«Հայաստանի իշխանություններն իրենց քայլերով փորձում են Արցախը բռնակցել Ադրբեջանին». «Փաստ»

«Փաստ» օրաթերթը գրում է

2020 թ. նոյեմբերի 9-ի եռակողմ փաստաթղթի ստորագրումից հետո Ադրբեջանի բոլոր գործողությունները միտված են Արցախը հայաթափելուն: Եթե Արցախում բնակվող հայեր չլինեն, չլինի արցախահայություն, չի լինի և ԼՂ հիմնախնդիր:

Ադրբեջանը հենց այս ճանապարհային քարտեզով է առաջ շարժվում: Արցախի ԱԺ «Արդարություն» խմբակցության ղեկավար Դավիթ Գալստյանն այսպես է արձագանքում Ադրբեջանի վերջին օրերի սադրանքներին, նաև նոր դիրքային առաջխաղացմանն Արցախում:

«Երբ Ադրբեջանը տեսավ, որ արցախահայությունը կառչած է հայրենի հողին, ինչ-որ տեղ հասկացավ, որ չենք պատրաստվում լքել հայրենիքը, անցավ իր մարտավարությանը, որի հետևանքով տեսանք մարտի 5-ի դեպքը, վերջին օրերի սադրանքները, Փառուխի, Քարագլխի, Խծաբերդի բռնազավթումը, ինչպես նաև Բերձորի ճանապարհի արգելափակումը, պարբերաբար էներգետիկ խնդիրներ առաջացնելը: Ադրբեջանը շարունակում է իր ահաբեկչական գործողություններն արցախահայության նկատմամբ: Մենք բոլորս հասկանում ենք, որ թշնամի պետություն է, որն ունի իր ծրագիրը, ինչն ամեն գնով առաջ է տանում՝ անտեսելով միջազգային հանրությանը, ոտնահարելով մադու իրավունքները: Այս ամենի ֆոնին, սակայն, շատ ավելի ցավալի է ՀՀ իշխանության որդեգրած քաղաքականությունը»,-«Փաստի» հետ զրույցում ասաց Դ. Գալստյանը:

Նրա խոսքով, Հայաստանի իշխանություններն իրենց դիվանագիտական խողովակները լիարժեք չեն օգտագործում, օրինակ՝ միջազգային հանրությանը հասցնելու այն փաստը, որ Ադրբեջանն անտեսում է Հաագայի դատարանի՝ անհապաղ կատարման ենթակա որոշումը. «Հայաստանի իշխանություններն այս ամենին կրավորական կեցվածքով են արձագանքում, ընդամենը հայտարարությունների մակարդակով է ամեն ինչ, գործնական որևէ քայլ չեն ձեռնարկում: Ադրբեջանի ահաբեկչությունների նպատակը մեր հայրենակիցների մեջ հուսալքություն և հուսահատություն առաջացնելն է, բայց զուգահեռ նաև Հայաստանի իշխանության կեցվածքն է միտված այդ ամենին»:

Դավիթ Գալստյանը շեշտեց՝ անկախ ամեն ինչից, արցախահայությունն ունի իր հայրենիքում ապրելու իրավունք, նաև ինքնորոշման իրավունք: Հղում անելով 1992 թ. ՀՀ Գերագույն խորհրդի որոշմանը, պաշտոնական այլ փաստաթղթերի՝ նա հավելեց. «2018-ից առաջ բոլոր իշխանությունները տեր են կանգնել արցախահայության ինքնորոշման իրավունքին: Այժմ, տեսնելով, որ Ադրբեջանի հոխորտանքներին ի պատասխան ՀՀ իշխանությունը հրաժարվում է արցախահայության ինքնորոշումից, սա նույնպես ոգևորում է Ադրբեջանի ռազմաքաղաքական իշխանությանը: Օգտվելով նշվածից՝ նրանք էլ ավելի են փորձում խորացնել Արցախում բնակվող մեր հայրենակիցների խնդիրները, որպեսզի հասնեն իրենց գերնպատակին: Մեզ համար վերջին մի քանի օրերին Հայաստանի իշխանությունների կեցվածքը շատ ավելի ցավալի է, քան Ադրբեջանի որևէ սադրանք»,-շեշտեց մեր զրուցակիցը:

Անդրադառնալով հաջորդ հանդիպումը Բաքվում անցկացնելու մասին Ադրբեջանի կողմից ԼՂ-ին ուղղված հերթական առաջարկին, որտեղ, ադրբեջանական կողմի ձևակերպմամբ, «Ղարաբաղի հայ հանրության ներկայացուցիչների հետ քննարկվելու են վերաինտեգրման հարցեր», Դավիթ Գալստյանը նշեց. «Ադրբեջանը ԼՂ հիմնախնդիրը փակված է համարում՝ փորձելով աշխարհին ցույց տալ, որ այդպիսի խնդիր չկա: Փորձում է ցույց տալ, թե «համայնքի» հետ կապված խնդիր կա, ինչն անընդունելի է արցախահայության համար, բայց, ցավոք սրտի, ընդունելի է ՀՀ իշխանությունների համար: Իրենց այս գործելաոճի ու հայտարարությունների հասցեատերը ՀՀ իշխանություններն են, որոնք պետք է անհապաղ արձագանքեն ու ասեն, որ թե՛ Արցախը, թե՛ Հայաստանը դեմ չեն որևէ բանացությունների, եթե դրանք անցկացվելու են միջազգայնորեն ճանաչված հարթակներում: Խոսքը մասնավորապես ԵԱՀԿ Մինսկի խմբի ձևաչափի մասին է: Բայց տեսնում ենք, որ ադրբեջանական կողմի հայտարարություններն անպատասխան են մնում, մինչդեռ Արցախի իշխանությունների, և, ընդհանրապես, մեր ձայնը միջազգային հանրությանը պետք է հասցվի ՀՀ դիվանագիտական խողովակներով»:

Դավիթ Գալստյանը հիշեցրեց, որ Արցախում երկու անգամ բազմահազարանոց հանրահավաք է եղել: «Արցախահայությունը այդ հանրահավաքներում ևս մեկ անգամ փաստեց, որ տեր ենք կանգնելու մեր ինքնորոշմանը, բայց ՀՀ իշխանությունների կողմից որևէ արձագանք չեղավ, որևէ ձևով նրանք չփորձեցին բարձրաձայնել այն փաստը, որ Արցախում ավելի քան 50 հազար մարդ էր հավաքվել և ինքնորոշման իրավունքի տեր կանգնելու հայտ ներկայացրել: Մինչդեռ երբ Արցախում 20-30 հոգով հակառուսական, խաղաղապահներին փնովող որևէ ակցիա է կազմակերպվում, Նիկոլ Փաշինյանն անդրադառնում է նման փոքր և, ինչու չէ, իր կողմից կազմակերպված այդ ակցիաներին:

ՀՀ իշխանությունը և անձամբ Նիկոլ Փաշինյանը, իրականում պատասխանատվությունից խուսափելով, փորձում է 120 հազար հայի իրավունքները ոտնահարելով՝ արցախցիներին ստիպել Ադրբեջանի հետ ուղղակի երկխոսության գնալ, որը մեզ համար անընդունելի է, որովհետև այդպիսով Արցախը չի ներկայացվում, չի պաշտպանվում որպես լիիրավ կողմ, որպես սուբյեկտ: Այս ամենը միայն Արցախի Հանրապետության ուսերին թողնելով՝ Փաշինյանը փորձում է պառակտել ազգը: Այն կեղծ թեզերը, թե Հայաստանն առանց Արցախի իբր կարող է դիմակայել թշնամուն, իսկ Արցախն առանց Հայաստանի պետք է փորձի իր համար բարենպաստ պայմաններ ստեղծել, վկայում է, որ Հայաստանի իշխանություններն իրենց քայլերով փորձում են Արցախը բռնակցել Ադրբեջանին: Թե՛ թշնամի պետությունը, թե ՀՀ իշխանությունները նույն օրակարգով են շարժվում»,-եզրափակեց Դ. Գալստյանը:

ԱՆՆԱ ԲԱԴԱԼՅԱՆ

Մանրամասները՝ «Փաստ» օրաթերթի այսօրվա համարում