Ոսկե գարեջուր, գինի, կոկտեյլ և օղի. ի՞նչ նպատակ ունեն և ի՞նչ արժեն. «Փաստ»

«Փաստ» օրաթերթը գրում է

Ոսկե կրեմը, ոսկե թելերը նորություն չեն կոսմետիկ արդյունաբերության մեջ: Բայց ոսկե գարեջուրը իսկական սենսացիա դարձավ: Ֆրանսիական գարեջրագործները դա իրական են դարձրել՝ ստեղծելով ոսկե գարեջուր: «24 կարատ» գարեջուրը աշխարհում առաջին գարեջուրն է, որը պարունակում է 24 կարատ ոսկու մասնիկներ: Բացի դա, սա առաջին ոսկե ալկոհոլային խմիչքն է, որը հասանելի է անգամ միջին եկամուտ ունեցող սպառողներին: Գարեջրի վրա աշխատել է ֆրանսիական «i-Beer» գարեջրատունը: Շշի եզակի դիզայնը հորինել է Բրասսերի դյու Պեյս Ֆլեմինգը: Ոսկե գարեջուրը սովորական գարեջրից տարբերվում է ոչ միայն իր լավագույն համային հատկություններով, այլ նաև գույնով: Չպաստերիզացված, զտված, վերին խմորմամբ այս գարեջուրը, որը պատրաստվում է եռակի ֆերմենտացման գործընթացով և Ֆլանդրիայի գարեջրագործների լավագույն ավանդույթներով, վաճառքի է հանվել երկու տարբերակով՝ 9 և 12 % թնդությամբ:

Ոսկե գարեջուրը նպատակ ունի հագեցնել մարդկանց ինչպես ծարավը բառիս բուն իմաստով, այնպես էլ ծարավը ոսկու հանդեպ: Գարեջրագործները պնդում են, որ այն օգտակար է առողջության համար: Պաշտոնական կայքում ասվում է. «Սթրեսի ազդեցության տակ մեր օրգանիզմը սկսում է արտադրել դրական լիցքավորված իոններ և այդ պատճառով դառնում է շատ խոցելի հիվանդությունների նկատմամբ: Կլանելով փոքր քանակությամբ ոսկի՝ մարդու մարմինն սկսում է արտադրել բացասական լիցքավորված իոններ, ինչը բարենպաստ ազդեցություն է ունենում առողջության վրա»: Ի դեպ, 750 մլ տարողության շիշը պաշտոնական կայքում կարելի է ձեռք բերել 65 դոլարով: Դա ավելի քան մատչելի գին է համարվում նման գարեջրի համար: Աշխարհում կա նաև ոսկե գինի, կոկտեյլ և օղի:

Gold Cuvee- ն սորտային գինի է, որը պատրաստվում է Pinot Blanc խաղողից: Փրփրուն սպիտակ գինին պատրաստվում է 24 կարատ ոսկու հատիկների ավելացմամբ: Տոկիոյի Ritz Carlton- ն առաջարկում է ալկոհոլային կոկտեյլ, որը կոչվում է Diamonds are Forever, որի մեջ ձիթապտղի փոխարեն ոսկու հատիկներ են և 1,6 կարատ ադամանդներ: Մեկ բաժակի արժեքը 11 հազար եվրո է: «Դիվա» շոտլանդական օղու զտումը տեղի է ունենում մի քանի փուլով. նախ՝ հյուսիսային կեչու ածուխի, այնուհետև՝ ավազի, իսկ հետո՝ ադամանդե մանրահատիկների միջոցով: Օղու շիշը զարդարված է թանկարժեք քարերով, և մեկ շշի արժեքը կազմում է մինչև 2000 ԱՄՆ դոլար: Մեքսիկացի գիտնականներն ավելի հեռուն են գնացել իրենց գյուտով. նրանք, ըստ էության, սովորել են, թե ինչպես կարելի է ադամանդ ստանալ ալկոհոլից:

«Արծաթե» տեկիլայի արտադրության տեխնոլոգիան ենթադրում է երկամսյա տաքացման ազդեցություն մինչև 300 աստիճան, արդյունքում ստացված գազը տաքացվում է մինչև 800 աստիճան, այնուհետև այն խտանում է սիլիցիումի կամ պողպատե ափսեի վրա, և ստացվում են 100-ից 400 նանոմետր տրամագծով ադամանդե բյուրեղներ:

ԿԱՄՈ ԽԱՉԻԿՅԱՆ

Մանրամասները՝ «Փաստ» օրաթերթի այսօրվա համարում