Ուղղակի անհրաժեշտ է անջատել իշխանությունների կողմից բարձրացվող աղմուկը, և կոռուպցիան տեսանելի կլինի. Ելենա Կիրակոսյան

Հարցազրույց «Վերածնվող Հայաստան» կուսակցության անդամ Ելենա Կիրակոսյանի հետ

- Տիկին Կիրակոսյան, վերջին շրջանում դատախազությունն ակտիվացրել է կոռուպցիայի դեմ պայքարը: Հասարակությունը մեծ հույսեր է կապում ապօրինի գույքի բռնագանձման հետ: Ըստ ձեզ՝ ինչպե՞ս դա կանդրադառնա մարդկանց սոցիալական վիճակի վրա:

 - Կարծում եմ՝ շարքային քաղաքացիների սոցիալական վիճակի վրա այդ պայքարի հնարավոր ազդեցության մասին դեռ շատ վաղ է խոսել երկու առումով: Նախ, որքանով հետևել եմ, առայժմ գործերի հիմնական մասում վաղեմության ժամկետի հետ կապված խնդիր կա, և դեռ պարզ չէ՝ այդ գործերն ինչով կավարտվեն: Երկրորդ, բյուջե վերադարձից հետո արդյոք միջոցները կծախսվեն նպատակային քաղաքացիների սոցիալական խնդիրների լուծման համատեքստում:

Վերջին տարիներին բոլորս բախվել ենք սոցիալական խնդիրների: Նույն գնաճով պայմանավորված քաղաքացիների սոցիալական վիճակն օր-օրի ավելի է վատանում, սակայն իշխանությունները որևէ կերպ երկարաժամկետ և խորքային լուծում չեն տալիս նույնիսկ խոցելի խմբերի սոցիալական բեռը որոշակիորեն թեթևացնելու համար: Ուստի, բյուջեում միջոցների ավելացումը որևէ կերպ չի նշանակում, որ դա ուղղված է լինելու քաղաքացիների սոցիալական վիճակի բարելամանը, այլ ոչ թե իշխանության ներկայացուցիչների պարգևավճարներին և տարաբնույթ այլ շքեղություններին:

- Եթե հասարակության սոցիալական վիճակի վրա այս գործընթացի ազդեցությունը , ինչպես նշում եք, դեռևս մշուշոտ է, հոգեբանական, քարոզչական ազդեցությունն արդեն իսկ տեսանելի է: Մի կողմից թալանվածը կվերադարձվի, մյուս կողմից այս գործընթացը հասարակության մոտ տպավորութուն է ստեղծում, որ երկրում այլևս կոռուպցիոն երևույթներ չեն կարող լինել, քանի որ դրա դեմ պայքար է գնում, և նույնիսկ իշխանության ներկայացուցիչների դեմ գործերի մասին է խոսվում:

- Ճիշտ նկատեցիք, որ հասարակության մոտ տպավորություն է ստեղծվում: Իսկ իրականում ունենք իրավիճակ, երբ Հայաստանը հետընթաց է գրանցում կոռուպցիայի ընկալման վարկանիշում: Ավելին, պարբերաբար մամուլում հայտնվում են տեղեկություններ իշխանության ներկայացուցիչների կողմից թանկարժեք գնումների մասին, որոնք որևէ կերպ հիմնավոր հերքում կամ բացատրություն չեն ստանում: Միայն վերջին շաբաթների ընթացքում նման հրապարակումներ եղան արտաքին գործերի և պաշտպանության նախարարների, մի շարք իշխանական պատգամավորների վերաբերյալ: Պետական գնումներն իրականացվում են առանց մրցույթների, մեկ անձից գնումով, տենդերներում հիմնականում հաղթում են իշխանության հետ փոխկապակցված անձիք: Քաղաքացիներին ուղղակի անհրաժեշտ է անջատել իշխանությունների կողմից բարձրացվող աղմուկը և ամեն ինչ շատ տեսանելի կդառնա:

- Օրեր առաջ հայտնի դարձավ, որ Կառավարության, «Լիդիան Արմենիայի» և ԵԱԶԲ-ի միջև հուշագիր է ստորագրվել, որով ազդարարվեց հանքի շահագործման մասին: Պարզվեց նաև, որ Կառավարությունն անհատույց ստացել է «Լիդիան Արմենիայի»-ի կանոնադրական կապիտալի 12.5 % -ը: Կոռուպցիայի թեմայի համատեքստում ինչպե՞ս կմեկնաբանեք սա:

- Նախ` մինչ կոռուպցիոն ռիսկերին անդրադառնալը, Ամուլսարի պարագայում բավական լուրջ ռիսկեր ունենք բնապահպանական, իսկ ՝սերունդների կտրվածքով՝ առողջապահական տեսանկյունից: Հանքի շահագործման հետ կապված զարգացումների ողջ ընթացքն ուղեկցվել է բնապահպանների, հանքաշահագործման գծով մասնագետների գնահատականներով, նույնիսկ գիտական համայնքի ներկայացուցիչներ են ահազանգեր հնչեցրել, որ հանքի շահագործումն այդպիսի պայմաններում Ջերմուկի ու հարակից բնակավայրերի անգամ գոյության հարցն է կասկածի տակ դնում, աղտոտում Հայաստանի ջրային ռեսուրսները, ինչի հետևանքները, հասկանալի է, խորքային են: Այս իմաստով կան բազմաթիվ հարցադրումներ, բազմաթիվ մտահոգություններ, սկսած հանքի շահագործման կազմակերպման տեխնիկական, անվտանգային բաղադրիչից, վերջացրած հարցով, թե արդյո՞ք հանքն իսկապես ունի ներկայացված ոսկու պաշարները:

Բայց տեսեք ինչ տեղի ունեցավ: Մենք այդպես էլ չստացանք նշված խնդիրների պատշաճ, սպառիչ պատասխաններ, սակայն հանկարծակի պարզվեց, որ հանքը շահագործվելու է: Մինչդեռ այս իշխանությունը վստահեցնում էր, որ հանքի շահագործում կլինի միայն միջազգային խիստ պահանջների բավարարման դեպքում: Եվ ահա ստացվում է, որ ցանկացած պահանջ կարելի է շրջանցել, կամ տրված խոստում մոռանալ կանոնադրական կապիտալի մասնաբաժնի դիմա՞ց: Արդյո՞ք ներդրողի հետ նման գործարքի գնալը պետության կողմից կոռուպցիայի դրսևորման տեսակ չէ: Արդյո՞ք չի ստեղծվում նախադեպ, որ փողի դիմաց, իսկ գուցե շատ փողի դիմաց այս իշխանությունների օրոք Հայաստանում կարելի է ստանալ ցանկացա՞ծ թույլտվություն, անգամ ամենաաղետաբեր գործություն իրականացնելու համար: