճակում՝ սոցիալ տնտեսական ծանր պայմանների հետեւանքով: Սա ոչ միայն անպատասխանատու վարվելակերպ է, այլ նաեւ հակապետական արկածախնդրություն»,- նշված է հաղորդագրության մեջ:

«Հայկական վերածնունդը» Հայաստանի իշխանություններին կոչ է անում սթափվել, վերադառնալ օրինական դաշտ եւ ժողովրդի հետ վերջին կամուրջները չայրել, քանի դեռ ուշ չէ: Կազմակերպության հայտարարության մեջ նշված է նաեւ, որ այս առումով Գեւորգ Սաֆարյանին ազատ արձակելը կարող է հանդիսանալ բարի կամքի դրսեւորում եւ սկիզբ դնել ոստիկանության նկատմամբ վստահության վերականգնման:

Այսօր Գեւորգ Սաֆարյանը հացադուլ է հայտարարել՝ պահանջելով իրեն տեղափոխել «Նուբարաշեն» ՔԿՀ-ի առանձին խուց: Հիշեցնենք, որ Գեւորգ Սաֆարյանին մեղադրանք է առաջադրվել ՀՀ Քրեական օրենսգրքի 316-րդ հոդվածի 1-ին մասով՝ իշխանության ներկայացուցչի նկատմամբ բռնություն գործադրելը: Ըստ իրավապահ մարմինների` Սաֆարյանը բռնություն է գործադրել ոստիկանության 4-րդ հատուկ գումարտակի հրամանատար, ոստիկանության կապիտան Գեղամ Խաչատրյանի նկատմամբ: Երեւանի Ազատության հրապարակում Ամանորի գիշերը «Նոր Հայաստանի» անդամների եւ ոստիկանների միջև բախումներ էին տեղի ունեցել: Երեք անձ բերման էր ենթարկվել, այդ թվում` Սաֆարյանը:

Գագիկ Աղբալյան