Բաքվի նպատակները միայն Արցախն ու Սյունիքը չեն, վերջնանպատակն ավելի հեռուն է. իրանագետ
POLITICSՍեղմեք ԱՅՍՏԵՂ, լրացրեք օնլայն հայտը և մոռացեք հոսանքի վարձի մասին
Ինչպես հայտնի է, վերջին շրջանում առավել լարված են Իրան-Ադրբեջան հարաբերությունները, սակայն, սրան զուգահեռ, վերջերս Իրանում բացվեց Ադրբեջանի դեսպանություն: Դժվար է կանխորոշել, թե որոնք կլինեն այս 2 երկրների հետագա գործողությունները, սակայն կիզակետում կրկին Հայաստանն է:
ԼՈՒՐԵՐ.com-ի հետ զրույցում իրանագետ Ժաննա Վարդանյանն անդրադարձել է Իրան-Ադրբեջան հարաբերություններին և նշել, թե ինչպիսի քաղաքականություն պետք է որդեգրի Հայաստանը ստեղծված իրավիճակում:
Վերջինիս խոսքով՝ այս պարագայում Իրանը ՀՀ-ի համար հանդիսանում է բնական դաշնակից, որովհետև համընկնող շահերը կրկին գերակայում են ու խոսքը թե՛ միջանցքի, թե՛ Սյունիքի մասին է: Սա նշանակում է, որ նրա հետ հարաբերությունների զարգացումը հայկական կողմի համար կարևոր և առաջնային խնդիր է:
«Ելնելով նաև Իրան-Ադրբեջան լարված հարաբերությունների իրավիճակից՝ Հայաստանն այնպես պետք է անի, որ իր խոսքն ու տեսակետն առավել հասանելի դառնա իրանական դաշտում: Ներկայումս իրանական դաշտում կան բազում փորձագետներ, որոնք բավականին հայանպաստ դիրքորոշումներ են արտահայտում և իշխանություններից էլ պահանջում ավելի կոշտ քաղաքականություն որդեգրել Ադրբեջանի նկատմամբ: Այս համատեքստում, ինչպես արդեն նշեցի, շատ կարևոր է մեր խոսքը լսելի դարձնել, այսինքն՝ իրանական կողմին պետք է հասնի այն միտքը, որ Սյունիքի հարցը սկսվում է Արցախից և ԼՂ պատերազմը միայն նրանով չէր պայմանավորված, որը վկայում է այն մասին, որ Բաքվի նպատակները միայն Արցախն ու Սյունիքը չեն, վերջնանպատակն ավելի հեռուն է՝ դեպի Իրան»,- ընդգծեց նա: