«Այս կաբինետում նստած մարդը քաղաքական հոգեվարքի մեջ է և իր հոգեվարքը շարունակում է ամեն մեկիս հաշվին, մեր կյանքն է տանում, մեր երեխեքի կյանքն է տանում»

Այսօր «Համախմբում» շարժումը կառավարության շենքի դիմաց բողոքի գործողություն իրականացրեց։ Գեղարքունիքի մարզի Ազատ գյուղի տարածքում տեղակայված ինժեներասակրավորային վաշտի կացարանի հրդեհը, որը 15 զինվորի մահվան պատճառ դարձավ, որևէ մեկին չի կարողանում անտարբեր թողնել: Մեկ րոպե լռությամբ հարգելով զինծառայողների հիշատակը՝ ներկաները հանդես եկան ելույթներով: Հիմնական ասելիքը թերևս այս ողբերգության մեղավորների և նրանց՝ որքան հնարավոր է շուտ պաշտոններից հեռանալու անհրաժեշտության մասին էր, որպեսզի հետագայում բացառվեն նման դեպքերը:

«Համախմբում» շարժման անդամ, ԵՊՀ դասախոս Մենուա Սողոմոնյանը նշեց՝ այս բողոքի գործողության նպատակն է ճիշտ գնահատական տալ օրեր առաջ զորամասի կացարանում տեղի ունեցած ողբերգության խորքային ու համակարգային պատճառներին, մատնացույց անել դրա իրական մեղավորներին և խոսել նաև դրան հաջորդող քայլերի մասին: «Մեր գնահատականն է՝ այս ողբերգության մեղավորը և պատասխանատուն դե ֆակտո վարչապետ Նիկոլ Փաշինյանն է, երկրորդ մեղավորը և պատասխանատուն դե ֆակտո պաշտպանության նախարար Սուրեն Պապիկյանը: Զինված ուժերի հետ կապված տապալման, այն էլ այսպիսի նշանակալի տապալման պատասխանատուն կառավարությունն է՝ ի դեմս նրա ղեկավարի: Այս մասին փաստում է Սահմանադրության 155-րդ հոդվածի 1-ին կետը: Երկրորդ՝ ՊՆ-ն իրականացնում է ԶՈւ կառավարում: Ողբերգության իրական ու խորքային պատճառը կապված չէ հրդեհային անվտանգության կանոնների պահպանման հետ, սա ընդամենը վարկած է, որը շատ արագ շրջանառության մեջ է դրել Ն. Փաշինյանը՝ պատասխանատվությունից խուսափելու և դրա համար համապատասխան հանրային արձագանք ստեղծելու նպատակով: Սա ուղղորդում է նախաքննությանը, ամեն ինչ տանել այն հունով, որը ձեռնտու է Փաշինյանին: Իրականում ողբերգությունը տեղի չէր ունենա, եթե վաշտը տեղակայված լիներ նորմալ պայմաններում»,-ասում է Սողոմոնյանը:

Ընդգծում է՝ այն թեզը, թե միջոցներ չկան մեր զինվորների համար կացարանային նորմալ պայմաններ ստեղծելու համար, առնվազն տարակուսելի է, հատկապես, երբ կան միջոցներ Հրապարակը շքեղ զարդարելու, վարչապետին և նրա տիկնոջը մեքենա գնելու և այլնի համար:

«Այդ միջոցները կան: Եթե դրանք չեն ծախսվում, նշանակում է բանակը, պաշտպանությունը գործող իշխանությունների համար կարևորություն և առաջնահերթություն չէ: Փաշինյանը և Պապիկյանը պետք է հրաժարական տան»,-հայտարարում է Սողոմոնյանը:

Շարժման անդամ, հասարակական գործիչ Ավետիք Չալաբյանը կարծիք է հայտնում, որ այս գործողություններն անգամ ուշացած են, պետք է վաղուց հանգիստ չտայինք այս կառավարությանը: «Այս իշխանության օրոք բանակը դարձել է երկրի խորթ զավակը: Իշխանությունը քայլ առ քայլ հետևողականորեն փորձում է բանակը ծնկի բերել, կազմաքանդել, կոտրել նրա մարտական ոգին: Պատերազմի ժամանակ կորցրել ենք մոտ 1000 սպա, դա քիչ է, դեռ պատերազմից հետո էլ իշխանությունը շարունակում է ջարդել սպայակազմը, որը բանակի ողնաշարն է: Փորձում են բոլորիս համոզել, որ սպաներն են պարտվել 44-օրյա պատերազմում, մինչդեռ պատերազմներում պարտվում են պետությունները:

Այս ողբերգության մասով. դեպքի մասին դեռ նոր էինք իմացել, առավոտյան ութ բարձրաստիճան սպա հեռացվում է պաշտոններից, առանց ծառայողական քննության, առանց պարզելու մարդկանց մեղքի բաժինը և այլն, պատասխանատվության և մեղքի սլաքները միանգամից ուղղվեցին նրանց վրա: Վարչապետի աթոռին նստած դեմքը ելույթ է ունենում, ասում՝ գիտենք, թե ով ինչի համար է պատասխանատու, բոլորն իրենց պատիժը կստանան: Առաջինը դու պետք է քո պատիժը ստանաս:

Պետք է կանգ առնենք և ասենք՝ ինչքան պետք է սա շարունակվի, արդյոք ամեն մեկիս զավակը պետք է զոհվի, այս ողբերգությունը գա, մտնի մեր տուն, որ հասկանանք, թե ինչ է կատարվում: Եթե չենք ուզում, որ այս դժբախտությունը կրկնվի, պետք է ոտքի կանգնենք, այս կաբինետում նստած մարդը պետք է հեռանա, ինքը քաղաքական հոգեվարքի մեջ է, բայց իր հոգեվարքը շարունակում է ամեն մեկիս հաշվին, մեր կյանքն է տանում, մեր երեխեքի կյանքն է տանում: Հեռացիր, քո հետևից ավելի լավերը կգան: Մի՛ վախեցրու, որ նախկիններն են գալու: Նրանք չեն գալու, ժողովուրդը նրանց չի ընտրելու: Հեռացի՛ր»,-ասում է Չալաբյանը:

Այնուհետև ներկաները երթով շարժվեցին դեպի Սուրբ Գրիգոր Լուսավորիչ եկեղեցի, որտեղ աղոթք հնչեց՝ ի հիշատակ ողբերգությանը զոհ գնացած տղաների:

Լուսինե Առաքելյան