«Երևանցին թույլ չի տա իրեն ծաղրեն, արհամարհեն, ՔՊ-ն օրինական մեթոդներով Երևանում ընտրվելու շանս չունի». Տեղի ունեցավ «Ապրելու երկիր» կուսակցության համագումարը

Այսօր տեղի ունեցավ «Ապրելու երկիր» կուսակցության համագումարը, որի ընթացքում ելույթ ունեցան կուսակցության անդամները, հաստատվեց կուսակցության կանոնադրությունը և ռազմավարական ծրագիրը, ընտրվեց կուսակցության քաղաքական խորհուրդը և նախագահ, քննարկվեցին մի շարք այլ հարցեր:

Կուսակցության անդամ Արամ Մանուկյանն իր ելույթում ընդգծեց, որ իրենց կուսակցության գործունեության մեջ համայնքներում աշխատանքը հատուկ կարևորություն ունի: «Պատահական չէ, որ ստեղծվելով 2021 թ.-ին՝ մեր քաղաքական գործունեությունը սկսել ենք ՏԻՄ ընտրություններին մասնակցելով, քանի որ խնդիրների լուծումը տեսել ենք հենց համայնքներում: Համոզված ենք, որ հզոր ու զարգացած պետության հիմքը կայուն զարգացած համայնքներն են: Մասնակցելով ընտրություններին 21 համայնքում` ներկայացված ենք 18-ում: 2021 թ.-ին տեղի ունեցած ընտրությունների ադյունքում «Ապրելու երկիր» կուսակցությունը ներկայություն է ապահովել 12 համայնքում՝ հաղթելով Նոյեմբերյանում և ստանձնելով համատեղ կառավարում Տաթևում: Կուսակցության հաղթարշավը շարունակվել է նաև 2022 թ.-ի ՏԻՄ ընտրություններում: 6 համայնքում մասնակցելով ավագանու ընտրություններում, ապահովել է ներկայացվածություն բոլորում, հաղթանակ է տարել Ալավերդիում»,-նշեց Մանուկյանը: Հավելեց, օրինակ` Նոյեմբերյան համայնքում ընտրություններից հետո ընդամենը 1 տարում կուսակցությունն իրականացրել է մեծածավալ ծրագրեր, մասնավորաբար` լուսավորության ցանց է կառուցվել Կողբ, Ոսկեվան և Կոթի գյուղերում, վերանորոգվել է երեք մշակույթի տուն, Դովեղ գյուղի բուժկետը, մանկապարտեզը: Մանուկյանն ընդգծում է` սա արված աշխատանքի միայն մի մասն է, անելիք դեռ շատ կա թե՛ Նոյեմբերյանում, թե՛ մյուս համայնքներում:

«Ապրելու երկիր» կուսակցության համահիմնադիր Մեսրոպ Առաքելյանն ընդգծում է` իշխանությունն անցած երկու տարվա ընթացքում չի հասկացել մի պարզ բան, որ խաղաղության օրակարգի հաստատումը պայմանագրի հաստատումով չի լինում: «Ունենք բազմաթիվ պայմանագրեր, որոնք մնացել են պատմության դասագրքի էջերում, իսկ Արցախի վերաբերյալ վերջին փաստաթուղթը խախտված է արդեն 132 օր. մեր հայրենակիցների մի մասը տոտալ շրջափակման մեջ է` ի հեճուկս խաղաղության դարաշրջանի: Խաղաղության հաստատման համար ունենք մեկ ճանապարհ` ունենալ հզոր անվտանգային համակարգ, ընդ որում ` անվտանգություն բառի լայն իմաստով` ռազմական, նյութական, տեղեկատվական, տնտեսական անվտանգություն և այլն: Ինչ ունենք այսօր: Պատերազմից 2,5 տարի անց շարունակում են խոցելի մնալ մեր սահմանները»,-ասաց Առաքելյանը:

Նրա խոսքով` այս իրավիճակում կարիք ունենք հստակ փոփոխություններ իրականացնել մեր երկրի համար կարևորագույն ոլորտներում` տնտեսություն, ռազմարդյունաբերություն, արտաքին քաղաքականություն: «Որպես պետություն և ժողովուրդ ունենք հզոր պետություն կերտելու տեսլականը որպես հավաքական երազանք և նպատակ ամրագրելու կարիք: Պարտավոր ենք դադարել լաց լինել, հուսահատվել, կարող ենք և ունենալու ենք հզոր պետություն, որտեղ ապրելը լինելու է երջանկություն: Որպես կուսակցություն հանձնառու ենք այդ նպատակի և երազանքի կերտման գործում առաջնորդել հայ ժողովրդին և Հայաստանի Հանրապետությանը»,-հավելեց կուսակցության համահիմնադիրը:

Կուսակցության համագումարին տեսակապով միացավ նաև Արցախի նախկին պետնախարար Ռուբեն Վարդանյանը: «Յոթ ամիս լինելով Արցախում` ավելի լավ հասկացա «Ավրորայի» շրջանակում հանդիպած բոլոր մարդկանց զգացողությունները, որոնք վտանգում են իրենց կյանքը` ուրիշներին օգնելու համար: Արցախը վտանգի մեջ է, մոտ 30 հազար երեխա վտանգի առջև են, քանի որ հնարավոր է չունենան հնարավորություն ապրելու իրենց երկրում: Պատասխանատվություն ենք կրում իրենց առջև: Վերջին երկու օրերին ԱԺ-ում ՀՀ իշխող ուժն ու ընդդիմությունը խոսում էին այն մասին, թե ով է մեղավոր, ինչ է եղել անցյալում, բայց ոչ մեկը չէր խոսում այն մասին, թե ինչ ենք անելու 120 հազար մարդու համար, որպեսզի նրանք Արցախում ապրելու հնարավորություն ունենան։ Այսօրվա իրավիճակը պարզ է՝ կամ մենք պայքարում ենք և այդ պայքարը նշանակում է շատ ծանր որոշումներ, կամ ենթարկվում ենք, իսկ դա նշանակում է կորցնում ենք մեր արժանապատվությունը։ ՀՀ վարչապետը, ընդդիմությունը պետք է հասկանան՝ եթե շարունակենք միայն մեղավոր գտնել ու քննադատել իրար, ապա դա ապագա չունեցող ճանապարհ է»,-ընդգծեց Վարդանյանը:

«Ապրելու երկիր» կուսակցության նախագահ Մանե Թանդիլյանը ցավով է նշում` համագումարը տեղի է ունենում մեր երկրի համար ծանր պայմաններում: «Արցախը գտնվում է շրջափակման մեջ և էթնիկ զտման վտանգի առջև, իսկ Հայաստանը` թշնամու նշանառության տակ: Իշխանությունների անհեռատեսության և անգործության հետևանքով, երբ երկրի առնվազն 150 քառակուսի կիլոմետր գտնվում է թշնամու օկուպացիայի ներքո ու շարունակում են անհեթեթ հանգամանքներում զոհվել հայորդիներ, օրվա իշխանությունները զբաղված են իրենց գահավիժող վարկանիշը փրկելու փորձերով, սակայն ո՛չ կակաչները, ո՛չ սակուրաները այլևս չեն օգնելու: Հայ ժողովուրդը գտնելու է լուծումներ այս իրավիճակից, որովհետև մեզ բնութագրում են ոչ թե մեր խնդիրները, այլ դրանց լուծումները:  Վերականգելու ենք հայ ժողովրդի կորցրած հույսը, որ ունակ ենք պետություն կառուցելու, որ ունակ ենք զարգացած ու խելացի երկիր լինելու: Այդ հույսը պատրանք չէ»,-ասաց Թանդիլյանը: Համագումարի ընթացքում կուսակցության նախագահը նաև տեղեկացրեց, որ իրենք մասնակցելու են Երևանի ավագանու ընտրություններին` հաղթելու հստակ տրամադրվածությամբ:

Համագումարի ընդմիջման ժամանակ լրագրողները որոշ հարցեր ուղղեցին Մանե Թանդիլյանին: Նա նշում է` մոտ մեկ ամսվա ընթացքում կամփոփեն և սոցհարցումները, և քննարկումները, հետո կհրապարակվեն Երևանի ավագանու ընտրությունների ժամանակ կուսակցության ծրագիրը, քաղաքապետի թեկնածուն և այլն: «Պետք է լավ թիմով ներկայանալ ու մասնակցել ընտրություններին»:

Գործընկերներիցս մեկը հետաքրքրվում է` փաստացի իշխանության ներկայացուցիչ Տիգրան Ավինյանն արդեն տևական ժամանակ է, ինչ, կարծես թե, արդեն սկսել է ոչ պաշտոնական քարոզարշավը, արդյոք սա որոշակիորեն արդեն խախտում չէ: «Համոզմունք ունեմ, որ կարողանալու ենք օրենքով սահմանված բոլոր դրույթները գործարկելով, մեր իրավունքներին տեր լինելով, մեր քվեն պաշտպանելով, իշխանազրկել ՔՊ-ին Երևանում: Այն, ինչ դուք տեսնում եք, տեսնում է նաև երևանցին և թույլ չի տա իրեն ծաղրեն, արհամարհեն, հայտարարություններ անեն, որոնք իրականության հետ կապ չունեն` նույն քարոզաչշավի համատեքստում: Բոլորին է պարզ, որ իշխանությունն իր վարչական ռեսուրսը, լծակը հենց այդ համատեքստում է օգտագործում` քարոզարշավ անելու համար: Բայց դա մեզ ամենևին չի անհանգստացնում, քանի որ դա իրենց չի օգնում նույնիսկ կործանվող վարկանիշը փրկելու հարցում: Տիրապետում ենք իրավիճակին, շփումների մեջ ենք երևանցիների հետ և համոզված եմ, որ ՔՊ-ն օրինական մեթոդներով ընտրվելու շանս չունի»,-նշեց «Ապրելու երկիր» կուսակցության նախագահը: Հավելում է` քննարկումներ են ունենում տարբեր ուժերի և անհատների հետ: «Դա չպետք է ինքնանպատակ լինի, ուզում ենք Երևանի մեր ընտրողները հասկանան, որ մենք ապագային ենք նայելու և հետքայլեր չենք անելու: Պետք է օրինական ճանապարհով իշխանափոխության հասնել, որովհետև շատ կարևոր է ժողովրդի վստահությունը: Առանց նրա վստահության քվեի որևէ գործողություն անելը դառնալու է ոչ լեգիտիմ, բարդ ու դժվար»,-եզրափակում է Թանդիլյանը:

Մեսրոպ Առաքելյանն էլ հավելում է` Երևանի ավագանու ընտրություններին մասնակցելու են հաղթելու վճռականությամբ: «Երևանի ընտրությունները շատ կարևոր են: Երևանը ոչ միայն որպես առանձին համայնք է, այլ նաև հայության մայրաքաղաքն է: Երևանի խնդիրների օր առաջ կարգավորումն անհրաժեշտություն է և վստահ ենք, որ մեր թիմն ունակ է այդ ուղղությամբ լավագույն առաջարկը ներկայացնել Երևանին: Միևնույն ժամանակ հայտնի է, որ ընտրությունները քաղաքական են և մայրաքաղաքում հաջողության հասնելը համարում ենք կարևորագույն հանգրվան իշխանափոխության համար: Կուսակցության ստեղծման օրվանից իշխանության գալու լավագույն տարբերակը համարում ենք ընտրությունները: Մի շարք համայնքներում վերջին երկու տարվա ընթացքում մասնակցելով ընտրություններին և դրական արդյունքներ գրանցելով, տեսնում ենք, որ հասարակությունը մեծ վստահություն ունի կուսակցության նկատմամբ: Վստահ ենք, որ Երևանում նույնպես հաջողելու ենք»,-ընդգծում է Առաքելյանը:

Լուսինե Առաքելյան